ကျင့်ဝတ်နဲ့စည်းကမ်းချိုး​ဖောက်ခဲ့တဲ့ ရဲ​ဘော်​တွေကိုအ​ရေးယူမယ်လို့ စဥ့်ကူးမြို့နယ်အရေးပေါ် အုပ်ချုပ်ရေးအဖွဲ့ထုတ်ပြန်

■စည်းကမ်းချိုးဖောက်တဲ့စတားလင့်အင်တာနက်စက်ပိုင်ရှင်ကိုလည်းအ​ရေးယူမယ်လို့အသိပေး

■အချင်းများမှုမှာ နှစ်ဘက်စလုံးပူး​ပေါင်း​ဆောင်ရွက်မှုလိုအပ်ချက်ရှိခဲ့သလို၊ အားနည်းချက်တွေရှိခဲ့တယ်လို့ ပြည်သူအချို့​မှတ်ချက်ပြု

အောက်တိုဘာ-၁၂၊၂၀၂၅။မိုမို/People’s Spring

လူထုအပေါ် ဆက်ဆံပြုမှုရမယ့် စည်းကမ်းကျင့်ဝတ်တွေချိုးဖောက်ခဲ့တဲ့ရဲဘော်တွေကို ထိထိရောက်ရောက်သတိ​ပေး၊ အရေးယူမယ်လို့စဥ့်ကူးမြို့နယ် အရေးပေါ် အုပ်ချုပ်ရေးအဖွဲ့က ဒီကနေ့ ထုတ်ပြန်ပါတယ်။

ဒါ့အပြင် စည်းကမ်းချိုးဖောက်တဲ့ စတားလင့် အင်တာနက် စက်ပိုင်ရှင်ကိုလည်း ထုတ်ပြန်ချမှတ်ထားတဲ့စည်းမျဥ်းစည်းကမ်းတွေအတိုင်း အရေးယူမယ်လို့ ဆိုပါတယ်။

“ စတားလင့် စက်ပိုင်ရှင်ဘက်ကိုတော့ စည်းမျဥ်းစည်း ကမ်းချိုးဖောက်မှုနဲ့သက်ဆိုင်တဲ့ ကဏ္ဍကိုပဲ အရေးယူသွားဖို့ရှိပြီးတော့ ဗီဒီယို ဖိုင်ထဲက ဖြစ်စဥ် ပေါ် မှာတော့ သီး ခြားအရေးယူသွားဖို့ မရှိပါဘူး၊ရဲဘော်တွေကိုတော့ အရေးပေါ် အုပ်ချုပ်ရေးအဖွဲ့က သတ်မှတ်ထားတဲ့ စည်းမျည်း စည်းကမ်းတွေနဲ့ အရေးယူသွားမှာပါ” လို့ စဥ့်ကူးမြို့နယ်အရေးပေါ် အုပ်ချုပ်ရေးအဖွဲ့ အတွင်းရေးမှူးက ပြောပါတယ်။

“ လက်ရှိ မြို့နယ်ရဲ့ အုပ်ချုပ်ရေး ယန္တယားကလည်း ပြည်သူ့အုပ်ချုပ်ရေး ယန္တရား အ ပြည့်အဝ အ ကောင်အထည်ဖော်နိုင်သေးတာမဟုတ်ဘဲ စစ်ဘက် အရပ်ဘက် တွဲ အုပ်ချုပ်ရတဲ့အခါ တချို့ သော ကိစ္စ တွေမှာ စစ်ဘက်ဆိုင်ရာ စည်းကမ်းတွေ ကို တင်းတင်းကြပ်ကြပ်ကိုင်တွယ်တဲ့ကိစ္စလေးတွေမှာ လူထုနဲ့ မကြာခဏ ပွတ်တိုက်ပြဿနာတက်ရတာရှိပါတယ်။ဒီလိုမျိုးပြဿနာတွေ နည်းပါးသထက် နည်းပါးအောင် ကြိုးစားသွားပါမယ်၊ဒေသတွင်း မှာနေကြတဲ့ ပြည်သူလူထုဘက်ကလည်း အရေးပေါ် အုပ်ချုပ်ရေး က ထုတ် ပြန်တဲ့ စည်းမျဥ်းစည်းကမ်းကို တိတိကျကျ လိုက်နာပေးကြဖို့ “ သူက ဆက်ပြောပါတယ်။

