သြဂုတ် – ၂၇ ၊ ၂၀၂၅ ၊ ဆိုင်းမင်း/People’s Spring
အာဏာသိမ်း စစ်ကောင်စီ ထိန်းချုပ်ထားတဲ့ မန္တလေးမြို့က ရပ်ကွက်တွေမှာ စစ်မှုထမ်းအပတ်စဉ် (၁၇) အတွက် တပ်သားသစ်စုဆောင်း ဖို့ လူငယ်တွေကို ဖိအားပေး မဲနှိုက်ခိုင်းတာတွေ အခုရက်ပိုင်းမှာ ရှိလာတယ်လို့မြို့ခံတွေဆီကသိရပါတယ်။
အခုရက်ပိုင်းအတွင်း လူငယ်တွေရှိတဲ့နေအိမ်တွေဆီ စုရပ်မှာ မဲလာနှိုက်ဖို့ အကြောင်းကြားစာတွေပေးပို့လာတာဖြစ်ပြီး ရပ်ကွက် ဓမ္မာရုံ ၊ ရပ်ကွက်ရုံးတွေမှာ စုရပ်လုပ်ပြီး မဲနှိုက်စေတာပါ။
“ ၃ ရပ်ကွက်လောက် ပေါင်းနှိုက်ရတာ ၊ မလာရင် သူတို့ဘာသာနှိုက်မယ်ဆိုလို့ ကျမသားအစား သွားနှိုက်ရတယ်၊ သားကတော့ ဒီတစ်ကြိမ်မပါဘူး”လို့ ချမ်းအေးသာစံမြို့နယ််မှာနေထိုင်တဲ့ မိခင်တစ်ဦးကပြောပါတယ်။
Public Service Announcement
စစ်မှုထမ်းမဲနှိုက်ဖို့ မပျက်မကွက်လာရောက်ရမှာဖြစ်ပြီးကာယကံရှင် မလာနိုင်ရင်အသက် ၁၈နှစ်ပြည့်ပြီးအိမ်ထောင်စုဇယားမှာပါဝင်သူက ကိုယ်စားမဲနှိုက်ရမှာ ဖြစ်တယ်လို့စစ်ကောင်စီလက်အောက်ခံ အုပ်ချုပ်ရေးပိုင်းက ဖိအားပေးထားတာပါ။
ကာယကံရှင်လည်းမလာ ၊ ကိုယ်စားမဲနှိုက်သူလည်းမရှိရင်တော့ စစ်ကောင်စီလက်အောက်ခံ အုပ်ချုပ်ရေးပိုင်းက မဲနှိုက်မှာဖြစ်ပြီး မဲပေါက်ရင် အိမ်တိုင်ရာရောက်လိုက်လံခေါ်ဆောင်တယ်လို့ မြို့ခံတွေဆီကသိရပါတယ်။
ဒီနေ့ သြဂုတ်လ ၂၇ ရက် မနက်ပိုင်း ၉ နာရီကစတင်ပြီး ချမ်းအေးသာစံမြို့နယ်နဲ့မဟာအောင်မြေမြို့နယ်ကရပ်ကွက်တွေမှာ စစ်မှုထမ်းအပတ်စဉ် (၁၇ )အတွက် စတင် မဲနှိုက်စေပါတယ်။
စစ်ကောင်စီဟာ စစ်မှုထမ်း အပတ်စဉ် တစ်ခုကိုလူငါးထောင်နှုန်းခေါ်ယူမယ်လို့ ကြေညာထားတာဖြစ်ပြီး ပြီးခဲ့တဲ့ ရက်သတ္တပတ် သြဂုတ်လ ၁၈ ရက် က အပတ်စဉ် (၁၆) ကို စတင်ထားပါတယ်။
အပတ်စဉ် (၁၃) အထိ သင်တန်းဆင်းထားပြီဖြစ်တဲ့အတွက် စစ်ကောင်စီတပ်အတွက် မြေပြင်တိုက်ခိုက်ရေးအင်အား ၆၅,၀၀၀ ရရှိထားပြီလို့ အကြမ်းဖျင်းခန့်မှန်းရပါတယ်။
စစ်မှုထမ်းသင်တန်းဆင်းတွေကို စစ်ကောင်စီတပ်က တော်လှန်ရေးအဖွဲ့တွေနဲ့ ထိပ်တိုက်ရင်ဆိုင်တိုက်ပွဲဖြစ်နေတဲ့ ရှေ့တန်းနေရာတွေ ဆီ စေလွှတ်နေပြီး တိုက်ပွဲကျသူတွေရှိသလို လက်နက်ချ အလင်းဝင်သွားသူတွေ လည်းရှိနေပါတယ်။
စစ်မှုထမ်းဥပဒေကိုစစ်ကောင်စီကပြဌာန်းလိုက်တဲ့ပြီးခဲ့တဲ့နှစ် ဖေဖော် ဝါရီလ ကစတင်ပြီး ပြည်တွင်းက မြန်မာလူငယ်လူရွယ်တွေဟာ အိမ်နီးချင်း ထိုင်းနိုင်ငံအပါအဝင် ပြည်ပ ကို အလုံးအရင်းနဲ့ထွက်ခွာသွားကြတာပါ။
