ဩဂုတ်−၂၅၊၂၀၂၅။ဇော်ရမ်း/People’s Spring
ကချင်ပြည်နယ်၊ ဖားကန့်မြို့ကို ထပ်မံဝင်ရောက်လာသည့် စစ်ကောင်စီတပ်စစ်ကြောင်းက ယနေ့(ဩဂုတ် ၂၅) နံနက်ပိုင်းတွင် မြို့အဝင်ဈေးအနီး၌ ဈေးသည်အမျိုးသမီးတစ်ဦးအပါအဝင် အရပ်သား နှစ်ဦးအား ပစ်ခတ်သတ်ဖြတ်သွားပြီး ပစ်ခတ်မှုထွက်ကြည့်သည့် ရဲများကိုပါ ပစ်ခတ်သွားကြောင်း သတင်းရရှိသည်။
အင်အား ၁၀၀ကျော်ပါသည့် စစ်ကောင်စီတပ်စစ်ကြောင်းသည် နံနက် ၇နာရီခန့်တွင် ဖားကန့်မြို့၊ မှော်ဝမ်းရပ်ကွက်ရှိ ပန်းတင်တံတားနှင့် ဈေးအနီးတွင် သေနတ်ဖြင့် ပစ်ခတ်ခြင်းဟု ဒေသခံများကပြောသည်။
” သူတို့စစ်ကြောင်းကို ကြည့်လို့ဆိုပြီး ပစ်တာ။ ဈေးသည်အမျိုးသမီးကြီးဆို ပွဲချင်းပြီးပဲ။ ရဲတွေကိုပါ ပစ်တာ။ အရပ်သားသေဆုံးတာက ၂ဦးသေချာပြီး ၄ဦးလည်း ကြားရတယ်” ဟု ဒေသခံတစ်ဦးကပြောသည်။
Public Service Announcement
ယင်းစစ်ကြောင်းမှ စစ်ကောင်စီတပ်သားများသည် မူးယစ်ဆေးသုံးထားပြီး ဆေးကြောင်နေသည်ဟု သံသယရှိကြောင်း ၎င်းတို့အား တွေ့ရှိခဲ့သူတစ်ဦးက ပြောသည်။
” လုံးဝအပြင်မထွက်ကြပါနဲ့။ ဒီစစ်ကြောင်းက ဆေးကြောင်နေတာ။ အခုမနက်ဖြစ်စဉ်က တော်တော်လွန်ပါတယ်။ သူတို့စစ်ကြောင်းကို လှမ်းကြည့်လို့ ပတ်ပစ်သွားတာပါ”ဟု စစ်ကြောင်းနှင့် ထိပ်တိုက်တိုးခဲ့သည့် အဆိုပါအမျိုးသားက ပြောသည်။
ပြီးခဲ့သည့်ဇွန်လက ဖားကန့်ဒေသ ကာမိုင်း – လုံခင်းလမ်းအတိုင်း ဝင်လာသော စစ်ကောင်စီတပ်စစ်ကြောင်းသည် ဖားကန့်မြို့ကို ရောက်ရှိပြီးနောက် တိုက်ပွဲပြင်းထန်နေစဉ် ယခု ဩဂုတ်လဆန်းပိုင်းတွင် နောက်ထပ်စစ်ကြောင်း ဝင်ရောက်လာခြင်းဖြစ်သည်။
အဆိုပါစစ်ကြောင်းမှ စစ်ကောင်စီတပ်သားများသည် ကချင်ဒေသကာကွယ်ရေးတပ်(KPDF) ယူနီဖောင်းများဖြင့် စစ်ရေးလှုပ်ရှားနေပြီး ဩဂုတ် ၂၃ရက်တွင် ကချင်လွတ်လပ်ရေးတပ်မတော် (KIA)၊KPDFက ကြားဖြတ်တိုက်ခိုက်ခဲ့ရာ ကားတစ်စီးနှင့် ဒရုန်းငါးစင်း သိမ်းယူနိုင်ခဲ့ကြောင်း သတင်းရရှိသည်။
ထို့အပြင် ဇွန်လက စစ်ကြောင်းဝင်ရောက်လာစဉ်ကလည်း လုံးခင်း-ဖားကန့်လမ်းပိုင်းတလျှောက် အရပ်သား ၃၀ဦးထက်မနည်းကို ပစ်ခတ်သတ်ဖြတ်ခဲ့သည်။
ဖားကန့်တိုက်ပွဲ ဆက်ပြင်းထန်နိုင်၍ စစ်ကောင်စီက လေကြောင်းမှလာရောက်တ်ိုက်ခိုက်နိုင်ကြောင်းနှင့် လက်နက်ကြီးများလည်း ပစ်ခတ်နေ၍ သတိပြုကြရန် KIA၊KPDFတပ်ဖွဲ့ဝင်များက ဒေသခံများအားသတိပေးထားသည်။
ယခုရက်ပိုင်း ဖားကန့်မြို့နယ်အတွင်း အမှိုက်ပုံကျေးရွာ၊ ရှရော်ခကျေးရွာ၊ မှော်မောင်းကုန်းကျေးရွာ၊ မှော်မောင်းလယန်ကျေးရွာတို့တွင် တိုက်ပွဲဖြစ်ပွားနေသည်။