မန္တလေးတိုင်း၊ စဉ့်ကူးမြို့နယ်မှာ အရေးပေါ်အုပ်ချုပ်ရေးအဖွဲ့က ရဲဘော်တွေနဲ့ ပြည်သူအချို့ ​ အချင်းများခဲ့တဲ့ဖြစ်စဉ် ဒီကနေ့ လူမှုကွန်ရက်ပေါ်ပျံ့နှံ့ခဲ့ပါတယ်။အောက်တိုဘာ ၁၁ ရက် နေ့လယ် ၁ နာရီဝန်းကျင်က သတင်းရရှိချက်အရ စဥ့်ကူးမြို့နယ် ကျေးရွာတစ်ရွာမှာ စည်းမျဉ်းစည်းကမ်းနဲ့ မညီဘဲ အသုံးပြုတဲ့ စတားလင့် အင်တာနက်ကို သိမ်းဆည်းဖို့ မြို့နယ်ပြည်သူ့လုံခြုံရေးအဖွဲ့ ပူးပေါင်းအင်အား ငါးဦးကသွားရောက်ခဲ့တယ်လို့ ဆိုပါတယ်။

ဒါပေမယ့်စတားလင့်အင်တာနက် ပိုင်ရှင်က တာဝန်ရှိသူ လာရောက်သိမ်းဆည်းမှ လက်ခံမယ်လို့ ပြန်လည်ပြောဆိုလို့ မွန်းလွဲ ၃ နာရီမှာအရေးပေါ်အုပ်ချုပ်ရေးအဖွဲ့ ဥက္ကဋ္ဌရဲ့ ညွှန်ကြားချက်နဲ့ တာဝန် ရှိသူတစ်ဦး၊ ပူးပေါင်းတပ်ဖွဲ့ဝင် ၁၂ ဦး ထပ်မံသွားရောက်ခဲ့ပါတယ် ။အဲလိုသွား​ရောက်စဥ်မှာ ရဲ​ဘော်​တွေနဲ့ ပြည်သူ​တွေ အချင်းများခဲ့ပြီး ၊ရုန်းရင်းဆန်ခတ်ဖြစ်ခဲ့တာကို ​အောက်တိုဘာ ၁၂ ရက်​နေ့မှာ လူမှုကွန်ရက်မှာ ပျံ့နှံ့နေတဲ့ ရုပ်သံဖိုင်မှာ​တွေ့ရပါတယ် ။

လေ့လာချက်အရ တာဝန်ကျရဲဘော်တွေအနေနဲ့ ကနဦး ကောင်းမွန်စွာရှင်းပြပြီး ပြဿနာမဖြစ်ပွားရေး ဦးတည်ဆောင်ရွက်ခဲ့တာ တွေ့ရတယ်လို့ စဥ့်ကူးမြို့နယ် အရေးပေါ် အုပ်ချုပ်ရေးအဖွဲ့က​ဖော်ပြထားပါတယ်။

ဒါပေမယ့် ဖြစ်စဥ်နောက်ပိုင်းမှာ ရဲဘော်တွေအနေနဲ့ ပြည်သူလူထုအပေါ် ပြုမှုဆက်ဆံရမယ့်စည်းကမ်းနဲ့ကျင့်ဝတ်ကို ချိုးဖောက်ပြီး စိတ်လိုက်မာန်ပါ တုံ့ပြန်ခဲ့တာကို စိတ်မကောင်းစွာ တွေ့ရတယ်လို့ အသိပေးပါတယ်။

