နိုဝင်ဘာ-၉ ၊၂၀၂၅။မိုမို/People’s Spring
မကွေးတိုင်း၊ ပေါက်မြို့နယ်တောင်ပိုင်း စစ်ကြောင်းထိုးလာတဲ့ တပ်မ(၉၉)လက်အောက်ခံ ခမရ(၁၄) တပ်ရင်းရဲ့ တပ်သားတဦး လက်နက်နဲ့ အလင်းဝင်လာတယ်လို့ ပေါက်ပကဖက ဒီကနေ့ ထုတ်ပြန်ပါတယ်။
ခမရ(၁၄)တပ်ရင်းရဲ့ စစ်မှုထမ်းသင်တန်းဆင်း တပ်သားတဦးဟာ စစ်ကြောင်းအတွင်းကနေ ထွက်ပြေးလာတာလို့ ဆိုပါတယ်။
MA 1 တလက် ကျည်ခဲယမ်းတွေ ယူဆောင်လာတာလို့လည်း ဆိုပါတယ်။
Public Service Announcement
ဒါ့အပြင် နိုဝင်ဘာ ၁ ရက်ကလည်း အဲဒီစစ်ကြောင်းကထွက်ပြေးလာတဲ့ တပ်သား နှစ်ဦးကို ပေါက်မြို့နယ် ပကဖက ဖမ်းဆီးမိထားပါတယ်။
ပြည်သူထောက်ခံမှုမရှိတဲ့ စစ်ကောင်စီရဲ့လက်အောက်မှာမနေဘဲ သက်ဆိုင်ရာ တော်လှန်ရေးနယ်မြေခံတွေနဲ့ ချိတ်ဆက်ပြီး အလင်းဝင်ရောက်ကြဖို့လည်း ပေါက်ပကဖ က တိုက်တွန်းထားပါတယ်။
“ စစ်ကြောင်းက ပေါက်မြို့ နဲ့အနီးစပ်ဆုံးက ရွာတွေမှာ တဝက်လောက်ရှိနေသလို နောက်တဝက်လောက်က မြို့ထဲဝင်နေတယ်” လို့ ပေါက်မြို့ခံ စစ်ရေးသတင်းရင်းမြစ်က ပြောပါတယ်။
ဒေသအတွင်းစစ်ရေးလုပ်ဆောင်မှုတွေ အရှိန်မြင့်မယ့်အခြေအနေတွေကြောင့် ပြည်သူတွေအနေနဲ့ လေကြောင်းရန် အထူးသတိထားကြဖို့လည်း သတိပေးထားပါတယ်။
ဆိပ်ဖြူမြို့နယ် အမှတ်(၂၂)ကာကွယ်ရေးပစ္စည်းစက်ရုံ(ကပစ-၂၂)ကနေလာတဲ့ စစ်ကောင်စီတပ်စစ် ကြောင်းကို တော်လှန်ရေးတပ်တွေက နိုဝင်ဘာ ၅ ရက်နဲ့ ၆ ရက်က နှစ်ရက်ဆက် တိုက်ခိုက်မှုမှာ လက်နက်ခဲယမ်းတွေရရှိခဲ့တယ်လို့ သိရပါတယ်။
