စတိတ်စင်ပေါ် ညစ်ညမ်းစကားတွေပြောပြီးဆဲခဲ့တဲ့ ရက်ပါကို စစ်တပ်ကဖမ်းတယ်လို့သတင်းထွက်​ပေါ်

နိုဝင်ဘာ ၃၊၂၀၂၅။တိုးနေဝင်း၊သတိုး/People’s Spring

စတိတ်စင်ပေါ်မှာ ညစ်ညမ်းစကားလုံးတွေပြောပြီးဆဲဆိုခဲ့တဲ့ ရက်ပါအဆိုတော်တစ်ဦးကို စစ်တပ်က ဖမ်းဆီးလိုက်တယ်လို့သတင်းထွက်​ပေါ်​နေပါတယ်။

နိုဝင်ဘာ ၁ ရက် နဲ့ ၂ ရက်နေ့က ရန်ကုန်မြို့၊ သုဝဏ္ဏမှာကျင်းပခဲ့တဲ့ Overflow Festival ဖျော်ဖြေပွဲမှာ စတိတ်စင်ပေါ်ကနေ ကွန်ဒုံးဝေရင်း ညစ်ညမ်းစကားလုံးတွေ ပြောဆိုခဲ့တဲ့ Wink Owens ဆိုတဲ့ ဂီတအဖွဲ့က ရက်ပါအဆိုတော်တစ်ဦးရဲ့ ရုပ်သံဖိုင် လူမှုကွန်ရက်မှာ တက်လာခဲ့ပြီးနောက် ဝေဖန်မှုတွေ မြင့်တက်လာခဲ့တယ်။ အဲဒီအဆိုတော်ကို စစ်တပ်က ဖမ်းဆီးလိုက်ပြီဖြစ်ကြောင်း အနုပညာအသိုင်းအဝိုင်းနဲ့ အဆို​တော်ရဲ့ဇာတိမြို့ကရင်းမြစ်အချို့က​ရေးသား​နေကြပါတယ်။

အဆိုပါ အဆိုတော်ဟာ မန္တလေးမြို့မှာနေထိုင်သူဖြစ်ပြီး သူ့ကို ဖမ်းဆီးဖို့အတွက် မန္တလေးမြို့က သာသနာသန့်ရှင်းရေး ဝိသောဓနီအဖွဲ့က မစိုးရိမ်ဖေးမလက်တွဲကူဆိုတဲ့ သံဃာတော်တပါးရဲ့ အကောင့်ကနေ လှုံဆော်ခဲ့ပါသေးတယ်။ အဲဒီ မစိုးရိမ်ဖေးမလက်တွဲအကောင့်ကနေ ဒီကနေ့ညမှာ ညတွင်းချင်း ဖမ်းဆီးနိုင်ခဲ့ကြောင်း Post တင်ခဲ့ပါတယ်။ အလားတူ မဘသ ဘုန်းကြီးအချို့ကလည်း ရုပ်သံဖိုင်နဲ့ တကွ ဖမ်းဆီးဖို့ တိုက်တွန်းတဲ့ပို့စ်​တွေ​ရေးသား ထားကြပါတယ်။

Public Service Announcement

စစ်တပ် ​အမာခံ​ထောက်ခံသူအဆိုတော် ယုန်လေးကလည်း “ ဖမ်းသွားပါပြီ။ မနောက်ဘူး ဖြစ်စေချင်လို့ မဟုတ်ဘူး ။ ဖြစ်နိုင်တာ ပြောပြတာ။ အဲ့လို အပြောအဆိုနဲ့ ရောက်သွားတာဆိုတော့ သူ့ ကို စင်ပေါ်မှာ သူပြော သလို သူ့ကို လုပ် ခံရနိုင်တယ်။ အထဲ မှာ ကွန်ဒုံးတော့ မရှိလောက်ဘူး ။ လူငယ်တစ်ယောက်ကို မလှောင်ပါဘူး။” လို့ သူ့ရဲ့ Facebook စာမျက်နှာကနေ အသိပေးပါတယ်။

ဒါ​ပေမယ့်အဆိုပါ အဆို​တော် အဖမ်းခံရခြင်း ဟုတ်၊မဟုတ်ကို People’s Spring ကသီးခြားအတည်မပြုနိုင်ပါဘူး။

