အောက်တိုဘာ-၁၂ ၊ ၂၀၂၅။ဇော်ဝင်း/People’s Spring
ကရင်နီပြည်နယ်၊ ဒီးမော့ဆိုမြို့တိုက်ပွဲအတွင်းမှာ ရှေ့တန်းစစ်မြေပြင်က ရဲဘော်တစ်ဦး ကျဆုံးခဲ့တယ်လို့ ကရင်နီပြည်ဝံပုလွေစစ်ကြောင်း(KNPDP)တပ်ရင်း-၃ က ဒီကနေ့ (အောက်တို ဘာ၁၂ရက်)မှာ ထုတ်ပြန်ပါတယ်။
ဒီမော့ဆိုမြို့ရှေ့တန်းစစ်မြေပြင်တနေရာမှာ စစ်ကောင်စီတပ်နဲ့ အပြန်အလှန်တိုက်ခိုက်ရင်း အောက်တိုဘာ ၉ ရက်က KNPDPရဲ့ တပ်ရင်းအမှတ်(၃)က ရဲဘော်ဂျေရုန်း (ခ)မာခို့ဒူမိကယ် ကျဆုံးခဲ့တာလို့ ဆိုပါတယ်။
“ ဒီးမော့ဆို -ဖရူဆို လမ်းပိုင်းနားက ခေါက်ပလော့ရွာမှာ ကျသွားတာလို့ သိရတယ်။အဲဒီမှာတော့ တိုက်ပွဲတွေက ဆက်တိုက်နီးပါးပါပဲ” လို့ ကရင်နီစစ်ရေး သတင်းရင်းမြစ်က လူထုနွေဦးကို ပြောပါတယ်။
Public Service Announcement
တာဝန်ထမ်းဆောင်တဲ့နေကစပြီး နောက်ဆုံးအချိန်ထိ ပေးအပ်တဲ့တာဝန်တွေကို ကျေပွန်ခဲ့တယ်လို့ ရဲဘော်ဂျေရုန်းနဲ့ပတ်သက်လို့ KNPDP က အသိပေးပါတယ်။
“ ဒီးမော့ဆိုမှာက စစ်ကြောင်းသုံးခုလောက်ခွဲထိုးနေတာ။မြို့ဘက်တခြမ်း နဲ့ မြို့ဘက်ကနေ ဒေါငံခါး ကုန်းသာဘက်စစ်ကြောင်း ၊ ဖရူဆို တစ်ဝိုက် စစ်ကြောင်းတစ်ကြောင်း ။တိုက်ပွဲက နေ့တိုင်းလိုလို ပုံမှန်ရှိတယ်” လို့ မြေပြင်ရဲဘော်တစ်ဦးက လူထုနွေဦးကို ပြောပါတယ်။
လက်ရှိ ဒီးမော့ဆိုမြို့နယ်က စစ်ကောင်စီတပ်ရဲ့ ထိုးစစ်မှာ ခြေလျင်၊ခြေမြန် တပ်တွေဖြစ်တဲ့ ခလရ(၉)၊(၁၀၂) နဲ့ ခမရ(၅၁၈)တပ်ရင်း သုံးခုကို သုံးထားတယ်လို့ အခုလဆန်းပိုင်းက KNDF ဆီခိုလှုံလာတဲ့ စစ်မှု ထမ်း တပ်သားက ထွက်ဆိုထားပါတယ်။
အဲဒါအပြင် ဒီးမော့ဆိုတိုက်ပွဲမှာ စစ်မှုထမ်းတပ်သားသစ်တွေအပြင် တပ်ကြပ်ကြီးအဆင့်ရှိသူတွေ သေဆုံးမှုများနေတယ်လို့လည်း သူက ဆိုပါတယ်။
စစ်ကောင်စီက သြဂုတ်လကစပြီး ဒီးမော့ဆိုမြို့ပေါ်ကို ထိန်းချုပ်ပြီးတဲ့နောက် ဒီးမော့ဆို-ဖရူဆို-ဘောလခဲ လမ်းမကြီးတလျှောက် စစ်ကြောင်းဆက်ထိုးနေတာဖြစ်ပါတယ်။
ဒါ့အပြင် ကရင်နီပြည်နယ်၊ဖရူဆို မြို့နယ် ပတ်ဝန်းကျင်ဒေသတွေကို စစ်ကောင်စီတပ်က သာလွန် အင်အား၊လက်နက်ကြီး၊လေကြောင်းတွေနဲ့ အပြင်းအထန် ထိုးစစ်ဆင်နေပါတယ်။
“ စစ်ရေးတင်မာနေတယ်။ထိတွေ့မှုတွေက နေ့တိုင်း အနည်းနဲ့အများ ပုံမှန်ဖြစ်နေတယ်” လို့ ကရင်နီအမျိုးသားများကာကွယ်ရေးတပ် KNDF တာဝန်ရှိသူက လူထုနွေဦးကို ပြောပါတယ်။
ဒီးမော့ဆို နဲ့ ဖရူဆို လမ်းမကြီးပေါ် တိုက်ပွဲမှာ စစ်ကောင်စီယာဥ်တန်းက စစ်ကားတစ်စီးဖျက်ဆီးနိုင်ခဲ့ပြီး အရာရှိအဖြစ် ယူဆရသူအချို့ သေဆုံးခဲ့တယ်လို့ KNDFက အောက်တိုဘာ ၆ ရက်က ထုတ်ပြန်ထားပါတယ်။
