နိုဝင်ဘာ-၉၊၂၀၂၅၊ရှိန်း/ People’s Spring
မန္တလေးတိုင်း၊ တောင်သာမြို့နယ်က တမိုက်သာ ကျေးရွာမှာ စစ်ကောင်စီတပ်နဲ့ပျူစောထီး တွေအထိုင်ချထားတဲ့စခန်းကို တော်လှန်ရေးတပ်တွေက ဝင်ရောက်တိုက်ခိုက်ခဲ့ရာ စစ်သား၅ဦး သေဆုံးပြီး ၈ဦးဒဏ်ရာရခဲ့တယ်လို့ မြင်းခြံခရိုင်တပ်ရင်း(၃)(တောင်သာ)က ပြောပါတယ်။
နိုဝင်ဘာ ၈ ရက်မှာ မြင်းခြံ- ပုဂံ- ညောင်ဦး ကားလမ်းပိုင်းက တမိုက်သာကျေးရွာကို ဝင်ရောက်တိုက်ခိုက်ခဲ့တာလို့ သိရပါတယ်။
အဲဒီကျေးရွာ အုပ်ချုပ်ရေးမှူးရဲ့ သုံးထပ်တိုက်မှာ စစ်ကောင်စီတပ်ရဲ့ ခမရ(၁၅)တပ်ရင်းကစစ်သားတွေနဲ့ မြင်းခြံမြို့ကပျူစောထီး အင်အား၆၀ လောက်တပ်စွဲထားတယ်လို့ တပ်ရင်း(၃)ဆီက သိရပါတယ်။
Public Service Announcement
“အဲဒီတိုက်မှာ ဘန်ကာတွေ ဘာတွေရော အကုန်ရှိတယ်။အဲတာကို ကျွန် တော်တို့က RPGနဲ့ပစ်ဖို့က ပစ်ကွင်းက မရှင်းဘူး။လက်ပစ်ဗုံးနဲ့ပဲ ပစ်ရတယ်။သိမ်းတော့မသိမ်းနိုင်လိုက်ဘူးအကုန်ရခဲ့လိုက်တယ်”လို့ တပ်ရင်း (၃) တာဝန်ရှိသူတဦးကပြောပါတယ်။
တိုက်ပွဲအတွင်းမှာ စစ်သား၅ဦး မျက်မြင်သေဆုံးပြီး မြင်းခြံဆေးရုံကို ပြင်းထန်ဒဏ်ရာရ ၅ဦးပို့ကာ ကြာပို့ကျေးရွာကို ဒဏ်ရာရ ၃ဦး ပို့ဆောင်ခဲ့တယ်လို့ သိရပါတယ်။
တမိုက်သာကျေးရွာဟာ ပျူစောထီး အားကောင်းတဲ့ရွာဖြစ်ပြီး ယခင်ကလည်း တော်လှန်ရေးတပ် တွေသိမ်းယူခဲ့ဘူးပါတယ်။
၂၀၂၅ ဧပြီအတွင်းမှာ စစ်တပ်ကအင်အားဖြည့်တင်းပြီး ဒီနေရာကို အထိုင်ချတပ်ဆွဲလိုက်တာလို့ သိရပါတယ်။
