နိုဝင်ဘာ-၃၊၂၀၂၅။အိမ်သွင်/People’s Spring
ရွှေဘို-မြစ်ကြီးနားလမ်းပေါ်မှာရှိတဲ့ကန့်ဘလူမြို့နယ်စံပယ်နံ့သာစစ်ဆေးရေးဂိတ်ကနေ ဖမ်း
ဆီးသွားတဲ့ သူတွေထဲက လူငယ်ဆယ်ဦးဟာ စစ်သင်တန်းကိုပို့ဆောင်စဉ် လမ်းခုလတ်ကနေ ထွက်ပြေးလွတ်မြောက်လာပါတယ်။
ပြီးခဲ့တဲ့အောက်တိုဘာလ တတိယပါတ်က စံပယ်နံ့သာစစ်ဆေးရေးဂိတ်မှာ ဖမ်းဆီးခံရသူတွေထဲက အသက်၂၀ကျော်အရွယ်လူငယ်၁၀ဦးကို ကန့်ဘလူ မြိုနယ် အမြောက်တပ်(၆၀၀၆) ကို ပို့ဆောင်စဉ်မှာ ထွက်ပြေးလို့မြောက်လာခဲ့တာလို့ ဒေသကာကွယ်ရေးရဲဘော်တစ်ဦးကပြောပါတယ်။
“အစောင့် စစ်…တွေကို တိုက်ခိုက်ပြီး ထွက်ပြေးလာတာ။PDF တွေနဲ့တွေ့တယ်။ လက်နက်တွေပါ ပါလာတယ်” လို့ ၎င်းကပြောပါတယ်။
Public Service Announcement
ထွက်ပြေးလာတဲ့လူငယ်တွေဟာ ကန့်ဘလူမြို့နယ်နဲ့ပတ်ဝန်းကျင်ဒေသကဖြစ်ပြီး ခရီးသွားစဉ်မှာ စံပယ်နံ့သာစစ်ဆေးရေးဂိတ်မှာ ဖမ်းဆီးခံရတဲ့သူတွေဖြစ်ပါတယ်။ စစ်သားတွေ နဲ့ ပျူစောထီးတွေ တပ်စွဲထားတဲ့ စံပယ်နံ့သာစစ်ဆေးရေးဂိတ်ဟာ ခရီးသွားပြည်သူတွေကိုဖမ်းဆီးတာမှာ နာမည်ဆိုးထွက်နေတဲ့ ဂိတ်စခန်းတစ်ခုဖြစ်ပါတယ်။
ပြီးခဲ့တဲ့အောက်တိုဘာလအတွင်းမှာတင် မိန်းကလေးငယ်တွေအပါအဝင် ခရီးသွားပြည်သူ
၈၀ ဦးထက်မနည်းကိုဖမ်းဆီးခဲ့တယ်လို့ ဒေသတွင်းတော်လှန်ရေးအင်အားစုတွေကထုတ်ပြန်ထားပါတယ်။
အောက်တိုဘာ ၁၆ ရက်ကလည်းကောလင်းမြို့နယ်၊ ကုက္ကိုကုန်းရွာကနေ တန့်ဆည်မြို့ကို သွားတဲ့ ဇနီးမောင်နှံနှစ်ဦးကို ဖမ်းဆီးပြီး အမျိးသမီးဖြစ်သူကို အဓမ္မပြုကျင့်သတ်ဖြတ်ခဲ့ပါတယ်။ ဒါအပြင် အမျိုးသားကတော့ နှိပ်စက်ခံထားရတဲ့ဒဏ်ရာဒဏ်ချက်တွေနဲ့ထွက်ပြေးလွတ်မြောက်လာခဲ့ပါတယ်။ ဒါ့အပြင် အောက်တိုဘာလအတွင်းမှာတင် ဖမ်းဆီးခံရတဲ့သူတွေထဲကမိန်းကလေးလေးဦးထက်မနည်း အဓမ္မပြုကျင့်ခံခဲ့ရတယ်လို့ဒေသခံတွေကပြောပါတယ်။
လူငယ်တွေအနေနဲ့ မဖြစ်မနေကိစ္စရှိမှသာ ခရီးသွားမဖို့နဲ့ တော်လှန်ရေးအင်အားစုတွေထိန်းချုပ်ထားတဲ့ ဒေသဘက်ကနေ သွားလာကြဖို့ ကန့်ဘလူ မြို့ခံတချို့ကသတိပေးပါတယ်။
ဒေသတွင်းကစစ်တပ်စစ်ကြောင်းတွေနဲ့ စစ်ရေးအခြေအနေတွေကိုသတိပေးနေတဲ့ ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ကလည်း ခရီးသွားပြည်သူတွေအနေနဲ့ စံပယ်နံ့သာစစ်ဆေးရေးဂိတ် အန္တရာယ်ကြီးမားတာကိုသိရှိဖို့လိုတယ်လို့ သတိပေးထားပါတယ်။
ရွှေဘို-မြစ်ကြီးနားလမ်းပိုင်းမှာတော်လှန်ရေးအင်အားစုတွေထိန်းချုပ်ထားတဲ့နေရာတွေရှိသလို စစ်ကောင်စီထိန်းချုပ်ထားတဲ့နေရာတွေလည်းရှိပါတယ်။ အဲဒီလမ်းရဲ့ စံပယ်နံ့သာဂိတ်အပါအဝင် ကန့်ဘလူမြို့နယ်ဖြတ်သွားတဲ့နေရာဟာ လုံခြုံရေးအခြေအနေတွေကြောင့် ပြည်သူ့ကာကွယ်ရေးတပ်ဖွဲ့တွေက ကားလမ်းဖြတ်သန်းခွင့်ပိတ်ပင်ပြီး ရှောင်ကွင်းလမ်းဖောက်လုပ်ပေးခဲ့ဖူးပါတယ်။
ဒါပေမယ့် ပြီးခဲ့တဲ့စက်တင်ဘာလမှာ ရှောင်ကွင်းလမ်းဘက်ကိုစစ်တပ်ကစစ်ကြောင်းထိုးပြီးပြန်လည်ထိန်းချုပ်ခဲ့ပါတယ်။ ရှောင်ကွင်းလမ်းကိုစစ်ကောင်စီကပြန်ပိတ်ထားပြီး လမ်းမကြီးပေါ်ကနေသာ ဖြတ်သန်းခွင့်ပြုနေသလို ခရီးသွားပြည်သူတွေကိုဖမ်းဆီးသတ်ဖြတ်တာတွေ၊ စစ်သားသစ်စုဆောင်းတာတွေ၊ အမျိုးသမီးတွေကို အဓမ္မပြုကျင့်တာတွေကျူးလွန်နေတယ်လို့ ဒေသခံတွေကသတိပေးနေကြပါတယ်။
