အောက်တိုဘာ၂၈၊၂၀၂၅၊ရှိန်း/ People’s Spring
မန္တလေးတိုင်း၊မတ္တရာမြို့နယ်မှာတော်လှန်ရေးတပ်တွေ သိမ်းပိုက်ထိန်းချုပ်ထားတဲ့ စစ်ရေးအရအရေးပါတဲ့ လေကြောင်းရန်ကာကွယ်ရေးတပ်စခန်းနဲ့ ဆည်တော်ကြီး ရေလှောင်တာတမံကို စစ်အုပ်စုကပြန်ထိန်းချုပ်နိုင်ဖို့ စစ်ကြောင်းထိုးဖို့ ပြင်နေတယ် လို့ ဒေသခံ တွေဆီကစုံစမ်းသိရပါတယ်။
၁၀၂၇ စစ်ဆင်ရေး ဒုတိယပိုင်း အတူဖော်ဆောင်ခဲ့တဲ့ ရှမ်းမန်းစစ်ဆင်ရေးမှာ ပြည်သူ့ကာကွယ်ရေးတပ်မတော်-မန္တလေးနဲ့ မဟာမိတ်တပ်တွေက ၁၀၁၄ လေကြောင်းရန် ကာကွယ်ရေးတပ် (အင်ကြင်းမြိုင်)တပ်စခန်း ၊ဆည်တော်ကြီးစခန်းအခန်းအပါအဝင် စစ်ကောင်စီစခန်း ၄၀ ခန့်ကို သိမ်းပိုက်ပြီး မတ္တရာမြို့နယ်အရှေ့ခြမ်းကိုထိန်း
ချုပ်ခဲ့ပါတယ် ။ လေကြောင်းရန်ကာကွယ်ရေးတပ်ကို PDF တွေသိမ်းပိုက်ခဲ့တာမှာ လက်နက်ခဲယမ်းအများအပြားနဲ့ စစ်သုံ့ပန်းအများအပြားကိုဖမ်းဆီးနိုင်ခဲ့ပါတယ် ။
Public Service Announcement
ဒါပေမယ့် စစ်တပ်က ၂၀၂၅ နှစ်ဆန်းပိုင်းကစပြီး သင်တန်းဆင်းစစ်သားသစ်တွေ ၊စစ်တပ်လက်အောက်ခံပျူစောထီးတွေအပါအဝင် တပ်ဖွဲ့ဝင် အင်အားထောင်ချီသုံး ၊ အသေခံဒရုန်း၊လေကြောင်းနဲ့ လက်နက်ကြီးပစ်ကူ အများအပြားသုံးတန်ပြန်ထိုးစစ်ဆင်ခဲ့တာမှာ ဖယောင်းတောင်ရွှေလုပ်ကွက် ၊Alpha ဘိလပ်မြေစက်ရုံအပါ စခန်းအများအပြားကို PDF တွေပြန်စွန့်လွတ်ခဲ့ရပါတယ်။
အခုအခါ ကျန်နေတဲ့ စခန်းတွေထဲက လေကြောင်းရန်ကာကွယ် ရေးတပ်နဲ့ ဆည်တော်ကြီး ရေလှောင်တမံစခန်းတို့ကို စစ်တပ်ကပြန်ထိုးစစ်ဆင်ဖို့ ပြင်ဆင်နေတာပါ။ တန်ပြန်ထိုးစစ်ပြန်ဆင်ဖို့အတွက် စစ်တပ်က ကျွန်းပင်ရွာနဲ့ သဖန်းကိုင်းရွာတို့မှာ လက်ရှိ စစ်အင်အား ၃၀၀ ခန့်ရောက် နေတယ်လို့ ဒေသခံအချို့ကပြောပါတယ်။
“လေကြောင်း ရန်ကို ဝင်ဖို့က ၁၀၀ရာခိုင်နှုန်း သေချာသွားပြီဗျ။သူတို့ဘက်က စစ်ကြောင်းပေါင်း စုဖွဲ့ တာတွေ လုပ်နေတယ်”လို့ ဒေသခံတဦး ကပြောပါတယ်။
လက်ရှိစစ်တပ် ကတပ်စုဖွဲ့ထားတဲ့ ကျွန်းပင်နဲ့ သဖန်းကိုင်းရွာဟာ လေ ကြောင်းရန်ကာကွယ် ရေးတပ်နဲ့ အလွန်ဆုံး ၂မိုင်အကွာမှာရှိပြီး ကြားမှာကျေးရွာ၃ရွာလောက်ပဲ ရှိနေတာလို့ သိရပါတယ်။
ဒါ့အပြင် စစ်တပ်ကမတ္တရာမြို့နယ်အရှေ့ခြမ်းကို အခုရက်ပိုင်း ဗုံးကြဲမှုတွေပိုလုပ်နေပါတယ်။
အောက်တိုဘာလ၂၆ ရက်နေ့ကတော့ မတ္တရာမြို့နယ်အ ရှေ့ခြမ်းမှာ လေကြောင်းတိုက်ခိုက်ခံရပြီး ပြည်သူ ၄ဦး သေဆုံးကာ ၉ဦး ဒဏ်ရာ ရထားပါတယ်။
အောက်တိုဘာလ၂၂ ရက် နေ့ကလည်း ဆိပ်သာ ရွာအနီးတိုက်ပွဲဖြစ်ပွားခဲ့ပြီး စစ်တပ်က သေဆုံးဒဏ်ရာရ သူများခဲ့တယ်လို့ သိရပါတယ်။
