G Fatt ပွဲစီစဥ်သူကိုပါ သပိတ်​မှောက်ကြဖို့မ​လေးရှား​ရောက်မြန်မာ​တွေ​တိုက်တွန်း

နိုဝင်ဘာ-၉၊၂၀၂၅။​ရောင်နီ/People’s Spring

စစ်တပ်အတွက်ဝါဒဖြန့်သီချင်း​တွေဆိုခဲ့တဲ့G Fatt ရဲ့ဖျော်ဖြေပွဲကို ဖျက်သိမ်းခြင်းမရှိဘဲ ဆက်လက်ကျင်းပဖို့ ပြုလုပ်နေတာကြောင့် ပွဲစီစဉ်သူကို သပိတ်​မှောက် Boycott ပြုလုပ်ဖို့ မလေးရှားရောက်ပြည်သူတွေကတောင်းဆိုလိုက်ပါတယ်။

G Fatt ရဲ့ ဖျော်ဖြေပွဲကို မလေးရှားနိုင်ငံ ကွာလာလမ်ပူမြို့က Sense 3 ဆိုင်မှာ ဒီက​နေ့ (နိုဝင်ဘာ ၉ ရက်) မှာ မ​​လေးရှားအချိန် ည ၁၀ နာရီ က​နေ မနက် ၅ နာရီအထိ Night Party ဆိုပြီးလုပ်ဖို့စီစဉ်ထားတာဖြစ်ပါတယ်။ G Fatt က ပြည်သူ့ဘက်ကနေ စစ်ကောင်စီဘက်ကို ​ပြောင်းလဲခဲ့ပြီး စစ်တပ်အတွက်ဝါဒဖြန့်သီချင်းဆို​ပေးခဲ့တာကြောင့် ပြည်သူတွေက ဒီပွဲကို Boycott ပြုလုပ််ဖို့တိုက်တွန်းခဲ့တာပါ။

မ​လေးရှားမှာ အခုလိုပွဲ​တွေ စီစဥ်တာ ၂ ဖွဲ့ရှိပါတယ်။ အခု​​လပိုင်းအတွင်းပွဲ​တွေပိုလုပ်လာသလိုG Fatt ပွဲကိုစီစဉ်တဲ့သူက စုစထက်မြက် အမည်နဲ့ ဖေ့စ်ဘွတ်ခ်အသုံးပြုသူကတော့ Boycott သတင်းတွေ ထွက်လာပြီးချိန်မှာ အကောင့်ကို လော့ ချထားတာတွေ့ရပါတယ်။ ဒါ​ပေမယ့် ပွဲကိုဆက်လက်ကျင်းပဖို့ ကိုဆက်လုပ်နေတယ်လို့ မ​လေးရှား​ရောက်မြန်မာ​တွေက​ပြောပါတယ်။

ဒီဖျော်ဖြေပွဲကိုကျင်းပသူတွေက မလေးရှားနိုင်ငံမှာ ၂၀၂၃ နှစ်ကုန်ပိုင်းကစတင်ပြီး ပြည်တွင်းက အဆိုတော် တွေနဲ့ ဖျော်ဖြေပွဲတွေ ပြုလုပ်ခဲ့တာလို့ မလေးရှားရောက် မြန်မာအချို့ကပြောပါတယ်။

ပွဲစီစဉ်သူ အမျိုးသမီးဟာ ကမ္ဘာ့ကပ်​ရောဂါ ကိုဗစ်ဖြစ်ပွားချိန်မှာ မြန်မာနိုင်ငံကိုပြန်ခဲ့ပြီး စစ်တပ်အာဏာသိမ်းစမှာ ဆန္ဒပြပွဲ​တွေမှာပါခဲ့တာကြောင့် ၅၀၅ နဲ့ အဖမ်းခံရဖူးပြီး ခံဝန်နဲ့ ပြန်လွတ်လာသူလို့ လူထုနွေဦးရဲ့ သတင်းရင်းမြစ်ကအတည်ပြုပေးပါတယ်။

