ဩဂုတ်−၂၆၊၂၀၂၅။လူအေး/People’s Spring
ဝိုင်းမော်မြို့နယ်အတွင်း ကချင်လွတ်လပ်ရေးတပ်မတော်(KIA)၊KPDF ထိန်းချုပ်ထားသည့်လမြန်ကျေးရွာကို စစ်ကောင်စီက မြေပြင်စစ်ကြောင်းမထိုးနိုင်၍ လေကြောင်းမှ နှစ်ကြိမ်ဗုံးကြဲတိုက်ခိုက်ခဲ့ကြောင်း သတင်းရရှိသည်။
လမြန်ကျေးရွာဘက်ကိုယနေ့(ဩဂုတ် ၂၆ရက်)နံနက်ပိုင်းကစ၍ လက်နက်ကြီးများဖြင့် ပစ်ခတ်ခဲ့ပြီး နေ့လယ် ၁နာရီခန့်တွင် ဂျက်ဖိုက်တာဖြင့်နှစ်ကြိမ်ဗုံးကြဲသွားခြင်းဟု ဝိုင်းမော်မြို့ခံတစ်ဦးကပြောသည်။
” မြေပြင်ကနေမတက်ရဲတော့ လက်နက်ကြီးနဲ့လေကြောင်းပစ်နေတာ။ လမြန်ရွာက ရာဘာတောဘက်ကိုမဲနေတယ်”ဟု ၎င်းက ပြောသည်။
Public Service Announcement
စစ်ကောင်စီသည် ဝိုင်းမော်မြို့ ခလရ(၅၈)တပ်ရင်းမှလည်း လက်နက်ကြီးများဖြင့် ပစ်ခတ်နေခြင်းဖြစ်သည်။ ဧရာဝတီမြစ်ကူးတံတားခြားလျက် မြို့ချင်းဆက်နေသော မြစ်ကြီးနားနှင့် ဝိုင်းမော်မြို့တွင် ယခုရက်ပိုင်းအတွင်း စစ်ကောင်စီက စစ်ရေးလှုပ်ရှားမှုများ ပိုမိုပြုလုပ်လာသည်ဟု သတင်းရရှိသည်။
KIAနှင့်KPDFများထိန်းချုပ်ထားသည့်လမြန်ရွာကိုစစ်ကောင်စီက လက်နက်ကြီးရော လေကြောင်းမှပါ မကြာခဏ ပစ်ခတ်နေသည်။
ထို့အပြင် ပြန်လည်ထ်ိုးစစ်ဆင်ရန်အတွက် တင့်ကားများလည်း ပြင်ဆင်ထားသည်ကိုတွေ့ရသည်ဟု ဒေသခံများက ပြောသည်။
ဩဂုတ်၂၄ရက်ညကမြစ်ကြီးနားမြို့ရှိမြောက်ပိုင်းတိုင်းစစ်ဌာနချုပ် (မပခ)မှနေ၍ စစ်ကောင်စီက လက်နက်ကြီးများပစ်ခတ်ရာ ရမ်ပူရပ်ကွက်အတွင်းရှိ နေအိမ်တစ်လုံးပေါ် ကျရောက်ပေါက်ကွဲပြီး ကလေးငယ်တစ်ဦး သေဆုံးခဲ့သည်။
ကချင်လွတ်လပ်ရေးတပ်မတော်(KIA)၊ KPDFပူးပေါင်းတပ်များနှင့် စစ်ကောင်စီတပ်သည် လက်ရှိတွင် ဖားကန့်နှင့် ဗန်းမော်မြို့တို့တွင်လည်း တိုက်ပွဲဖြစ်ပွားနေသည်။
ဗန်းမော်မြို့၌ အမှတ်(၂၁)စစ်ဆင်ရေးကွပ်ကဲမှုဌာနချုပ်(စကခ−၂၁) အပါအဝင် နေရာ သုံးနေရာထက်မနည်းတွင် ယနေ့(ဩဂုတ်၂၆ရက်) တိုက်ပွဲပြင်းထန်ခဲ့ကြောင်း ကချင်စစ်ရေးသတင်းရင်းမြစ်က ပြောသည်။
ဗန်းမော်မြို့တွင်လက်ကျန်တပ်စခန်းများအားလုံးသိမ်းပိုက်နိုင်ရေး KIA ပူးပေါင်းတပ်က ကြိုးပမ်းနေသလို စစ်ကောင်စီတပ်ကလည်း ယခင် ဆုံးရှုံထားသည့် နေရာများ ပြန်လည်သိမ်းပိုက်ထိန်းချုပ်နိုင်ရေး ကြိုးပမ်းနေရာ အပြန်အလှန် ထိုးစစ်ဆင်မှုနှင့်အတူ တိုက်ပွဲများ ရက်ဆက်ပြင်းထန်နေသည်ဟု ဆိုသည်။
“ဗန်းမော်ဘက်တော့တိုက်ပွဲတော်တော်ပြင်းထန်တယ်။ ရက်ရက် စက်စက် ပြင်းထန်တယ်နော်။ ဒီနေ့လည်း လေကြောင်း ပစ်ကူ က ၁၃ကြိမ်ရှိတယ်။ စကခ(၂၁) ဝန်းကျင်မှာပဲ။ စကခ(၂၁)နဲ့ ၂၃၆၊ သံချပ်ကာ တပ်ရင်း အဲဒီနားတ၀ိုက်မှာ”ဟု ကချင်စစ်ရေးသတင်းရင်းမြစ်က ပြောသည်။
ခလရ(၂၃၆)တပ်ရင်းနှင့် သံချပ်ကာတပ်ရင်းကို KIAက ယခင်ကတည်းက သိမ်းပိုက်ထားခြင်းဖြစ်ပြီး စစ်ကောင်စီဘက်က ထိုးစစ်ဆင်လာ၍ တိုက်ပွဲများ ပြင်းထန်နေခြင်းဖြစ်သည်။
