အောက်တိုဘာ-၁၂၊၂၀၂၅။တိုးနေဝင်း/People’s Spring
ပွဲငှားနဲ့ ရုပ်ရှင်ကားရိုက်ဖို့ ခေါ်တာတွေ မရှိတော့လို့ ထိုင်စောင့်နေရကြောင်းပြည်သူတွေကသပိတ်မှောက် (BC-boycott)ထားတဲ့ စစ်တပ်ထောက်ခံသူ ဟာသလူရွှင်တော် ဒိန်းဒေါင်ကပြောပါတယ်။
အာဏာသိမ်းကာလတလျှောက်လုံး စစ်ကောင်စီကိုထောက်ခံခဲ့ပြီး စစ်ကောင်စီရဲ့ ပွဲလမ်းသဘင်တွေ၊ ဝါဒဖြန့်ဖျော်ဖြေပွဲတော်တွေမှာ လုပ်ကိုင်ပေးခဲ့တဲ့ ဟာသလူရွှင်တော်ဒိန်းဒေါင်ဟာ ပွဲငှားရော ရုပ်ရှင်ဇာတ်ကားရိုက်ကူးမှုတွေပါ ခေါ်ယူတာတွေ မရှိတော့လို့ စောင့်မျှော်နေရကြောင်း NSS Youtube channel မှာ ဖြေဆိုထားတာတွေ့ရပါတယ်။
“ ပွဲငှားတွေနည်းသွားတယ်။ ဇာတ်ကားတွေလည်း မရိုက်ရဘူး။ ရင်ထဲကခံစားချက်လေးပေါ့။ တချို့တွေ ဒိန်းဒေါင်ပါတဲ့ ရုပ်ရှင်ကားကို ရုံတင်တဲ့အခါ လူလာမကြည့်ရင် မင်းတာဝန်ယူမလားဆိုတဲ့ ပရိုဂျူဆာ၊ ဒါရိုက်တာတွေလည်းရှိတယ်။ နံပါတ် ၁
Public Service Announcement
မရိုက်ရခြင်းအကြောင်းရင်းပေါ့။” လို့ ဒိန်းဒေါင်က ပြောပါတယ်။
ယခင်က စစ်ကောင်စီရဲ့ တိုင်းရုံးတွေ၊ ဌာနဆိုင်ရာတွေမှာ ၂၀၂၃ ခုနှစ်လောက်အထိ ဖျော်ဖြေခဲ့ရပေမယ့် ၂၀၂၄ ခုနှစ် ကစပြီး ဒီကနေ့အထိ ငှားရမ်းတာတွေ မရှိတော့ဘူးလို့ ဒိန်းဒေါင်က ငြီးတွားပါတယ်။မြဝတီရုပ်မြင်သံကြားမှာ တနှစ်တကြိမ်လောက်သာ ရိုက်ရပြီး မြန်မာ့ရုပ်မြင်သံကြားမှာတော့ တကြိမ်ပဲ ရိုက်ရသေးတယ်လို့လည်း သူကဆက်ပြောပါတယ်။
“ တဘက်ကမငှားရင်တဘက်ကတော့ငှားသင့်တယ်လေ သိတယ်မလား နှစ်ဖက်ထဲရှိတာကိုး အဲဒီတော့ ဟိုဘက်ကလည်းမငှားဘူး။ ဒီဘက်ကလည်းမငှားဘူး။ဟိုဘက်မှာလည်း မရိုက်ရဘူး။ ဒီဘက်မှာလည်း မရိုက်ရဘူး။ ကြားထဲက ငုတ်တုပ်မေ့တာပေါ့။” လို့ ဒိန်းဒေါင်က ပြောပါတယ်။
ဒါ့ကြောင့် ပွဲငှားနဲ့ ရုပ်ရှင်ကားရိုက်ဖို့ ခေါ်တာကို စောင့်နေရပြီး စစ်ကောင်စီအနေနဲ့လည်း အရင်ကလို တိုင်းပွဲတွေ၊ ဌာနဆိုင်ရာပွဲတွေမှာ ခေါ်ပေးဖို့ဆိုပြီး ဒိန်းဒေါင်က တောင်းဆိုထားပါတယ်။
စစ်တပ်က ရွေးကောက်ခံအရပ်သားအစိုးရကို လက်နက်အားကိုနဲ့ ဖြုတ်ချပြီး အဏာသိမ်းလိုက်တာကို ဆန့်ကျင်တဲ့ ပြည်သူတွေက စစ်တပ်ကိုထောက်ခံတဲ့၊ စစ်တပ်နဲ့ နီးစပ်တဲ့ လူပုဂ္ဂိုလ် ၊အဖွဲ့အစည်းတွေကို သပိတ်မှောက်တာ ၊လူမှုရေးပစ်ဒဏ်ခတ်တာတွေကို လုပ်ခဲ့ကြပါတယ် ။ပြည်သူတွေရဲ့ သပိတ်မှောက်တာ ၊လူမှုရေးပြစ်ဒဏ်ခတ်တဲ့အထဲ အနုပညာရှင်တွေလည်းပါဝင်ပါတယ်။
စစ်တပ်အာဏာသိမ်းကာလ ကြာရှည်လာတဲ့အခါ ပြည်သူတွေရဲ့ သပိတ်မှောက်တာ ၊လူမှုရေးပြစ်ဒဏ်ခတ်တာ အရင်ကနဲ့စာရင် လျော့နည်းလာပေမယ့် သပိတ်မှောက်တာ ၊လူမှုရေးပြစ်ဒဏ်ခတ်တာတွေဆက်လုပ်နေကြဆဲဖြစ်ပါတယ်။
