အောက်တိုဘာ-၂၉၊၂၀၂၅။တာရာ/People’s Spring
စစ်ကိုင်းငလျင်ဒဏ်သင့်ဒေသတွေ ပြန်လည်ထူထောင်ရေးအတွက် ချေးငွေတွေကို စစ်ကောင်စီလက်အောက်ခံ ဗဟိုဘဏ်ကစတင်လျှောက်ထားနိုင်ပြီလို့ အသိပေးကြေညာထားပေမယ့်မြေပြင်တွင် လျှောက်ထားလို့မရသေးကြောင်း ဒေသခံတွေကပြောပါတယ်။
ကောင်စီစီရဲ့ဗဟိုဘဏ်ကအောက်တိုဘာ ၁၈ ရက်မှာငလျင်ဒဏ်သင့်ဒေသတွေအနေနဲ့ ပြန်လည်ထူထောင်ရေးအတွက် ချေးငွေများစတင်လျှောက်ထားနိုင်ပြီလို့ အသိပေးကြေညာထားတာဖြစ်ပါတယ်။
လက်တွေ့မှာတော့ ငလျင်ဒဏ်သင့်ဒေသတွေအနေနဲ့ ပြန်လည်ထူထောင်ရေးအတွက်ချေးငွေနဲ့ပတ်သက်ပြီး ပုဂ္ဂလိကဘဏ်တွေကို သွားရောက်ဆက်သွယ်ခဲ့ပေမယ့်လျှောက်ထားလို့ မရသေးဘူးလို့ စုံစမ်းသိရပါတယ်။
Public Service Announcement
“ဧရာဝတီဘဏ်ကို သွားမေးတယ်။ ချေးငွေနဲ့ပတ်သက်ပြီး ဘာမှမညွှန်ကြားထားဘူးလို့ပြောတယ်။ လျှောက်လို့ရပြီဆိုရင် ပြန်ပြောပေးမယ်လို့ ဘဏ်ဝန်ထမ်းကပြောတယ်” လို့ မန္တလေးမှ ဒေသခံတစ်ဦးကပြောပါတယ်။
ငလျင်ဒဏ်ခံခဲ့ရသည့်နယ်မြေဒေသများပြန်လည်ထူထောင်ရန်စစ်ကောင်စီက ထည့်ဝင်ပံ့ပိုးသော ရန်ပုံငွေဖြင့် (၃) နှစ်မှ (၅)နှစ်အထိ သက်တမ်းရှိ ချေးငွေတွေကို သက်သာသောအတိုးနှုန်းဖြင့် ထုတ်ချေးသွားမယ်လို့ ဆိုခဲ့တာပါ။
သတ်မှတ်ထားတဲ့အတိုးနှုန်းမှာနေအိမ်နဲ့အဆောက်အဦ ပြန်လည်တည်ဆောက်ရေးချေးငွေ (အတိုးနှုန်း ၃ ရာခိုင်နှုန်း) အသေးစား၊ အငယ်စား နှင့် အလတ်စားစီးပွားရေး (MSMEs) လုပ်ငန်းတွေအတွက် လုပ်ငန်းလည်ပတ်ရင်းနှီးငွေ၊ စက်ပစ္စည်း၊ ရေ၊ မီး၊ ဆိုလာနှင့် ရင်းနှီးမြှုပ်နှံမှုချေးငွေ (အတိုးနှုန်း ၅ ရာခိုင်နှုန်း) စက်ရုံလုပ်ငန်းကြီးများ ပြန်လည်ပြုပြင်ရေးနှင့် လည်ပတ်နိုင်ရေးချေးငွေ (အတိုးနှုန်း ၇ ရာခိုင်နှုန်း)နိုင်ငံပိုင်အခြေခံအဆောက်အအုံများ တာဝန်ယူတည်ဆောက် နေတဲ့ဆောက်လုပ်ရေးကုမ္ပဏီတွေအတွက် ယာယီချေး
ငွေ (အတိုးနှုန်း ၇ ရာခိုင်နှုန်း) ဖြစ်တယ်လို့ဆိုထားပါတယ်။
