နိုဝင်ဘာ-၁၅၊ ၂၀၂၅။ ရှိန်း/ People’s Spring
မန္တလေးတိုင်း၊ မတ္တရာမြို့နယ်က စစ်ဘေးရှောင်ပြည်သူတွေ လေကြောင်းတိုက်ခိုက်ခံရမှုကြောင့် လေးရက်အတွင်း ပြည်သူ ၃၀ခန့် သေဆုံးခဲ့တယ်လို့ ဒေသခံတွေက ပြောပါတယ်။
မတ္တရာမြို့နယ်အရှေ့ခြမ်းနဲ့ မြို့ရဲ့ မြောက်ဘက်က ကျေးရွာတွေကို အင်အား ၄,၀၀၀ ကျော်သုံးပြီး စစ်တပ်က ထိုးစစ်ဆင်နေတာမို့ ဒေသခံ သိန်းနဲ့ချီပြီး စဉ့်ကူးမြို့နယ်ဘက်ကို ထွက်ပြေးနေကြရတာလို့ သိရပါတယ်။
အဲဒီနောက် ဒီလနိုဝင်ဘာအတွင်းမှာ စစ်တပ်က ဆက်တိုက် စဉ့်ကူးမြို့နယ်အတွင်းက စစ်ရှောင်စခန်းတွေကို လေကြောင်းတိုက်ခိုက်နေတာကြောင့် ပြည်သူ သေဆုံးမှုတွေဆက်တိုက်ဖြစ်နေတာလို့ နယ်မြေခံတစ်ဦးက ပြောပါတယ်။
Public Service Announcement
“ ဒီနေ့ မနက်အထိ စဉ့်ကူးမြို့နယ်အတွင်းကို လေကြောင်းတိုက်တယ်။ စစ်ရှောင်တွေက သေမယ့်နေ့ကို ထိုင် စောင့်နေရသလိုပဲ” လို့ ဒေသခံတစ်ဦးက ပြောပါတယ်။
လူထုနွေဦးက ရရှိထားတဲ့ အချက်အလက်တွေအရ နိုဝင်ဘာ ၇ ရက်နဲ့ နိုဝင်ဘာ ၁၂ရက်တို့မှာ စဉ့်ကူးမြို့နယ်အတွင်း လေကြောင်းတိုက်ခံရမှုကြောင့် ကလေးငယ်တွေအပါအဝင် ပြည်သူ ၉ဦး သေဆုံးခဲ့ပါတယ်။ (သေဆုံးဒဏ်ရာရရှိသူတွေကို People’s Spring ရဲ့ တယ်လီဂရန်ချန်နယ်(https://t.me/PeopleSpring/90640)မှာ ကြည့်ရှုနိုင်ပါတယ်။
ဒါ့အပြင် ဒီရက်ပိုင်းမှာပဲ လမ်းဘေးမှာတင် စစ်ရှောင်နေတဲ့ပြည်သူတဦးလည်း အအေးမိ သေဆုံးခဲ့တယ်လို့ မတ္တရာမြို့နယ်က ကာကွယ်ရေးတပ်ဖွဲ့ ဝင်တွေက ပြောပါတယ်။
မတ္တရာမြို့နယ်မှာ စစ်ရှောင်ပြည်သူ သိန်းနဲ့ချီရှိနေပြီး ကျန်းမာရေး စောင့်ရှောက်မှုအပြင် စားနပ်ရိက္ခာနဲ့ အရေးပေါ်အကူအညီတွေများစွာ လိုအပ်နေတယ်လို့ သိရပါတယ်။