အဲဒီ ရုပ်သံဖိုင်ပျံ့နှံ့ခဲ့ပြီးနောက် Wink Owensအဖွဲ့ရဲ့ လူမှုကွန်ယက်စာမျက်နှာကနေ
“ မနေ့ည Overflow မှာ ကျွန်တော့်ရဲ့ သီဆိုဖျော်ဖြေမှု့ကြောင့် မိဘပြည်သူများအပေါ်စိတ်အနှောက်အယှက်ဖြစ်စေခဲ့တဲ့အတွက် အနူးအညွတ်တောင်းပန်အပ်ပါတယ် ထပ်ပြီးနောက်နောင်မဖြစ်အောင် ဆင်ခြင်ပါ့မယ်လို့ ကတိပြုပါတယ်ခင်ဗျာ” လို့ တောင်းပန်ခဲ့ပါသေးတယ်။

Overflow Festival ဖျော်ဖြေပွဲ စာမျက်နှာကနေလည်း အဲဒီဖြစ်စဥ်နဲ့ပတ်သက်ပြီး တောင်းပန်ခဲ့ပြီး အဲဒီအဆိုတော် Wink နဲ့ Bkho Bain ကိုလက်တွဲဖြုတ်လိုက်​ကြောင်း အသိ​ပေးခဲ့ပါသေးတယ်။ “ ဒါဟာ ထင်မှတ်မထားဘဲ ဖြစ်ခဲ့တာဆိုပေမဲ့ လူမှုရေးအရ မသင့်တော်တဲ့စကားတွေ၊ အသုံးအနှုန်းတွေပါသလို ယဉ်ကျေးမှုအရလည်း ရုပ်ဆိုးအကျည်းတန်စေခဲ့တာကြောင့် ဒီလိုကိစ္စမျိုး နောက်နောင် ဘယ်တော့မှ ထပ်မဖြစ်အောင် သေချာ ကြပ်မတ် ဆောင်ရွက်သွားဖို့ ကတိပေးပါတယ်။” ရေးသားခဲ့ပါတယ်။

ဒါ​ပေမယ့် စစ်တပ်က ပြည်သူ​တွေကို ​တော်လှန်​ရေးအ​ပေါ် စိတ်မဝင်စား​အောင်အာရုံ​ပြောင်းတဲ့ လုပ်ရပ်​တွေ မကြာခဏလုပ်​လေ့ရှိတာ​ကြောင့် အခုဖြစ်ရပ်တစ်ခုလုံး ကြိုင်တင်စီစဥ်ထားတာဖြစ်နိုင်တယ်လို့ ပြည်သူအချို့က ​ပြောပါတယ်။ ဒါအပြင် အဆို​တော်ဟာမူးယစ်​ဆေး​သုံးထားလို့ အခုလိုဖြစ်တာလို့ပြည်သူအချို့က သုံးသပ်ပါတယ်။

အာဏာသိမ်းစစ်အုပ်စုက ပြီးခဲ့တဲ့သတင်းကျွတ် နဲ့ အခုတန်​ဆောင်တိုင်မှာ ရန်ကုန်မြို့အပါအဝင် စစ်တပ်ထိန်းချုပ်ထားတဲ့ မြို့​တွေမှာ ပွဲ​တွေ ၊ဘုရားပွဲ​တော်​​တွေ ၊​ဈေးပွဲ​တော်​တွေ လုပ်ခိုင်းပြီးနိုင်ငံဟာ​အေးချမ်း​နေသ​ယောင် ၊အ​ခြေအ​နေအားလုံးပုံမှန်ဖြစ်​နေသ​ယောင် ဝါဒဖြန့်ဖို့ ပွဲလမ်း​တွေကိုဖိအား​ပေးလုပ်ခိုင်း​နေတာဖြစ်ပါတယ်။ဒါ​ကြောင့်စစ်တပ်ထိန်းချုပ်ထားတဲ့ အနုပညာရှင်​တွေဟာလည်း ​စေခိုင်းတဲ့အတိုင်း ​ဒေသ​တွေခွဲပြီးသွား​ရောက်​ဖြေ​ဖျော်​ပေး​နေရတယ်လို့ ပြည်သူအချို့က​ပြောပါတယ် ။

အဆိုပါ Overflow ဖျော်ဖြေပွဲကို သပိတ်​မှောက် (Boycott)ကြဖို့ စစ်အုပ်စု နဲ့ စစ်တပ်နဲ့နွှယ်သူ​တွေကို သပိတ်​မှောက်ဖို့ ၊လူမှု​ရေးပြစ်ဒဏ်ခတ်ဖို့ တိုက်တွန်း​​ပေး​နေတဲ့ Fake News Check Community (Fncc) Burma က ပွဲမကျင်းပမီ ရက်ပိုင်းကတည်းက တိုက်တွန်းထားတာဖြစ်ပါတယ်။