ဩဂုတ်−၂၀၊ ၂၀၂၅။ထားမြတ်/People’s Spring
ကချင်ပြည်နယ်၊ ဗန်းမော်မြို့၌ ယနေ့(ဩဂုတ် ၂၀ရက်)တိုက်ပွဲအတွင်း စစ်ကောင်စီ၏ တင့်ကား ၁စီးကို ကချင်လွတ်လပ်ရေးတပ်မတော်(KIA) ပူးပေါင်းတပ်က တိုက်ခိုက်ဖျက်ဆီးနိုင်ခဲ့ကြောင်း ကချင်စစ်ရေးသတင်းရင်းမြစ်က ပြောသည်။
“ဗန်းမော်မှာ နေ့လည် ၁နာရီအချိန်လောက် စခတင့်ကား တစီးကို ပစ်ခတ်ဖျက်စီးနိုင်ခဲ့ပြီ။ မြို့ထဲမှာဖြစ်တဲ့တိုက်ပွဲ။ တင့်ကားလက်ကျန် ၂စီးနဲ့လိုက်လံပစ်ခတ်နေတာကြာပီ”ဟု ကချင်သတင်းရင်းမြစ်က ပြောသည်။
KIA ပူးပေါင်းတပ်ဖွဲ့သည် မြို့သိမ်းစစ်ဆင်ရေးစတင်ခဲ့သည့် ယခု ၂၀၂၅နှစ်ဆန်းပိုင်းကတည်းက ဗန်းမော်မြို့ရှိ စစ်ကောင်စီ၏ အမှတ်(၅၀၁၄) တင့်ကားတပ်ရင်း၊ အမှတ်(၇၀၀၆) သံချပ်ကာ တပ်ရင်းများကို သိမ်းပိုက်ခဲ့ရာ သံချပ်ကာယာဉ် ၇စီးထက်မနည်း တိုက်ခိုက်သိမ်းပိုက်ထားနိုင်ခဲ့သည်။
Public Service Announcement
အဆိုပါ သံချပ်ကာယာဉ်များ သိမ်းပိုက်ထားနိုင်မှုကို KIAက ယခင်ကတည်းက အတည်ပြုထားသည်။
KIA ထပ်မံဖျက်ဆီးလိုက်သည်ဆိုသည့် တင့်ကားနှင့် ပတ်သက်ပြီး လူထုနွေဦးက သီးခြားအတည်မပြုနိုင်သေးပေ။
” အခုတလောက ဗန်းမော်မြို့တွင်းမှာ ကျနော်တို့ သိမ်းတဲ့စခန်းတွေမရှိသလို ကျနော်တို့ ဆုတ်သွားတဲ့ စခန်းတွေလည်း မရှိပါဘူး။ လိုင်းပေါ်မှာ ပြန့်နှံ့နေတဲ့ ပုံတွေက အဟောင်းတွေပါ။ Fake တွေပါ” ဟု ဗိုလ်မှူးကြီးနော်ဘူက ဗန်းမော်မြို့လက်ရှိစစ်ရေးအခြေအနေနှင့်ပတ်သက်ပြီး ယနေ့ (ဩဂုတ် ၂၀ရက်) နေ့လည်ပိုင်း၌ ဖြေကြားသည်။
စစ်ကောင်စီသည် ဩဂုတ်လဆန်းက စစ်သင်္ဘောများ ဗန်းမော်မြို့သို့ ဆိပ်ကပ်လာပြီးနောက်အမှတ်(၂၁)စစ်ဆင်ရေးကွပ်ကဲမှုဌာနချုပ် (စကခ-၂၁)၌ စုပုံထားသည့် လက်နက်ခဲယမ်းများကို ဗန်းမော်ရှိ လက်ကျန်တပ်စခန်းများ၌ ဖြန့်ဝေရန် စစ်ကြောင်းထိုးတိုက်ခိုက်နေရာ KIAနှင့် နှစ်ပတ်ကြာ တိုက်ပွဲများ ဖြစ်ပွားနေသည်။