ရုပ်သံဖိုင်မှာ စတားလင့်အင်တာနက်ကို ဆိုင်ဖွင့်ထားလို့ တားမြစ်ထားတဲ့ စည်ကမ်းချိုး​ဖောက်တယ်ဆိုပြီး အ​ရေးယူဖို့အိမ်ကိုလာ​ခေါ်တာမှာ ၊ပြည်သူ​တွေက စခန်းလိုက်ရမှာ​ကြောက်လို့မလိုက်ချင်​ကြောင်း၊ ပြစ်မှုကျူးလွန်ထားတာမရှိလို့ အကြမ်းမဖက်ဖို့ အနိုင်မကျင့်ဖို့​​ပြောတာကို​တွေ့ရပါတယ် ။ရဲ​ဘော်​တွေကလည်းအချင်းချင်းပြန်ထိန်းပြီး ရဲ​ဘော် ၂ ဦးကပဲ တာဝန်ရှိသူနဲ့စခန်းမှာရှင်းမယ်ဆိုပြီးထပ်ခါထပ်ခါ​ခေါ်သလို ၊အိမ်ရှင်ကလည်း ပြည်သူ​တွေက အကုန်လုံးကို​ကြောက်​နေရတယ်ဟု တစ်ဖက်နဲ့တဖက် မနားတမ်း​ပြောရင်းအချင်းများခဲ့တာကို​တွေ့ရပါတယ်။PDF တချို့လိုက်ပါလာကြ​ပေမယ့် စကားများကြချိန်မှာ ပါဝင်တာမ​တွေ့ရသလို ၊ရဲ​ဘော်​တွေက လက်နက်ထုတ်ပြတာမျိုးမ​တွေ့ရပါဘူး။

စစ်တပ်ကအရပ်သားပြည်သူ​တွေကိုပါ ဒီနှစ်ထဲမှာပစ်မှတ်ထားဗုံးကြဲသတ်ဖြတ်တာ​တွေပိုလုပ်လာပြီးတဲ့​နောက် ​တော်လှန်​ရေးထိန်းချုပ်​တွေမှာ အင်တာနက်အသုံးပြုခွင့်ကန့်သတ်​လေ့ရှိပါတယ်။စဥ့်ကူးမြို့နယ် အရေးပေါ် အုပ်ချုပ်ရေးအဖွဲ့ ကလည်းအလားတူကန့်သတ်ထားတယ်လို့သိရပါတယ်။

အထက်ပါ အချင်းများမှုရုပ်သံဖိုင် ပျံ့နှံခဲ့ပြီး​နောက် လူမှုကွန်ယက်မှုလည်း စစ်အာဏာရှင်ကို​တော်လှန်​နေတဲ့ PDF ​တွေက စစ်တပ်လို အာဏာပြတယ်ဆိုပြီး ​ဝေဖန်မှု​တွေရှိပါတယ်။ အလားတူ အချင်းများတဲ့ ပြည်သူ​တွေကိုလည်း စစ်တပ်ဆိုရင် အခုလို ​ဆက်ဆံမှာ မဟုတ်ပဲ PDF ​တွေ ၊လူငယ်ရဲ​ဘော်​တွေကိုကြ ​လေး​လေးစားစားမဆက်ဆံပဲ အကြမ်းဖက်ခံရတယ်၊အနိုင်ကျင့်ခံရတယ်ဆိုပြီး တစ်ခွန်းမခံရန်​တွေ့တယ်ဆိုပြီး ​ဝေဖန်မှု​တွေလည်းရှိပါတယ်။

“ ပြည်သူအိမ်ကိုဒီလိုမတရားဝင်ရောက်ဖမ်းဆီးအကြမ်းဖက်လို့ရတာလား” လို့အထက်ပါရုပ်သံမှတ်တမ်းကိုကြည့်ပြီး ပြည်သူတဦးကမှတ်ချက်ပြုပါတယ်။

“ အကြမ်းဖက်လို့ပြောရအောင်ကလက်နက်နဲ့ခြိမ်းခြောက်တာလား။သောင်းကျန်းတာလား။တကယ် အကြမ်းဖက် စကစ ဆိုရင်ဒီလိုတွေလက်ညိုးထိုးပြီး ပြန်ပြောနိုင်မှာတောင် မဟုတ်ဘူးနော်။ ပြည်သူ့ဘက်တော်သားတွေမို့ပါးစပ်နဲ့ပြောနေတာလို့ပဲ မြင်ပါတယ်” လို့ပြည်သူ တဦးကသူအမြင်ကို​​မှတ်ချက်ပြုပါတယ် ။

