နိုဝင်ဘာ-၁၄၊၂၀၂၅။တာရာ/People’s Spring
မန္တလေးတိုင်း၊မိုးကုတ်မြို့မှာအချိန်မရွေးလေကြောင်းတိုက်ခိုက်မှုနဲ့ တိုက်ပွဲ တွေဖြစ်ပေါ် လာနိုင်တဲ့အတွက် မြို့ခံတွေဟာကြိုတင် တိမ်းရှောင်မှုတွေရှိနေတယ်လို့ မိုးကုတ်ဒေသခံတွေက ပြောပါတယ်။
စစ်ကောင်စီနဲ့ တအာင်းတပ်မတော်(TNLA)တို့ အပစ်ရပ်စဲရေးလက်မှတ် ထိုးခဲ့ပေမယ့် ပြည်သူ့ကာကွယ်ရေးတပ်ဖွဲ့တွေကတော့ ကျန်ရှိနေဦးမယ်လို့ ဆိုပါတယ်။
ဒါ့ကြောင့် စစ်တပ်အနေနဲ့ အချိန်မရွေးလေကြောင်းတိုက်ခိုက်မှုတွေပြုလုပ်လာနိုင်တာကြောင့် မန္တလေးမြို့နဲ့ ရှမ်းပြည်နယ်(မြောက် ပိုင်း)ကို မြို့ခံတွေဟာ ရွှေ့ပြောင်းနေကြတာဖြစ်ပါတယ်။
Public Service Announcement
” အတော်များများပြောင်းရွှေ့နေကြပြီ။ မသိနိုင်ဘူးလေ။ ဘယ်ချိန်တိုက်ပွဲဖြစ်မလဲဆိုတာ။ လေကြောင်းကနေ ဗုံးကြဲချရင် ဘယ်သူမှပြေးမလွတ်ဘူး။ ကြိုရှောင်ထားတော့မမှားဘူးပေါ့” လို့ မိုးကုတ်ဒေသခံတစ်ဦးက ပြောပါတယ်။
နေရပ်စွန့်ခွာသူတွေများလာတာကြောင့် ယာဉ်စီးခမှာ တဦးကျပ်ခြောက်သိန်းကနေ ရှစ်သိန်းကျပ်အထိ မြင့်တက်လာတယ်လို့ သိရပါတယ်။
ဒါ့အပြင် မန္တလေးမြို့အဝင်မှာလည်း နေရပ်စွန့်ခွာလာတဲ့မိုးကုတ်ဒေသခံတွေကို စစ်တပ်က တင်းတင်းကြပ်ကြပ်စ်စစ်ဆေးနေတယ်လို့လည်း ဒေသခံတွေက ဆိုပါတယ်။
မိုးကုတ်မြို့ခံတွေဟာ စစ်ကောင်စီပြန်လည်ဝင်ရောက်လာမှာကို လက်မခံကြောင်းနဲ့ စစ်အာဏာရှင်အလိုမရှိကြောင်း ဖော်ထုတ်ပြသတဲ့အနေနဲ့ နိုဝင်ဘာ ၆ရက် ည ၈နာရီမှာ မြို့လုံးကျွတ် သံပုံးတီးဆန္ဒပြခဲ့ပါတယ်။
ဒီတော်လှန်ရေးဟာ လူထုတော်လှန်ရေးဖြစ်တာမို့ စစ်အာဏာရှင်စနစ် ဆက်လက်တည်ရှိနေသမျှ ကာလပတ်လုံး သံပုံးတီးလှုပ်ရှားမှု နည်းနာကို တနိုင်ငံလုံး စည်းလုံးညီညွတ်စွာနဲ့ အခွင့်အခါသင့်ရင် သင့်သလို အသုံးပြုပြီး ညီညွတ်စွာတော်လှန်ကြရမယ်လို့ General Strike Coordination Body – GSCBက ထုတ်ပြန်ထားသည်။
မိုးကုတ်မြို့ဟာ ၁၀၂၇ စစ်ဆင်ရေးနဲ့အတူ ၂၀၂၄ ဇူလိုင်မှာ တအာင်းအမျိုးသားလွတ်မြောက်ရေးတပ်မတော်(TNLA)နဲ့ PDF ပူးပေါင်းတပ်တွေ တိုက်ခိုက်သိမ်းပိုက်ပြီး ထိန်းချုပ်ခဲ့တဲ့မြို့ဖြစ်ပါတယ်။ မြို့အုပ်ချုပ်ရေးကို TNLAက ဦးဆောင်ခဲ့ပါတယ်။
ဒါပေမယ့် TNLAနဲ့ စစ်ကောင်စီ ကိုယ်စားလှယ်တွေ တရုတ်နိုင်ငံမှာအောက်တိုဘာလကုန် တွေ့ဆုံဆွေးနွေးပြီး မိုးကုတ်နဲ့ မိုးမိတ်မြို့ကို စစ်တပ်ဆီပြန်လွှဲပေးဖို့အပါအဝင် အပစ်အခတ်ရပ်စဲရေးအတွက် သဘောတူညီချက် လက်မှတ်ရေးထိုးခဲ့တယ်လို့TNLAက အောက်တိုဘာ၂၉ ရက်မှာ ထုတ်ပြန်ခဲ့ပါတယ်။တရုတ်နိုင်ငံရဲ့ ကြားဝင်စွက်ဖက်မှုနဲ့ နှစ်ဖက် ၉ ကြိမ်မြောက်တွေ့ဆုံမှုမှာသဘောတူခဲ့ကြတာပါ။
တရုတ်ရဲ့ကြားဝင်မှုကြောင့် စစ်ကောင်စီနဲ့ ဆွေးနွေးအပစ်ရပ်စဲခဲ့ရတဲ့ အခြေအနေကို TNLAက ထုတ်ပြန်ခဲ့ပြီး နာရီပိုင်းအကြာမှာပဲ ပြည်သူ့ကာကွယ်ရေးတပ်မတော်(မန္တလေး)-MDY PDFနဲ့ ပြည်သူ့ကာကွယ်ရေးတပ်မတော်(PDF) မိုးကုတ်ဗျူဟာ၊ မိုးကုတ်မြို့နယ်ပြည်သူ့ကာကွယ်ရေးအဖွဲ့(ပကဖ)၊ ပြင်ဦးလွင်မြို့နယ်ပြည်သူ့ကာကွယ်ရေးအဖွဲ့(ပကဖ)တို့က ထိန်းချုပ်နယ်မြေတွေ ကာကွယ်ဖို့ မိတ်ဖက်တော်လှန်ရေးအင်အားစုတွေနဲ့ လက်တွဲပြီး အစွမ်းကုန်လုပ်ဆောင်မယ်လို့ ကြေညာပါတယ်။
