ဇူလိုင်-၂၃၊၂၀၂၅။တေဇ/People’s Spring
ရန်ကုန်မြို့၊ရွှေပြည်သာမြို့နယ်ရှိ စစ်ကောင်စီ၏အာမီရမ်( Army Rum) အရက်ချက်စက်ရုံမီးလောင်မှုဖြစ်ခဲ့ကြောင်းမီးသတ်တပ်ဖွဲ့ကယနေ့(ဇူလိုင် ၂၃ရက်) သတင်းထုတ်ပြန်သည်။
ယင်းမီးလောင်မှုနှင့်ပတ်သက်၍ မြန်မာနိုင်ငံမီးသတ်တပ်ဖွဲ့က သတင်းထုတ်ပြန်ထားသော်လည်း စက်ရုံနာမည်မပါဝင်ပဲ နာရီဝက် ကျော်ကြာ မီးငြှိမ်းသတ်ခဲ့ရကြောင်း သတင်းထုတ်ပြန်ထားသည်။
ယင်းမီးလောင်မှု သွားရောက်မီးငြှိမ်းသတ်ခဲ့သည့် အမှတ်(၄)ရပ်ကွက် ရွှေပြည်သာမြို့နယ်အရန်မီးသတ်စခန်းက ဓာတ်ပုံများ နှင့် Live ဗီဒီယိုကိုတင်ခဲ့သော်လည်း ပို့စ်များကို ပြန်ဖျက်သွားသည်ကို တွေ့ရသည်။
Public Service Announcement
ယင်းအကြောင်းအရာနှင့်ပတ်သက်၍ ယင်းမီးသတ်စခန်းသို့ ဖုန်းဖြင့်ဆက်သွယ်မေးမြန်းသော်လည်း ပြန်လည်ဖြေကြားခြင်းမရှိပေ။
ဇူလိုင် ၂၃ရက် နံနက် ၉နာရီခွဲခန့်တွင် ပေါက်ကွဲသံကြားရပြီး မီးလောင်မှုဖြစ်ခဲ့ခြင်းဖြစ်ကြောင်း ရွှေပြည်သာမြို့နယ် သတင်းများကိုဖော်ပြပေးနေသည့် Shwe Pyi Thar Information ကဖော်ပြထားသည်။
မီးလောင်မှုဖြစ်သည့်စက်ရုံအတွင်းသို့ မီးသတ်ကားများနှင့် အရေးပေါ်ကားများဝင်သွားသောကြောင့် ထိခိုက်မှုရှိနိုင်ကြောင်း ဒေသခံတစ်ဦးက ပြောကြားချက်ကို အထက်ပါပေ့ခ်ျ၌ ရေးသားထားသည်။
စစ်ကောင်စီ၏ အာမီရမ် စက်ရုံကို ဇန်နဝါရီ ၃၁ ရက် ညက အနောက်ပိုင်းခရိုင်ပြည်သူ့ကာကွယ်ရေး(ပကဖ)တိုက်ခိုက်ရေးအဖွဲ့က အဝေးပစ်လောင်ချာဖြင့် ၄၀ မမ သုံးလုံးပစ်ခတ် တိုက်ခိုက်ခဲ့သေးသည်။