“ သူတို့ကိုပြောရင် အဲ့၅၀၅လက်မှတ်ကြီးထုတ်ထုတ်ပြပြီး ဆဲတယ်။မိုက်မိုက်ရိုင်းရိုင်းကိုဆဲတာ။” လို့ မလေးရှားရောက်ပြည်သူတစ်ဦးကပြောပါတယ်။

ဒီလိုဖျော်ဖြေပွဲတွေ ပြုလုပ်နေတာဟာတော်လှန်ရေးအတွက် ထောက်ပို့လုပ်ဆောင်မှုတွေကို ထိခိုက်​အောင် ၊ လူငယ်​တွေကို အ​ပျော်အပါးမှာပဲအာရုံ​ရောက်​နေ​အောင် ၊စစ်တပ် လက်​အောက်ကအနုပညာရှင်နဲ့ စစ်တပ် ဝါဒဖြန့် အနုပညာရှင်​တွေကိုသာ ဆက်တိုက်​ခေါ်ပွဲလုပ်​နေတာလို့ မလေးရှားရောက်မြန်မာတွေက ​ပြောကြပါတယ်။ အရင်ကပွဲလုပ်တာ ကျဲ​ပေမယ့် ဒီလပိုင်းအတွင်းမှာ တစ်လကို နှစ်ပွဲ​လောက်အထိတိုးလုပ်လာတယ်လို့သူတို့ကဆက်​ပြောပါတယ်။

“ တလရ ကာလအတွင်း မလေးရှားမှာ အရင်ဆုံးပွဲဖြစ်သွားတာက လမင်းကဗျာပဲ သူနဲ့စီးပွါးပြိုင်ဘက်က စခေါ်တာပါ။အဲ့ကစပြီး သူ့ထက်ငါအပြိုင် ဘောမတွေ တစ်ယောက်ပြီး တစ်ယောက်ခေါ်ပြီး ပွဲလုပ်နေကြတာ။အခုက တော်တော်လွန်လာပြီ။ ” မလေးရှားရောက်ပြည်သူတစ်ဦးကပြောပါတယ်။

သူတို့စီစဥ်တဲ့ပွဲ​တေလမှာ လက်မှတ်ခ တစ်​ယောက်ကို မ​လေးရှားရင်းဂစ် ၇၀ ဆို​ပေမယ့် ခန်းမထဲ​ရောက်ရင် အရက်ပုလင်းမဝယ်ရင် စားပွဲဝိုင်းမရတာမို့ အရက် ၊ဘီယာ စတာ​တွေထပ်ဝယ​်သောက်ကြရတာမို့ ၁ ​ယောက်ကို ပွဲတကြိမ်သွားရင် ၁ ဦးကို ရင်းဂစ် ၅၀၀ ​လောက်အနည်းဆုံးကုန်တယ်လို့မ​လေးရှား​ရောက်မြန်မာ​တွေက​ပြောပါတယ်။

“ အရင်ကဆို စက်ရုံမှာ လတိုင်းထောက်ပို့အတွက်ကောက်ကြတာ။အခု​တော့ ​ထောက်ပို့အတွက်​ကောက်တာတွေတောင်မရှိသလောက်ဖြစ်နေပါပြီ။ လူငယ်တော်တော်များများက အဲ့ပွဲတွေ သွားဖို့ စဉ်းစားကြတာဆိုတော့” လို့ မ​လေးရှား​ရောက်မြန်မာတဦးကလည်း​ပြောပါတယ်။

မလေးရှားနိုင်ငံမှာ တရားမဝင်နေထိုင်သူတွေကိုတောင်ဖျော်ဖြေပွဲလာကြည့်လို့ရအောင် ပွဲစီစဉ်သူက အာမခံ ပေးတယ်လို့ ဆိုပါတယ်။ဒါ​ကြောင့်ပွဲစီစဥ်သူ​တွေဟာ စစ်​ကောင်စီရဲ့သံရုံးနဲ့ပါ နီးစပ်တယ်လို့ မ​လေးရှား​ရောက်မြန်မာ​တွေကသုံးသပ်ကြပါတယ်။

