နိုဝင်ဘာ-၁၊၂၀၂၅။ People’s Spring
ရန်ကုန်မြို့အပါအဝင် စစ်တပ်ထိန်းချုပ်ထားတဲ့ဒေသအများစုမှာ ဒီကနေ့ညနေပိုင်းကစပြီး အင်တာနက်လိုင်းတွေ ပြတ်တောက်တာ ၊နှေးကွေးတာတွေ ဖြစ်နေတယ်လို့ ပြည်သူတွေကပြောပါတယ်။
ဒီနေ့ ညနေပိုင်းကစတင်ပြီး ရန်ကုန်မြို့ရဲ့ မြို့နယ်တိုင်းမှာ အင်တာနက် ပြတ်တောက်မှုတွေ ဖြစ်ပေါ်ခဲ့တာဖြစ်တယ်လို့ ဒေသခံတွေက ပြောပါတယ်။ ညနေ ၃ နာရီလောက်ကစတင်ပြတ်တောက်ခဲ့သလို ညပိုင်းအထိ သုံးလို့ အဆင်မပြေသေးဘူးလို့ ဒေသခံ တွေကပြောပါတယ်။
“ ဝိုင်ဖိုင်တွေက သုံးမရဘူး။ ဒေတာနဲ့က သုံးလို့တော့ရတယ်။ လိုင်းမကောင်းဘူး” လို့ ကမာရွတ်မြို့နယ်မှာနေထိုင်သူတစ်ဦးကပြောပါတယ်။
Public Service Announcement
Myanmar Boardband Telecom (MBT) ကုမ္ပဏီနဲ့ Chindwin Net ကုမ္ပဏီတွေကတော့ သူတို့ရဲ့ ပင်မဆက်ကြောင်း Error ကြောင့် ဒီနေ့နေ့လည်ကစတင်ပြီး အင်တာနက်လိုင်းမတည်ငြိမ်တာ ၊ မီးစိမ်းနေပေမယ့် အင်တာနက်မရရှိတာ ၊ လိုင်းမကောင်းတာတွေဖြစ်နိုင်တယ်လို့ အသိပေးထားပါတယ်။
အဲဒီ့ကုမ္ပဏီတွေက မကြာခင်အချိန်အတွင်း အမြန်ဆုံးပြင်ဆင်ဆောင်ရွက်မယ်လို့ စာထုတ်ပြန်ထားပေမယ့် ညပိုင်းအထိတော့လိုင်းတွေနှေးကွေး နေတယ်လို့ လှိုင်မြို့နယ်မှာနေထိုင်သူတစ်ဦးကပြောပါတယ်။
“ ဝိုင်ဖိုင်က ဘာမှကိုမပေါ်တာ။ဒေတာကရပေမယ့် နှေးတယ်” လို့ ဒေသခံတစ်ဦးက ည ၁၀ နာရီ ခွဲ လောက်မှာ ပြောပါတယ်။
မန္တလေးမြို့နဲ့ အနီးတဝိုက်မှာလည်း ဒီကနေ့ညနေပိုင်းကတည်းက ဖိုင်ဘာအင်တာနက်လိုင်းရော မိုဘိုင်းအင်တာနက်လိုင်းများပါ သုံးစွဲရတာအဆင်မပြေမှုတွေ ဖြစ်ပေါ်နေတယ်လို့ ဒေသခံတွေက ပြောပါတယ်။
“ လိုင်းက no internet access ခဏခဏဖြစ်တယ်။ ပြန်တက်လိုက်ကျလိုက်နဲ့လိုင်းလည်းမငြိမ် မီးကလည်းနီလိုက်ခဏနေရင်ပြန်စိမ်းသွားလိုက်နဲ့ဖြစ်နေတယ်။” လို့ အင်တာနက်သုံးစွဲသူတဦးက မှတ်ချက်ပြုထားပါတယ်။
ပြင်ဦးလွင်မြို့ ၊ကလေးမြို့ ၊ ဧရာဝတီတိုင်းကမြို့တွေအပါအဝင် ဒေသအနှံ့မှာလည်း ဒီကနေ့ အင်တာနက်လိုင်းတွေပြတ်တောက်တာ ၊ နှေးကွေးတာတွေဖြစ်နေတယ်လို့ ဒေသခံတွေက ပြောပါတယ်။
စစ်တပ်အာဏာသိမ်းပြီးနောက်ပိုင်း စစ်တပ်က မိုဘိုင်းအော်ပရေတာအားလုံးကို ထိန်းချုပ်လိုက်ပြီး အင်တာနက်ဖြတ်တောက်မှုကို ပိုမိုပြုလုပ်လာပါတယ် ။ စစ်တပ်ကကျင်းပမယ်ဆိုတဲ့ ရွေးကောက်ပွဲနားနီးလာချိန်မှာ ပြည်တွင်းအင်တာနက်လိုင်းတွေပြတ်တောက်လာတာဖြစ်ပါတယ်။ဒါအပြင် စစ်အုပ်စုက မြန်မာနိုင်ငံမှာ လူသုံးအများဆုံးလူမှုကွန်ယက်ဖြစ်တဲ့ ဖေစ်ဘွခ် မှာပြည်သူတွေ အသုံးပြုတာကို ပိုပြီးတင်းကြပ်လာပြီး လူမှုက့န်ယက်အသုံးပြုတာအကြောင်းပြုခြိမ်းခြောက်တာ ဖမ်းဆီးတာတွေ ပိုလုပ်နေပါတယ် ။
စစ်တပ်ရဲ့အင်တာနက်ဖြတ်တောက်မှာတွေကိုအချက်အလက်စုဆောင်းဖော်ပြပေးနေတဲ့
အသံအဖွဲ့ရဲ့ လေ့လာတွေ့ရှိချက်များအရ ၂၀၂၅ ခုနှစ်၊ စက်တင်ဘာလ(၃၀)ရက် အထိ မြန်မာတနိုင်ငံလုံးမှာ အင်တာနက်လိုင်း ဖုန်းလိုင်းစတဲ့ ဆက်သွယ်ရေးလိုင်းတွေဖြတ်တောက်ခံထားရတဲ့ မြို့နယ်ပေါင်း၁၃၂ ခုရှိတယ်လို့သိရပါတယ်။
