ဩဂုတ်−၂၅၊ ၂၀၂၅။ဒီတိုး/People’s Spring
ထိုင်းနိုင်ငံ၊ မဲဆောက်မြို့စျေးကြီးမှာ ရန်ဖြစ်ကြတဲ့ မြန်မာစျေးသည်အမျိုးသမီး ၆ဦးကို ထိုင်းအာဏာပိုင်တွေက ဒီကနေ့ ဩဂုတ် ၂၅ရက်မှာ ဖမ်းဆီးလိုက်ပါတယ်။
မဲဆောက်စျေးကြီးမှာ ငရုတ်သီးမှုန့်စျေးလျော့ရောင်းချတာနဲ့ ပတ်သက်ပြီး ဩဂုတ် ၂၃ရက်နဲ့ ၂၄ရက်မှာ တုတ်တွေကိုင်ဆောင်ပြီး ရန်ဖြစ်ကြတဲ့အမှုနဲ့ပတ်သက်ပြီး မြန်မာစျေးသည်အမျိုးသမီး ၆ဦး ဖမ်းဆီးခံရတာ ဖြစ်ပါတယ်။
(မြန်မာစျေးသည်တွေ ရန်ဖြစ်နေကြစဉ်နဲ့ ထိုင်းအာဏာပိုင်တွေ မဲဆောက်စျေးစစ်ဆေးနေစဉ်။ ဓာတ်ပုံ − ชิราวุธ รุ่งจำรัสรัศมี) (မြန်မာစျေးသည်တွေ ရန်ဖြစ်နေကြစဉ်နဲ့ ထိုင်းအာဏာပိုင်တွေ မဲဆောက်စျေးစစ်ဆေးနေစဉ်။ ဓာတ်ပုံ − ชิราวุธ รุ่งจำรัสรัศมี) (မြန်မာစျေးသည်တွေ ရန်ဖြစ်နေကြစဉ်နဲ့ ထိုင်းအာဏာပိုင်တွေ မဲဆောက်စျေးစစ်ဆေးနေစဉ်။ ဓာတ်ပုံ − ชิราวุธ รุ่งจำรัสรัศมี) v
ရန်ဖြစ်ကြတဲ့ စျေးသည်တွေဖြစ်တဲ့ မခင်စန်းဦး (၄၄)နှစ်၊ မခင်ဆွေမိုး(၃၃)နှစ်၊မမေတ္တာခိုင်(၃၅)နှစ်၊မစန်းစန်းထွေး(၃၅)နှစ်၊မထိုက်ထိုက်အောင် (၃၁)နှစ်နဲ့ မမိုးမိုးကြည် (၃၅)နှစ်တို့ ဖမ်းဆီးခံရတာ ဖြစ်ပါတယ်။
Public Service Announcement
ထိုင်းနိုင်ငံသားများသာ လုပ်ကိုင်ခွင့်ရှိတဲ့ကန့်သတ်အလုပ်လုပ်ကိုင်မှု၊ ပတ်ဝန်းကျင်ရပ်ရွာရဲ့လုံခြုံရေးနဲ့အေးချမ်းသာယာရေးကို ထိခိုက်စေမှု၊ စာရွက်စာတမ်းအထောက်အထားရှိ၊မရှိနဲ့ ရှိရင်လည်း ခွင့်ပြုအလုပ်နဲ့ လက်ရှိအလုပ်မတူညီမှုစတာတွေနဲ့ တရားစွဲဆိုခံရနိုင်တယ်လို့ မဲဆောက်မြို့အခြေစိုက်မြန်မာပြည်သားများအရေးပူးတွဲလှုပ်ရှားမှုကော်မတီ (JACBA) ဥက္ကဌဦးမိုးကြိုးက ပြောပါတယ်။
“ဒါကတော့ အရုပ်ဆိုး အကျည်းတန်လွန်းပါတယ်။ မဲဆောက်ရောက်တဲ့ မြန်မာတွေ နှစ်သိန်းခွဲကနေ သုံးသိန်းအထိ မဲဆောက်မြို့မှာရှိတယ်။ ကိုယ့်နည်းကိုယ့်ဟန်၊ ကိုယ့်အသိုင်းအဝိုင်း၊ ကိုယ့်အစုနဲ့ကိုယ် အေးအေးချမ်းချမ်းလေးနဲ့ စက်ရုံလုပ်သားကလည်း စက်ရုံလုပ်သား ၊အလုပ်ရုံလုပ်သားကလည်းအလုပ်ရုံလုပ်သား ၊ ခြံတောင်ယာ ၊ဆောက်လုပ်ရေး ၊ အထွေထွေလုပ်သားကလည်း သူ့ဟာသူရှာဖွေ စားသောက်နေတာ။ ဒီဈေးသည်တွေကတော့ အင်မတန်ကို မင်းမဲ့တိုင်းပြည်လိုလုပ်သွားပြီးတော့ ကိုယ်ကနိုင်ငံခြားသားဖြစ်တယ်၊ ဧည့်သည် ဖြစ်တယ်။ နိုင်ငံခြားသားလို ဧည့်သည်လိုမနေဘူး”လို့ ဦးမိုးကြိုးက ပြောပါတယ်။
အမှု လေးမှု၊ငါးမှုနဲ့ တရားစွဲဆိုခံရနိုင်တယ်လို့ ဦးမိုးကြိုးက သုံးသပ်ပါတယ်။
မဲဆောက်စျေးကြီးဟာ မြန်မာစျေးသည်တွေ အများစုရောင်းချတဲ့ စျေးကြီးဖြစ်ပြီး မြန်မာအိမ်သုံးပစ္စည်းတွေနဲ့ အသီးအရွက်၊ အသားငါးရောင်းချတဲ့ စျေးဖြစ်ပါတယ်။
မြန်မာချင်းရန်ဖြစ်ကြတဲ့ သတင်းတွေအောက်မှာ ထိုင်းနိုင်ငံသားအချို့က သူတို့ကိုမြန်မာနိုင်ငံကို ပြန်ပို့ပစ်ဖို့ မှတ်ချက်ပြုကြသလို ၊ငရုပ်သီး ဈေးနှုန်းကနေ ရန်ဖြစ်တာဆိုပြီး နောက်ပြောင်တဲ့မှတ်ချက်တွေရေးကြတာလည်းတွေ့ရပါတယ်။ ဈေးထဲက ရန်ပွဲက ထိုင်းစစ်သားတွေပါ ဝင်ရောက်ဖြန်ဖြေခဲ့ရတာမို့ ထိုင်းစစ်သားတွေ ပင်ပန်းနေပြီလို့ ပြောဆိုရေးသားကြတာတွေလည်း တွေ့ရပါတယ်။
