နိုဝင်ဘာ-၂၊၂၀၂၅။အိမ်သွင်/People’s Spring
စစ်ကိုင်းတိုင်း၊ ဗန်းမောက်မြို့နယ်မှာစစ်တပ်လက်အောက်ခံ ရှမ်းနီတပ်(SNA) တပ်ဖွဲ့ဝင်နှစ်ဦးက စစ်ဘေးရှောင်မသန်စွမ်းအမျိုးသမီးတစ်ဦးကို ဖမ်းဆီးပြီး တစ်ဦးက အဓမ္မပြုကျင့်ခဲ့လို့ အမှုမှန်ကို ပေါ်ပေါက်အောင်ဝိုင်းဝန်းကြိုးစားပေးဖို့ ဒေသခံတွေကတောင်းဆိုနေပါတယ်။
ဗန်းမောက်မြို့နယ်၊အလယ်ရွာကသီလရှင်ကျောင်းမှာမိခင်ဖြစ်သူနဲ့အတူ စစ်ဘေးရှောင်နေတဲ့ အမျိုးသမီးတစ်ဦးကို SNA တပ်သားနှစ်ဦးက အောက်တိုဘာလ၃၀ ရက်နေ့ညမှာ ဖမ်းဆီးသွားပြီး တစ်ဦးက အဓမ္မပြုကျင့်ခဲ့တာလို့ ဖြစ်စဥ်ကိုသိတဲ့ဒေသခံတစ်ဦးကပြောပါတယ်။
“ကလေးမလေးက အတက်ရောဂါရှိတယ်။ရှမ်းနီတပ်ဖွဲ့က ပြင်းထန်တဲ့ရာဇဝတ်မှုကျူးလွန်တာ”လို့အဲဒီဒေသခံကပြောပါတယ်။
Public Service Announcement
ကျူးလွန်သူဟာ SNAတပ်မဟာ(၆၁၄)ကဖြစ်ပြီး ကျူးလွန်ခံရသူက အသက် ၃၀ကျော်အရွယ် ဒေသခံ ကဒူးတိုင်းရင်းသူတစ်ဦးဖြစ်တယ်လို့သိရပါတယ်။ ပိုလိုယိုရောဂါကြောင့် ကိုယ်လက်အင်္ဂါမသန်စွမ်းသူလို့လည်းသိရပါတယ်။ဒီ မတရားမှုကိုဝိုင်းဝန်းဖော်ထုတ်ပေးဖို့နဲ့ အမှုမှန်ပေါ် ပေါက်အောင်ကြိုးစားပေးကြဖို့ ဒေသခံတွေကတောင်းဆိုနေပါတယ်။ ရှမ်းနီတပ်-SNA ဟာ စစ်တပ်အာဏာသိမ်းပြီးနောက်ပိုင်း စစ်တပ်နဲ့ပူးပေါင်းပြီး စစ်တပ်ဆီက လက်နက်ခဲယမ်းတွေရခဲ့သလို စစ်တပ်ကို ကူညီပြီး တော်လှန်ရေးတပ်တွေကိုတိုက်ခိုက်နေတဲ့ ပြည်သူ့စစ်လို လက်နက်ကိုင်အဖွဲ့ဖြစ်ပါတယ်။
အလယ်ရွာက ဗန်းမောက်မြို့အပြင်ဘက်ကရွာဖြစ်ပါတယ်။ မူလက ပြည်သူ့ကာကွယ်ရေးတပ်ဖွဲ့တွေထိန်းချုပ်ထားတဲ့ရွာဖြစ်ပြီး စစ်ကောင်စီနဲ့ SNA တပ်တွေ ပြန်ပြီးထိုးစစ်ဆင်လာလို့ စက်တင်ဘာလကုန်ပိုင်းမှာပြန်ဆုတ်ခဲ့ရတဲ့ရွာဖြစ်ပါတယ်။
