နိုဝင်ဘာ-၁၁၊၂၀၂၅။သုည/People’s Spring
ကလေးမြို့လူထုတိုက်ပွဲဦးဆောင်ကော်မတီဟာ ပထမအကြိမ်လူထုတိုက်ပွဲညီလာခံကို အောက်တိုဘာ ၁၁လွတ်မြောက်နယ်မြေမှာ ကျင်းပပြုလုပ်ခဲ့ပြီး စစ်တပ်ရွေးကောက်ပွဲဟာနိုင်ငံရေးထောင်ချောက်ဖြစ်ကြောင်းအပါအဝင်အချက် ၅ ချက်ကို ချမှတ်ခဲ့ပါတယ်။
အဆိုပါညီလာခံကို ကလေးဒေသအတွင်းရှိ ရပ်ရွာအသီးသီးမှ ဒေသခံကိုယ်စားလှယ် စုစုပေါင်း (၁၂၀) ဦး တက်ရောက်ခဲ့ပြီး ကလေးမြို့လူထုတိုက်ပွဲဦးဆောင်ကော်မတီဖွဲ့စည်းပုံနဲ့ နိုင်ငံရေးရပ်တည်ချက်တို့ကို ချမှတ်ခဲ့တယ်လို့ဖော်ပြထားပါတယ်။
စစ်ကောင်စီဟာ ပြည်သူလူထုအပေါ် ခေတ်အဆက်ဆက် ကျူးလွန်ခဲ့သော စစ်ရာဇဝတ်မှုများကို ဖုံးကွယ်ပြီး နိုင်ငံတကာရဲ့ တရားဝင်မှုကို ရရှိရေးအတွက် ရွေးကောက်ပွဲ ကျင်းပနိုင်ဖို့ ကြိုးပမ်းမှုဟာ နိုင်ငံရေးထောင်ချောက်သာ ဖြစ်ကြောင်း ကလေးမြို့လူထုတိုက်ပွဲဦးဆောင်ကော်မတီက သတ်မှတ်ခဲ့ပါတယ်။
Public Service Announcement
စစ်တပ်က ပြည်သူလူထုအားအတင်းအဓ္ဓဖိအားပေးနေပြီး ပြည်သူတွေဟာအကြောက်တရားအောက်မှာ မိမိတို့သဘောဆန္ဒမပါပဲ ပါဝင်ပေးရမယ့်အခြေအနေလို့ဖော်ပြထားပါတယ်။
ဒါ့အပြင် တရားမျှတမှု၊ လွတ်လပ်မှု၊ ပွင့်လင်းမြင်သာမှု လုံးဝကင်းမဲ့တဲ့ စစ်ကောင်စီရဲ့ ရွေးကောက်ပွဲကို ပြည်သူတစ်ရပ်လုံးနဲ့အတူ အကြွင်းမဲ့ ဆန့်ကျင်တိုက်ဖျက်သွားမယ် ဖြစ်ကြောင်း ကတိပြုခဲ့ပါတယ်။
ကလေးမြို့လူထုတိုက်ပွဲဦးဆောင်ကော်မတီဟာ တိုင်းရင်းသားအဖွဲ့အစည်းတွေ၊ ပြည်တွင်းပြည်ပ တော်လှန်ရေးအင်အားစုတွေ၊ လူသားချင်းစာနာထောက်ထားမှုကူညီရေးအဖွဲ့အစည်းတွေ၊ စေတနာရှင်၊ ပရဟိတအဖွဲ့တွေနဲ့ ချိတ်ဆက်ကာ လက်တွေ့ကျကျ ပူးပေါင်းနိုင်ရေး ကြိုးပမ်းပြီး ညီနောင်အဖြစ် လက်တွဲလျက်ဆက်လက်ချီတက်သွားမည် ဖြစ်ကြောင်း ထုတ်ပြန်ကြေညာခဲ့ပါတယ်။
