အောက်တိုဘာ-၂၄၊ ၂၀၂၅။ ဟာနာဆန်/People’s Spring
မန္တလေးတိုင်း၊ ဝမ်းတွင်းမြို့နယ်မှာ စစ်ကောင်စီတပ်က အိမ်တွေပေါ်အထိ ပေါ်တာတက်ဆွဲနေပြီး လူငယ်တွေ ဖမ်းဆီးခံလိုက်ရကြောင်း မြို့ခံတွေက ပြောပါတယ်။
မနေ့က အောက်တိုဘာ ၂၃ ရက် မနက် ၁၁ နာရီခွဲခန့်က ဝမ်းတွင်းမြို့နယ်၊ အမြန်လမ်းအရှေ့ဘက်က ရွာတွေဖြစ်တဲ့ အင်းကုန်းရွာနဲ့ ကန်ပတ်လည်ရွာကို စစ်တပ်က အိမ်တွေပေါ်အထိ ပေါ်တာတက်ဆွဲလို့ ၄ ဦးထက်မနည်း ဖမ်းဆီးခံရပြီး ရွာသူရွာသားတွေ ထွက်ပြေးခဲ့ရကြောင်း Voice Of Wundwin အဖွဲ့က ပြောပါတယ်။
“အိမ်တွေပေါ်တက်ဆွဲနေတာကြာပြီ။ ပုံမှန်လိုဖြစ်နေပြီ။”လို့ Voice Of Wundwin အဖွဲ့ဝင်တဦးက ပြောပါတယ်။
Public Service Announcement
ညနေပိုင်းမှာလည်း ကျောင်းကုန်း၊ ရွာသစ်၊ ဆည်ရွာတွေကို စစ်တပ်က အိမ်စီးကားနဲ့ပတ်ပြီး ပေါ်တာဆွဲရာ ကျောင်းကုန်းရွာမှ ၂ဦးပါသွားကြောင်း Voice Of Wundwin အဖွဲ့က ပြောပါတယ်။
ဖမ်းဆီးခံလိုက်ရတဲ့အရေအတွက်ကိုတော့ အတိအကျ မသိရသေးပါဘူး။
စစ်ကောင်စီတပ်ဟာ ဝမ်းတွင်းမြို့နယ်မှာ လကုန်ရက်နဲ့ လဆန်းရက်တွေမှာ မကြာခဏ ပေါ်တာဆွဲလေ့ရှိပြီး လူငယ်တွေ အများအပြား ဖမ်းဆီးခံရလေ့ရှိကြောင်း ဒေသခံများက ပြောပါတယ်။
စစ်ကောင်စီတပ်ဟာ စစ်မှုထမ်း အပတ်စဥ် (၁၈)ကို စတင်နေပြီဖြစ်ပြီး အပတ်စဥ် (၁၉)အတွက် စုဆောင်းနေတာဖြစ်ကြောင်း သိရပါတယ်။
