သြဂုတ်-၅၊၂၀၂၅။ဇေအောင်/People’s Spring
မန္တလေးတိုင်း၊ဝမ်းတွင်းမြို့နယ်မှာစစ်တပ်က စစ်မှုထမ်းဖို့ လူငယ်တွေကို ပေါ်တာဆွဲနေပြီး ပစ်ခတ်ဖမ်းဆီးတာတွေပါ ပြုလုပ်နေကြောင်း ဒေသခံတွေက ပြောပါတယ်။
ဇူလိုင်လ နောက်ဆုံးပတ်ကတည်းက မိတ္ထီလာလေတပ်က စစ်ကောင်စီတပ်ဟာ ဝမ်းတွင်းမြို့နယ်ထဲပတ်ပြီး ပေါ်တာဆွဲ ဖမ်းဆီးနေကြောင်း၊ သြဂုတ် ၁ ရက်နေ့ မနက်ကတော့ ကျောင်းကုန်းရွာ အနောက်ဘက်ယာတောထဲ နှမ်းရိတ်နေသူတွေကိုဝင်ရောက်ပေါ်တာဆွဲရာ အမျိုးသား ၈ဦးပါသွားပြီး ထွက်ပြေးသူတွေကိုလည်းသေနတ်နဲ့ ပစ်ဖမ်းခဲ့ကြောင်း ဝမ်းတွင်းအခြေစိုက် ကင်းထောက်အဖွဲ့ဖြစ်တဲ့ Voice Of Wundwin အဖွဲ့က ပြောပါတယ်။
“လူတော့မထိဘူးကြားတယ်”လို့ Voice Of Wundwin အဖွဲ့ဝင်တဦးက ပြောပါတယ်။
Public Service Announcement
အလားတူ ဇူလိုင် ၃ ရက်ညနေပိုင်းကလည်း ကြွယ်ကန်ရွာက လူငယ် ၂ ဦးကို ဖမ်းဆီးသွားကြောင်း၊ စစ်ကောင်စီဟာ ရွာတွေတင်မကဘဲ ကားဂိတ်တွေမှာပါ လိုက်ဖမ်းနေတယ်လို့ ဒေသခံတွေက ပြောပါတယ်။
ဇူလိုင်နောက်ဆုံးပတ် ဖမ်းဆီးမှုတွေမှာတော့ လူငယ် ၃၀ ထက်မနည်း ဖမ်းဆီးခံလိုက်ရတယ်လို့ သိရပါတယ်။
စစ်ကောင်စီကစစ်မှုထမ်းအပတ်စဥ်(၁၆)ကို စတင်ဖို့ ကြိုးစားနေပြီး မန္တလေးမြို့ပေါ်မှာတင် လူငယ်တွေ အများအပြား စစ်မှုထမ်းဖို့ မဲနှိုက်နေကြရကာ အဓမ္မဖမ်းဆီးမှုတွေလည်း ရှိနေပါတယ်။
စစ်ကောင်စီရဲ့ အတင်းအဓမ္မ စစ်သားစုဆောင်းခံရတဲ့ တပ်သားသစ်တွေ အနေနဲ့အခွင့်သာတဲ့ အချိန်တိုင်း တော်လှန် ရေးအင်အားစုတွေဆီ ဆက်သွယ်ပြီး ပြည်သူ့ရင်ခွင်သို့ အမြန်ဆုံးကူးပြောင်းခိုလှုံဖို့ အမျိုးသားညီညွတ်ရေးအစိုးရက(NUG)က တိုက် တွန်းထားပါတယ်။