အခြားပြည်သူတဦးက” စစ်ရေးဆိုတဲ့ခေါင်းစဥ်နဲ့ Wifi ပိတ်ခိုင်းတာကို အခကြေးငွေနဲ့ လုပ်တာကို ညှိတာဖြစ်ပါမယ်၊ MDY PDF ကလည်း တာဝန်အရဆိုပြီး ဒေါသပါတာကတော့ ကြည့်မကောင်းပါ၊ ပြည်သူနဲ့ဆက်ဆံတာကို ပိုပြီးစကားပြောတတ်တဲ့သူကိုသုံးသင့် “ လို့မှတ်ချက်ပြုပါတယ်။

“ နှစ်ဖက်စလုံးမှားတယ်သေချာရှင်းကြရမှာလေ။ တစ်ဖက်ကလဲ(ပြည်သူ)ရှင်းပြတာလက်မခံ ဟိုကလည်း(​တော်လှန်​ရေးရဲ​ဘော်​တွေကလည်း) ဒေါသထွက်” လို့သူထင်မြင်ချက်ကို​ရေးပါတယ်။

စဥ့်ကူးမြို့နယ်တွင်းမှာ လုံခြုံရေးနဲ့တရားဥပဒေစိုးမိုးရေးဆောင်ရွက်တာတွေမှာ သတင်းပေါက်ကြားမှုတွေ​ရှိနေတဲ့အပြင် လေကြောင်းတိုက်ခံရမှုတွေ ခပ်စိပ်စိပ်ဖြစ်နေတာကြောင့် ၂၀၂၅ခုနှစ် မတ်လ ၁၆ ရက်ကစပြီး စတားလင့်အသုံးပြုမှုကို စည်းမျဥ်းစည်းကမ်းညွှန်ကြားချက်ထုတ်ပြန်ခဲ့တယ်လို့ သိရပါတယ်။

စဥ့်ကူးမြို့နယ်ကို စစ်ကောင်စီက ဆက်သွယ်ရေးလိုင်းတွေဖြတ်တောက်ထားတာကြောင့် ဒေသခံတွေအနေနဲ့စတားလင့်အင်တာနက်ကို အသုံးပြုနေရတာ ဖြစ်ပါတယ်။နယ်မြေလုံခြုံရေးကြောင့် အိမ်သုံးသီးသန့်ကိုပဲ ခွင့်ပြုပြီး လိုင်းခွဲအသုံးပြုတဲ့(Public Use)ကို အရေးပေါ်အုပ်ချုပ်ရေးအဖွဲ့က တားမြစ်ထားပါတယ်။

၂၀၂၄ ခုနှစ် နှစ်လယ်ပိုင်းကစပြီး တော်လှန်ရေးအဖွဲ့တွေ စိုးမိုးထားတဲ့ မိုးကုတ်-မန္တလေးလမ်းပိုင်းတလျှောက်က မတ္တရာ၊ စဥ့်ကူး၊ သပိတ်ကျင်းနယ်အတွင်းက နယ်မြေတွေကို စစ်တပ်က ပြန်လည်ထိန်းချုပ်နိုင်ဖို့ ကြိုးစားနေပါတယ်။ဒါအပြင် ​ကျောင်း​တွေ ၊ဘုန်ကြီး​ကျောင်း​တွေ ၊​ဈေး​တွေ ၊ဌာနဆိုင်ရာရုံး​တွေ စတဲ့ လူစည်ကား​လေ့ရှိတဲ့​နေရာ​တွေကိုပါ စစ်တပ်က ပစ်မှတ်ထားဗုံးကြဲတာ​ကြောင့် ၂၀၂၅ ခုနှစ်ထဲမှာပဲ စဥ်ကူးမြို့နယ်မှာ​သေဆုံးဒဏ်ရာရသူ ရာနဲ့ချီရှိ​နေပြီဖြစ်ပါတယ်။