သြဂုတ်-၁၅၊၂၀၂၅။ဇေအောင်/People’s Spring
ရန်ကုန်၊ မြောက်ဒဂုံက အကယ်ဒမီရွှေဆိုင်ဓါးပြတိုက်ခံရချိန် ဝန်ထမ်းတွေ စုပေါင်းဖမ်းဆီးလို့ ကျူးလွန်သူတွေထဲက တစ်ဦးကို ဖမ်းမိခဲ့ကြောင်း သတင်းရရှိပါတယ်။
သြဂုတ် (၁၄)ရက်က ရန်ကုန်မြို့၊မြောက်ဒဂုံမြို့နယ်၊ ၃၄ ရပ်ကွက်၊ ဦးဝိစာရလမ်းမှာ ဖွင့်လှစ်ထားတဲ့ ရွှေစင်အကယ်ဒမီ ရွှေဆိုင်ကို လူတစ်စုက လက်နက်တွေနဲ့ လာရောက်လုယက်ခဲ့တာဖြစ်ကြောင်း အဆိုပါရွှေဆိုင်က ဒီကနေ့မှာ ထုတ်ပြန်ပါတယ်။
ဓားပြတွေကို ဝန်ထမ်းတွေက ခုခံကာကွယ်ခဲ့တာကြောင့် ကျူးလွန်သူများထဲက ၁ဦးကို လက်ရဖမ်းမိခဲ့တယ်လို့ ရွှေစင်အကယ်ဒမီ ရွှေဆိုင်က အသိပေးပါတယ်။
Public Service Announcement
“ဝန်ထမ်းအချို့ ထိခိုက်ဒဏ်ရာ ရရှိခဲ့သော်လည်း အသက်အန္တရာယ် စိုးရိမ်ဖွယ်ရာ မရှိခဲ့ကြပါ။”လို့ ရွှေစင်အကယ်ဒမီ ရွှေဆိုင်က ဆိုပါတယ်။
ဝန်ထမ်းတွေစုပေါင်းခုခံတာကြောင့် အခြားဓါးပြတွေလည်း ထွက်ပြေးသွားပြီး ပစ္စည်းဆုံးရှုံးမှုမရှိဘူးလို့ သိရပါတယ်။ ဓါးပြတိုက်အပြီးမှာတော့ စစ်ကောင်စီတပ်နဲ့ရဲတွေက ရွှေဆိုင်ကို လာရောက်စစ်ဆေးခဲ့ပါသေးတယ်။
စစ်ကောင်စီ အာဏာသိမ်းပြီးနောက်ပိုင်း ဥပဒေစိုးမိုးမှုမရှိတော့တာကြောင့် ရန်ကုန်၊ မန္တလေးအပါအဝင် မြို့ကြီးတွေမှာ ဓားပြမှုတွေ မကြာခဏ ဖြစ်ပွားနေပါတယ်။
