သြဂုတ်-၃၁၊၂၀၂၅။ သုည/People’s Spring
စစ်ကိုင်းတိုင်းအတွင်းမှာ သပိတ်အဖွဲ့တွေ၊ ဒေသခံပြည်သူတွေဟာ အာဏာသိမ်းစစ်ကောင်စီက ပြုလုပ်မယ့် အတုအယောင်ရွေးကောက်ပွဲကို သပိတ်မှောက်ဖို့ ဒီကနေ့ (သြဂုတ် ၃၁)မှာ လှုံ့ဆော်ဆန္ဒပြခဲ့ကြပါတယ်။
စစ်ကိုင်းတိုင်း ဆားလင်းကြီးမြို့နယ်မှာ “အတုအယောင်ရွေးကောက်ပွဲကို သပိတ်မှောက် ဖက်ဒရယ်လမ်းကို ရဲရဲလျှောက်” စာသားနဲ့ စျေးတစ်နေရာမှာ စျေးသူစျေးသားတွေကို အတုအယောင်ရွေးကောက်ပွဲကိုကန့်ကွက်ဆန္ဒပြဖို့တိုက်တွန်းနိူးဆော်ခဲ့ပါတယ်။
ယင်းမာပင်မြို့နယ်မှာလည်း “ရွှေဥက္ကံ” လူထုသပိတ်စစ်ကြောင်းမှ စကစက ပြုလုပ်သော အတုအယောင်ရွေးကောက်ပွဲကို ဆန့်ကျင်ကြောင်း လူထုသပိတ်လှုပ်ရှားမှု ပြုလုပ်ခဲ့ပါတယ်။
Public Service Announcement
ယင်းမာပင်မြို့နယ် ကျေးရွာတစ်ရွာမှာလည်း ပြည်သူ့အားမာန်သပိတ်စစ်ကြောင်းမှ အကြမ်းဖက်စစ်ကောင်စီက ပြုလုပ်မယ့် တရားမဝင်ရွေးကောက်ပွဲကို ပြည်သူတစ်ရပ်လုံး ဆန့်ကျင်ဖို့ “သင့်မဲဖြင့် တရားဝင် လူသတ်ခွင့်မပေးနဲ့” စာသားနဲ့ လှုံ့ဆော်ဆန္ဒပြခဲ့ပါတယ်။
ယင်းမာပင်မြို့နယ်မြောက်ခြမ်းမှာလည်း ကျေးရွာများ လူထုသပိတ်မှ တော်လှန် ကျောင်းသားမိဘပြည်သူတွေဟာ စစ်အုပ်စုက မကြာခင်မှာ ကျင်းပပြုလုပ်ဖို့ စီစဥ်နေတဲ့ တရားမဝင်အတုအယောင်ရွေးကောက်ပွဲကို အလိုမရှိဆန့်ကျင်ကြောင်း ဆန္ဒပြခဲ့ပါတယ်။
ကလေးမြို့နယ်မှာလည်း လူထုတိုက်ပွဲဦးဆောင်ကော်မတီက စစ်အုပ်စုရဲ့တရားမဝင် အတုအယောင် ရွေးကောက်ပွဲကို လူထုအားနဲ့ဆန့်ကျင်ကြဖို့အတွက် ကျောင်းသားပြည်သူတွေနဲ့ စကားဝိုင်းဖွဲ့ ဆွေးနွေးခဲ့ကြပါတယ်။
ဒါ့အပြင်စစ်တပ်စိုးမိုးတဲ့ဒေသတွေမှ ပြည်သူတွေအနေနဲ့လည်းအတုအယောင်ရွေးကောက်ပွဲကို အလုံခြုံဆုံး နည်းလမ်းတွေနဲ့ ဆန့်ကျင်ပေးကြဖို့ တိုက်တွန်းခဲ့ပါတယ်။
စစ်ကိုင်းတိုင်းအတွင်းမှာ စစ်တပ်ကစစ်ကြောင်းတွေထိုးနေတဲ့ကြားက စစ်အာဏာရှင်ဆန့်ကျင်ရေး ဆန္ဒပြသပိတ်တွေကို နေ့စဉ်ပြုလုပ်နေကြပါတယ်။
