ဇူလိုင် – ၂၄ ၊၂၀၂၅။ရဲခေါင်/People’s Spring
ရန်ကုန်မြို့၊ဗိုလ်တထောင်မြို့နယ်စည်ပင်ဝင်း၌ ယနေ့ နံနက် ၇ နာရီခန့်တွင် လေဆင်နှာမောင်းတိုက်၍ ကွန်တိန်နာယာဥ်အချို့တိမ်မှောက်ပျက်စီးခဲ့သည်။
“လေးငါးမိနစ်လောက်ပဲကြာတယ်။ဘယ်လောက် ပြင်းလဲဆိုတော့ ကွန်တိန်နာတင်ထားတဲ့ကားတွေတောင်မှောက်တယ်။နေရာရွေ့တဲ့ကွန်တိန်နာဘောက်စ်တွေဆိုလည်း ၁၀ လုံးလောက်ရှိတယ်”ဟုမျက်မြင် ကြုံတွေ့ခဲ့ရသူတစ်ဦးကလူထုနွေဦးသို့ပြောသည်။
ဖြစ်စဥ်တွင်လူထိခိုက်မှုမရှိခဲ့ကြောင်း အထက်ပါဒေသခံက ဆက်ပြောသည်။
Public Service Announcement
ဗိုလ်တထောင်မြို့နယ်စည်ပင်ဝင်း၌ လေဆင်နှာမောင်းတိုက်ခတ်အပြီးမြင်ကွင်း။ဓါတ်ပုံ-CJ ဗိုလ်တထောင်မြို့နယ်စည်ပင်ဝင်း၌ လေဆင်နှာမောင်းတိုက်ခတ်အပြီးမြင်ကွင်း။ဓါတ်ပုံ-CJ ဗိုလ်တထောင်မြို့နယ်စည်ပင်ဝင်း၌ လေဆင်နှာမောင်းတိုက်ခတ်အပြီးမြင်ကွင်း။ဓါတ်ပုံ-CJ ဗိုလ်တထောင်မြို့နယ်စည်ပင်ဝင်း၌ လေဆင်နှာမောင်းတိုက်ခတ်အပြီးမြင်ကွင်း။ဓါတ်ပုံ-CJ
ထို့အပြင်ယနေ့ နံနက်ပိုင်းဗိုလ်တထောင်ကမ်းနားမှ ဒလမြို့နယ် သမတ္တကမ်းခြေသို့ ကူးသည့် စက်လှေတစ်စီးမှောက်၍ ပျောက်ဆုံးသူအချို့ရှိကြောင်း သိရသည်။သို့သော် လူထုနွေဦးအနေဖြင့် သီးခြား အတည်ပြုနိုင်ခြင်းမရှိသေးပေ။
သန်လျင်၊ဒဂုံဆိပ်ကမ်း၊သာကေတ၊မဂ်လာဒုံနှင့်ရန်ကင်းမြို့နယ်တို့တွင်လည်း ယနေ့ နံနက်ပိုင်းလေပြင်းတိုက်ခတ်မှုကြောင့် သစ်ပင်ကြီးအချို့လဲကျ မှုဖြစ်ပွားခဲ့ကြောင်း မီးသတ်ဦးစီးဌာနက ထုတ်ပြန်ထားသည်။သို့သော် ဗိုလ်တထောင်မြို့နယ်တွင်လေဆင်နှာမောင်းတိုက်ခိုက်ခြင်းကိုမူမဖော်ပြထားသေးပေ။
တောင်တရုတ်ပင်လယ်ပြင်မှအပူပိုင်းမုန်တိုင်းဝီဖာ( Wipha) အရှိန်နှင့် ဘင်္ဂလားပင်လယ်အော်မှ လေဖိအားနည်းရပ်ဝန်းအရှိန်ကြောင့် ရန်ကုန်တိုင်းအပါအဝင် မြန်မာနိုင်ငံဒေသအများစုတွင် ယခုရက်ပိုင်းမိုးကြီးနိုင်သည့်အပြင် လေပြင်းတိုက်ခတ်ခြင်း၊ လျှပ်စီးလက်ခြင်း၊ မိုးကြိုးပစ်ခြင်း၊ လျှပ် တစ်ပြက်ရေကြီးခြင်းနှင့်မြေပြိုခြင်းစသည့် သဘာဝဘေးအန္တရာယ်များသတိပြုရန် အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန် ကြီးဌာန (MOHADM)ကသတိပေးထားသည်။