ဒီဖျော်ဖြေပွဲစီစဉ်သူတွေ ပွဲတွေ ဆက်တိုက်လုပ်နိုင်ဖို့အတွက် နောက်ကွယ်ကစေခိုင်းနေသူလည်းရှိတယ်လို့ မ​လေးရှား​ရောက်မြန်မာ ၁ ဦးက ​ပြောပါတယ်။

“ အဲ့လူက(ပွဲစီစဥ်သူကို​နောက်ကွယ်က ကူညီ​စေခိုင်း​နေသူ) စစ်တပ်အသိုင်းအဝိုင်းကလို့ပဲသိတယ်။ဘယ်သူလဲတော့ အတိအကျမသိဘူး” လို့ပြောပါတယ်။ ဒါ​ပေမယ့် ဒီအချက်အလက်အ​ပေါ် People’s Spring ကသီးခြားအတည်မပြုနိုင်​သေးပါပဲ ဆက်လက်စုံစမ်း​နေဆဲဖြစ်ပါတယ်။

G Fatt နဲ့ နိုဝင်ဘာ ၉ ရက်မှာပွဲလုပ်ပြီးရင် နိုဝင်ဘာ ၁၇ ရက်မှာ Joe Lay နဲ့ပွဲထက်လုပ်ဦးမှာဖြစ်ပြီး လူ ၁ ​ယောက်ကို ရင်းဂစ် ၇၀ လို့​ကြော်ငြာထားတာ​တွေ့ရပါတယ် ။

“ ရှေ့လ တစ်လထဲတင် ရဲရင့်အောင် တစ်ပွဲ ၊လွှမ်းပိုင်တစ်ပွဲ ၊ ရဲလေး ၊ အိမ့်ချစ် တစ်ပွဲ လုပ်ထားတာပါ။၂ ပါတ် ၃ပါတ်လောက်ခြားပြီး ဆက်တိုက်ခေါ်နေတာပါ ။အရှေ့က artist တွေခေါ်တာ တော့ ဘာမှမပြောလိုပေမဲ့ Gfatt ကတော့ boycott ရမဲ့စာရင်းထဲပါတယ်ထင်လို့ လာပြောပြတာပါ” လို့မ​လေးရှား​ရောက်မြန်မာတစ်ဦးက​ပြောပါတယ်။

G Fatt နဲ့ Floke Rose တို့က စစ်တပ်ဆီခံဝန်ထိုးပြန်ဝင်ပြီး သူတို့ ၂ ​ယောက်​ပေါင်းပြီ တနဂါ်​နွေည​နေမှ အ​လေ့ကျနွှမ်းပန်းများ” ဆိုပြီး ဝါဒဖြန့် သီချင်းသီဆိုခဲ့ကြပါတယ် ။​စစ်အာဏာရှင်ဆန့်ကျင်​ရေးလုပ်​နေသူ​တွေကို အထင်မှား​အောင် ၊စစ်တပ်ဆီမှာ အညံခံတာကပဲ အ​ကောင်းဆိုတဲ့ပုံစံဝါဒဖြန့်ထားတယ်ဆိုပြီး ​တော်လှန်​ရေးအင်အားစု​တွေကအပြင်းအထန်​ဝေဖန်ခဲ့ကြပါတယ်။ G Fatt ဟာပြည်တွင်းပြန်ဝင်ပြီး ယုံ​လေး ၊ပိုင်တခွန်တို့နဲ့အတူ ၂၀၂၃ စစ်တပ်​ရေကစားမဏ္ဍပ်ပွဲကိုစတက်ပြီး​နောက်ပိုင်း စစ်တပ်ပွဲ​တွေမကြာခဏတက်​နေခဲ့ပါတယ် ။ ဒါ​ကြောင့် ​တော်လှန်​ရေးအင်အားစု​တွေ နဲ့ တော်လှန်ပြည်သူ​တွေက G Fatt ကို သပိတ်​မှောက်ဖို့ ၊လူမှု​ရေးပြစ်ဒဏ်ခတ်ဖို့ တိုက်တွန်းခဲ့ကြတာဖြစ်ပါတယ်။

