စက်တင်ဘာ -၃ ၊၂၀၂၅ ၊ဆိုင်းမင်း/People’s Spring
မန္တလေးတိုင်း မြင်းခြံခရိုင်၊ နွားထိုးကြီးနယ်အနောက်ခြမ်းကကျေးရွာဘက်ကို စစ်ကောင်စီ တပ်စစ်ကြောင်း တကျော့ပြန် ပြန်ဝင်လာပြီးနောက် ရွာတွေကိုမီးရှို့နေတယ်လို့ ဒေသခံတွေကပြောပါတယ်။
အင်အား ၃၀၀ ခန့်ရှိတဲ့ စစ်ကောင်စီတပ် စစ်ကြောင်း ဟာ သြဂုတ်လ ၁၆ ရက်ကစတင်ပြီး နွားထိုးကြီးမြို့နယ်ထဲမှာ ဝင်မွှေခဲ့ပြီး ၉ ရက် အကြာ သြဂုတ် ၂၄ ရက်မှာပြန်လည်ထွက်ခွာသွားခဲ့တာပါ။
ဒါပေမယ့်ရက်ပိုင်းအကြာမှာပဲ သြဂုတ်လ ၃၁ ရက်မှာတော့ နွားထိုးကြီး အနောက်ခြမ်းက မာန်လည်ရွာကို စစ်ကြောင်းဝင်လာပြီး ရွာကို မီးတင်ရှို့ခဲ့တယ်လို့ သိရပါတယ်။
Public Service Announcement
စက်တင်ဘာလ ၂ ရက်မှာ တော့ မာန်လည်ရွာရဲ့ မြောက်ဘက် တစိုးရွာကို စစ်ကြောင်းထိုးပြီး ရွာကို မီးရှို့ခဲ့တယ်လို့ဒေသခံတွေက ဆိုပါတယ်။
စစ်ကြောင်းပြန်ထွက်သွားတဲ့အတွက် ရွာတွေဆီ ဒေသခံတွေက နေရပ်ပြန်လာပေမယ့် သိပ်မကြာခင်မှာ အခုလို စစ်ကြောင်းထိုးတာနဲ့ ထပ်ကြုံရတာပါ။
တစိုးကျေးရွာထဲရှိ နေအိမ်တွေက ပစ္စည်းတွေကို စိတ်ကြိုက် ယူဆောင်ပြီး မီးတင်ရှို့တာလို့ သိရပါတယ်။ စစ်ကောင်စီတပ်ရဲ့ စစ်ကြောင်းကြောင့် ကျေးရွာ ၁၀ ခန့်က ဒေသခံ ထောင်ဂဏန်း ထွက်ပြေးနေရပါတယ်။
နွားထိုးကြီးမြို့နယ်ထဲ စစ်ကြောင်းထိုးရာမှာ မြင်းခြံနယ်က သီတာယုမွန်ရဲ့ ပျုစောထီးတွေလည်း ပါဝင်တယ်လို့ သိရပါတယ်။
