အောက်တိုဘာ-၁၁၊၂၀၂၅။ဇေအောင်/ People’s Spring
စစ်ကိုင်းတိုင်း၊ ချောင်းဦးမြို့နယ်၊ ငလုံးတင်ကျေးရွာမှာ စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တာကြောင့် စစ်ရှောင်အဘွားအိုအပါအဝင် အမျိုးသမီး ၂ ဦး သေဆုံးခဲ့ပါတယ်။
အောက်တိုဘာ ၁၀ ရက် ည ၁၀ နာရီခန့်ကချောင်းဦးမြို့ပေါ် အထွေထွေအုပ်ချုပ်ရေးမှူးရုံးမှာ တပ်စွဲထားတဲ့ စစ်ကောင်စီတပ်က မြို့တောင်ဘက်က ရွာတွေကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တာဖြစ်ပါတယ် ။ အဲဒီပစ်ခတ်မှုကြောင့် ချောင်းဦးမြို့နယ်၊ ငလုံးတင်ကျေးရွာက နေအိမ်တလုံးပေါ် လက်နက်ကြီးတလုံး ကျရောက်ပေါက်ကွဲပြီး စစ်လာရှောင်တဲ့ အသက် ၆၀ ကျော်အရွယ်အဘွားအိုနဲ့ ၅၀ အရွယ် အမျိုးသမီးတို့ သေဆုံးကာ အသက် ၁၁ နှစ်အရွယ် ကလေးငယ် မိန်းကလေးတဦး ထိခိုက်ဒဏ်ရာ ရခဲ့တယ်လို့ ဒေသခံတွေက ပြောပါတယ်။
“မိန်းမနှစ်ယောက်။တစ်ယောက်ကယာကြီးတောကစစ်ရှောင်အဘွားအို။အိမ်ရှင်မိန်းမကဖြစ်ဖြစ်ချင်းဆုံးတာ။စစ်ရှောင်အမေကြီးကနောက်မှဆုံးတယ်။ကလေးကတော့ အခုဆေးရုံမယ်”လို့ချောင်းဦးဒေသခံ အမျိုးသားတဦးက ပြောပါတယ်။
Public Service Announcement
သီတင်းကျွတ်လပြည့်ညက စစ်တပ်ရဲ့ ဗုံးကြဲတိုက်ခိုက်မှုကြောင့် ထိခိုက်သူတွေဆေးကုသနေမယ်ထင်ပြီး စစ်တပ်က ချောင်းဦးတောင်ဘက်ကရွာတွေကို လက်နက်ကြီးနဲ့ ထပ်မံတိုက်ခိုက်နေတာဖြစ်တယ်လို့ချောင်းဦးဒေသခံတွေကပြောပါတယ်။
စစ်ကောင်စီတပ်ရဲ့ ပစ်ခတ်မှုတွေကြောင့် ကျေးရွာတချို့ တိမ်းရှောင်နေရကြောင်း ဒေသခံတွေက ပြောပါတယ်။
စစ်တပ်ဟာ သီတင်းကျွတ်လပြည့်ညကလည်း ချောင်းဦးမြို့နယ်၊ ဘုံတိုရွာမှာ ဆီမီးထွန်းနေချိန် ဗုံးကြဲတိုက်ခိုက်ခဲ့ပြီး ကလေးငယ်တွေအပါအဝင် ပြည်သူ ၂၀ ကျော် သေဆုံးကာ ၆၀ နီးပါး ဒဏ်ရာရခဲ့ပါတယ်။