အခုလိုပွဲ​တွေလုပ်​နေ​ပေမယ့် တိုင်တဲ့သူမရှိတဲ့အတွက်မ​လေးရှားရဲက ဖမ်းဆီးတာမခံရဘူးလို့ မ​လေးရှား​ရောက်မြန်မာ​တွေက​ပြောပါတယ်။

“ အဲ့လိုပွဲကို တိုင်တဲ့သူမရှိဘူးလေ။အရင်က တိုင်လို့ ဖူးပွင့်ခိုင်နဲ့အေမီစျာန်တို့ ဖမ်းခံထိတယ်။အဲ့တိုင်တဲ့သူက ဘယ်သူလည်း​တော့မသိဘူး။ အသံထွက်လာတော့ ​တော်လှန်​ရေးလုပ်တဲ့သူတစ်ယောက်လို့ အသံထွက်​တော့ သူတို့(ပွဲလုပ်သူ​တွေ) က သတ်မယ်ဖြတ်မယ် ခြိမ်း​ခြောက်​သေးတယ်” လို့ မ​​လေးရှား​ရောက်မြန်မာတဦးက​ပြောပါတယ် ။

ပွဲစီစဥ်သူ​တွေက မ​လေးရှားရဲ​တွေကိုလည်း ​ငွေ​ပေးထားတာမို့ ပိုင်တယ်လို့သူကဆက်​ပြောပါတယ်။ ဒါ​ပေမယ့် အဲလိုပွဲ​တွေမှာ ​တော်လှန်​ရေး၊နိုင်ငံ​ရေးနဲ့ ပတ်သက်ပြီး ​အော်တာ ၊လုပ်တာမျိုးကိုခွင့်မပြုဘူးလို့စုံစမ်းသိရပါတယ်။

“ အထဲမှာ နိုင်ငံရေးနဲ့ပတ်သတ်တာတွေအော်မိရင် video တွေ ရိုက်ထားမိရင်လဲ အကုန်ဖြတ်ခိုင်းပါတယ်။Security တွေနဲ့ပွဲထဲဝင်လာပြီး ဖျက်ခိုင်းတာ” လို့ပွဲကို​ရောက်ခဲ့တဲ့မြန်မာတဦးက​ပြောပါတယ်။

G Fatt ပွဲနဲ့ပတ်သက်ပြီး စစ်တပ်​ဘက်တော်သားတွေကို ထိထိရောက်ရောက်သပိတ်​မှောက်ဖို့ နှိုးဆော်နေတဲ့Fake News Check Community(Fncc) Burma ကလည်း ပွဲစီစဉ်သူ အပါအဝင် ပါဝင်ပတ်သက်သူတွေကို သပိတ်မှောက်ကြဖို့ တိုက်တွန်းထားပါတယ်။

စုစထက်မြက်အကောင့်ပိုင်ရှင် အပါအဝင် မလေးရှားနိုင်ငံမှာ ဖျော်ဖြေပွဲတွေ ပြုလုပ်နေတဲ့ ဇေယျာဦး အကောင့်ပိုင်ရှင်ကိုလည်း Boycott ပြုလုပ်ဖို့ Fncc က တိုက်တွန်းထားပါတယ်။

“ Study In Malaysia က Organized လုပ်မဲ့Mint / Y3LLO နဲ့ ဘိလပ်ပြန်တို့ ပွဲပျက်သွားပြီဖြစ်ပါတယ်။Boycott လုပ်ရမဲ့ပွဲ နှစ်ပွဲမှာတစ်ပွဲ အောင်မြင်သွားပြီဖြစ်ပါတယ်။ကျောင်းသားလူငယ်တွေပဲ ရှိတဲ့ နေရာဖြစ်လို့ အဲဒီ နေရာက ပွဲက Boycott အောင်မြင်ခဲ့တာ ဖြစ်ပါတယ်။” လို့ Fncc က မလေးရှားမှာပြုလုပ်မယ့် ဖျော်ဖြေပွဲပျက်သွားတာကို အသိပေးထားပါတယ်။