ဗန်းမောက်မြို့သိမ်းတိုက်ပွဲမှာ ကဒူးလူငယ်တွေပါဝင်တဲ့PDFတွေလည်း ပါဝင်တိုက်ခိုက်ခဲ့ပြီးစစ်တပ်ဝါဖြန့် ဆိုရှယ်မီဒီယာတွေက ရှမ်းနီနဲ့ ကဒူးတိုင်းရင်းသားတွေကြား သွေးခွဲတဲ့ ရေသားမှုတွေနဲ့ လှုံ့ဆော်နေတာတွေ့ရပါတယ်။အခုဖြစ်စဥ်မှာလည်းရွာထဲကို SNA တပ်ဖွဲ့ဝင်တွေဝင်ရောက်လာချိန်မှာ ကျူးလွန်ခြင်းဖြစ်ပြီး ကျန်တဲ့ဒေသခံတွေလည်းစိုးရိမ်နေကြရတယ်လို့ သတင်းရရှိပါတယ်။
“စစ်ဘေးရှောင်တွေက အဆင်ပြေတဲ့နေရာမှာနေကြရတာ။တိုက်ပွဲတွေအပြင် အခုလို လူမဆန်တဲ့လုပ်ရပ်တွေကိုလည်းရင်ဆိုင်နေကြရတယ်။ ဘာပဲဖြစ်ဖြစ်ဒီအမှုကိုတရားမျှတမှုရချင်တယ်”လို့ဒေသခံတစ်ဦးကပြောပါတယ်။
စစ်တပ်နဲ့ SNAထိန်းချုပ်ထားတဲ့ ဗန်းမောက်မြို့ကို NUG ၊ကာကွယ်ရေးဝန်ကြီးဌာန၊အမှတ်(၁)စစ်ဒေသရဲ့ ကွပ်ကဲမှုနဲ့ PDFတွေနဲ့မဟာမိတ် တပ်ဖွဲ့တွေက စက်တင်ဘာလ၁၅ရက် နေ့မှာ မြို့သိမ်းတိုက်ပွဲဖော်ဆောင်ပြီးစက်တင်ဘာ ၂၁ ရက်မှာ မြို့နဲ့ ဘေးရွာတချို့ကိုထိန်းချုပ်ခဲ့ပါတယ်။
စက်တင်ဘာလနှောင်းပိုင်းမှာ စစ်တပ်နဲ့ SNAတပ်တွေက ပြန်ပြီးထိုးစစ်ဆင်လာလို့ အလယ်ရွာအပါအဝင် ရွာတချို့ကို ပြည်သူ့ကာကွယ်ရေးတပ်ဖွဲ့တွေကပြန်လည် လက်လွှတ်ခဲ့ရပါတယ်။ လက်ရှိမှာတိုက်ပွဲတွေဆက်လက်ဖြစ်ပွားနေဆဲဖြစ်ပြီး တော်လှန်ရေးတပ်တွေက ဗန်းမောက်မြို့ကို ထိန်းချုပ်ထားတယ်လို့သိရပါတယ်။
အဓမ္မပြုကျင့်သူကို SNAက ပြန်ဖမ်းထားတယ်လို့သတင်းရပေမယ့်အသေးစိတ်အတည်မပြုနိုင်သေးပါဘူး။ စစ်သားလိုအပ်ချက်များနေလို့ အရေးမယူဘဲပြန်လွှတ်မှာလို့ ဒေသခံတွေကယူဆနေပါတယ်။ ကျူးလွန်ခံရတဲ့အမျိုးသမီးနဲ့ပတ်သက်လို့ အခက်အခဲတွေကြားကန ကျန်းမာရေးဆိုင်ရာစောင့်ရှောက်မှုတွေ ပေးနေတယ်လို့ ဒေသခံတစ်ဦးကပြောပါတယ်။
SNAဟာ စစ်တပ် လက်အောက်ခံလက်နက်ကိုင်တပ်ဖွဲ့ဖြစ်ပါတယ်။ ဗန်းမောက်၊ ဟုမ္မလင်း၊တမူး၊ကလေးမြို့နယ်တွေအပါအဝင် စစ်ကိုင်းတိုင်းအထက်ပိုင်းနဲ့ကချင်ပြည်နယ်ကတိုက်ပွဲတွေမှာ စစ်ကောင်စီဘက်ကနေ ပါဝင်တိုက်ခိုက်နေပါတယ်။ SNAရဲ့ လုပ်ရပ်နဲ့ ရပ်တည်ချက်အပေါ် ရှမ်းနီတိုင်းရင်းသားတွေကဝေဖန်နေကြပါတယ်။