ဧရာဝတီဘဏ် ၊ UAB ဘဏ် ၊ CB ဘဏ် ၊ ဧရာဝတီတောင်သူလယ် သမားများဖွံ့ဖြိုးရေးဘဏ်၊ ရိုးမဘဏ်၊ ဆောက်လုပ်ရေးအိမ်ရာနှင့် အခြေခံအဆောက်အအုံဖွံ့ဖြိုး ရေးဘဏ်၊ မြန်မာနိုင်ငံသားများဘဏ်၊ ကမ္ဘောဇဘဏ်၊ မြဝတီဘဏ်၊ အင်းဝဘဏ်၊ Best Merchant Finance Co., Ltd နှင့် Zega Finance Co., Ltd တို့မှာ ပြန်လည်ထူထောင်ရေးအတွက် ချေးငွေတွေကို လျှောက်ထားနိုင်တယ်လို့ စစ်ကောင်စီက ဆိုခဲ့တာပါ။
“ချေးငွေကရဖို့မသေချာပါဘူး။ ဘာလို့ဆို သွားမေးတော့လည်း မသေချာမရေရာတွေပြောတယ်။ လျှောက်လို့ရတာလားမရတာလားမသိသေးဘူးအခုထိ။ မမျှော်လင့်တော့ပါဘူး” လို့ စစ်ကိုင်းမြို့မှာနေထိုင်သူတစ်ဦးကပြောပါတယ်။
၂၀၂၅ ခုနှစ်၊ မတ်လ ၂၈ ရက်မှာ လှုပ်ခတ်ခဲ့တဲ့ အင်အားပြင်း စစ်ကိုင်းငလျင်ကြီးကြောင့် စစ်ကောင်စီရုံးစိုက်ရာ နေပြည်တော်အပါအဝင်၊ မန္တလေးတိုင်း၊ စစ်ကိုင်းတိုင်း၊ မကွေးတိုင်း၊ ပဲခူး
တိုင်းနဲ့ ရှမ်းပြည်နယ် အရှေ့မြောက်ပိုင်းဒေသတွေမှာ ပြည်သူပေါင်းထောင်ချီသေဆုံးခဲ့ပါတယ်။ဒါအပြင်နေအိမ်တွေ ၊ စက်ရုံ အလုပ်ရုံတွေ၊ စီးပွားရေးလုပ်ငန်းတွေ ၊ရုံးတွေ ၊ဘာသာရေးအဆောက်အအုံတွေ အဆောက်အအုံပေါင်းထောင်ချီ ထိခိုက်၊ ပျက်စီးခဲ့တာဖြစ်ပါတယ်။ဒါကြောင့် မတ် ၂၈ ရက် စစ်ကိုင်းငလျင်ကြီးဟာ မြန်မာ့သမိုင်းတလျှောက် လူသေဆုံးမှုနဲ့ ပျက်စီဆုံးရှုံးမှု အများဆုံးမြေငလျင်ကြီးအဖြစ် မှတ်တမ်းဝင်ခဲ့ပါတယ်။
စစ်ကောင်စီက မြေငလျင်ကြီးလှုပ်ခတ်ပြီးအရေးပေါ် ကယ်ဆယ်ရေးအကူအညီကိုရော ၊ပြန်လည်ထူထောင်ရေးအတွက်ကိုရော ကောင်းကောင်းမလုပ်နိုင်ခဲ့ပါဘူး ။ အဆောက်အအုံတွေအောက်မှာပိတ်မိနေတဲ့ ပြည်သူတွေကို ကယ်တင်နိုင်ဖို့ အရေးပေါ်ကယ်ဆယ်ရေးအကူအညီပေးဖို့ နှောင့်နှေးခဲ့သလို ပြန်လည်ထူထောင်ရေးအတွက်လည်း အကူအညီမပေးနိုင်ခဲ့ပါဘူး ။စစ်ကောင်စီက နိုင်ငံတကာအကူအညီတွေ ဖိတ်ခေါ်ခဲ့ပေမယ့် နိုင်ငံပေါင်းများစွာက အရေးပေါ်ကယ်ဆယ်ရေးလာရောက်ကူညီခဲ့ပေမယ့် ပြန်လည်ထူထောင်ရေးအတွက်အကူအညီပေးတာတော့ နည်းပါးပါတယ်။
တချိန်တည်းမှာ စစ်တပ်က ငလျင်ဒဏ်ခံရတဲ့ စစ်ကိုင်း ၊မန္တလေးတိုင်းအပါအဝင် နိုင်ငံတစ်ဝန်းမှာ ငလျင်လှုပ်ပြီးနောက်ပိုင်းလေကြောင်းကနေ ဗုံးကြဲသတ်ဖြတ်မှုတွေပိုလုပ်လာတဲ့အတွက် ကလေးငယ်၊ အမျိုးသမီး နဲ့ သံဃာတော်တွေ အပါအဝင် သေဆုံးသူအရေအတွက်ပိုများလာခဲ့ပါတယ် ။
