သြဂုတ်-၁၂၊၂၀၂၅။ကျော်ဇော/People’s Spring
ပြည်သူ့ကာကွယ်ရေးတပ်မတော်၊အမှတ်(၂) စစ်ဆင်ရေးနယ်မြေ၊ ဗျူဟာ(၂၅)ကွပ်ကဲမှုအောက်ရှိ ပဲခူးခရိုင် တပ်ရင်း ၂ – P23702 သို့ စစ်ကောင်စီရဲ့စစ်မှုထမ်းသင်တန်းများမှ သင်တန်းဆင်းစစ်သားသစ်ရှစ်ဦး လက်နက်မဲ့အလင်းဝင်လာတယ်လို့သြဂုတ် ၁၂ရက်မှာထုတ်ပြန်ပါတယ်။
အလင်းဝင်လာတဲ့ စစ်ကောင်စီတပ်သားတွေဟာနတ်သံကွင်း၊ ကွင်းချောင်းဝဗျူဟာ တာဝန်ကျတဲ့ ခလရ ၆၀(ကျောက်ကြီး)မှ ပြည်သူ့စစ်အပါတ်စဥ်(၉) သင်တန်းဆင်း ပြည်သူ့စစ်နှစ်ဦးနဲဲ့ ကမ်းရိုးတန်းဒေသကော့သောင်းမြို့အခြေစိုက် ခမရ (၅၉၃)မှ ပ.သ.စ.အပတ်ဥ်(၅)သင်တန်းဆင်း ပြည်သူ့စစ်ခြောက်ဦးတို့ဖြစ်တယ်လို့ ဖော်ပြပါတယ်။
“လက်နက်မဲ့ အလင်းဝင် ၈ ယောက်တော့ ကျနော်တို့ တပ်ရင်းကို ဝင်လာတယ်ဗျ။ (သြဂုတ်)၆ရက်နေ့လောက်ကပေါ့။ သူတို့ထဲက တချို့ကတော့(နေရပ်)ပြန်ဖို့ ဆန္ဒရှိကြတယ်”လို့ အလင်းဝင်တပ်
Public Service Announcement
သားတွေနဲ့ပတ်သက်ပြီးပဲခူးခရိုင်အမှတ်(၂)တပ်ရင်းမှ တာဝန်ရှိသူတစ်ဦးက People’s Spring ကို ပြောပါတယ်။
တပ်ရင်းအနေနဲ့ အလင်းဝင်သူတွေကိုလုပ်ထုံးလုပ်နည်းတွေနဲ့အညီစိစစ်လက်ခံကာထိန်းသိမ်းစောင့်ရှောက်ထားတယ်လို့လည်း ပဲခရိုင် အမှတ် (၂)တပ်ရင်းက အသိပေးပါတယ်။
“ကျနော်တို့ပြည်သူ့စစ်တွေကို သူတို့စစ်သားတွေက ခွဲခြားပြီး ဆက်ဆံတယ်။ သူတို့ ဆေးတွေချတယ်၊ အရက်တွေသောက်တယ်၊ မူးလာလို့ရှိရင် သူတို့စစ်သားတွေက ကျနော်တို့ကို ပြဿနာရှာတယ်။ သေနတ်တွေနဲ့ချိန်တယ်၊ ပစ်သတ်ဖို့အထိ အဲဒီလောက်အထိ လုပ်ပါတယ်ခင်ဗျ”လို့ အလင်းဝင်လာသူတွေထဲက ခလရ (၆၀) ကျောက်ကြီးတပ်မှာ ပြည်သူ့စစ်သင်တန်းဆင်းအနေနဲ့တာဝန်ထမ်းခဲ့ရတဲ့ ကိုထွန်းမင်းနိုင်က ပြောပါတယ်။
နောက်ပြီး စစ်ကောင်စီတပ်သားတွေက သူတို့လို ပြည်သူ့စစ်သင်တန်းဆင်းတွေကိုလူလိုမဆက်ဆံတဲ့အပြင် သူတို့အားလုံးကို လူသားဒိုင်းအဖြစ်အသုံးပြုတာတွေလည်း ရှိနေတာကြောင့် အခုလို PDF တပ်ရင်းတပ်ဖွဲ့တွေထံကို ခိုလှုံခွင့်ရဖို့ ထွက်ပြေးလာခဲ့ကြတာလို့ ပဲခူးခရိုင် အမှတ် (၂)ရင်းကပြုလုပ်တဲ့ အမေးအဖြေကဏ္ဍမှာ ထည့်သွင်းပြောကြားခဲ့ပါတယ်။
လက်နက်ချပြီး ပြည်သူနဲ့ပူးပေါင်းလိုတဲ့စစ်သားတွေကို ပဲခူးခရိုင်တပ်ရင်း ၂ က လက်ခံကြိုဆိုလျက်ရှိပြီး လူ့အခွင့်အရေးအပြည့်အဝရရှိစေမယ်လို့ထုတ်ပြန်ထားပါတယ်။ဒါ့အပြင် လက်နက်နဲ့အလင်းဝင်လာသူတွေကိုဆုငွေများချီးမြှင့်ပေးသွားမှာဖြစ်တယ်လို့အသိပေးထုတ်ပြန်ထားပါတယ်။
