နိုဝင်ဘာ – ၁၈ ၊၂၀၂၅ ၊ နိုင်ပကောင်း /People’s Spring
ရွှေကုက္ကိုလ်မြို့သစ်မှာ ရှိတဲ့ ကျားဖြန့် လုပ်ငန်းတွေကိုအပြီးတိုင်ဖယ်ရှားရှင်းလင်းမယ်လို့ ကရင့်နယ်ခြားစောင့်တပ် (BGF) က ကြွေးကြော်လာပြီးနောက် ကျားဖြန့်လုပ်ငန်းခွင်မှာလုပ်ကိုင်သူတွေ အလုံးအရင်းနဲ့ မနေ့ ( နိုဝင်ဘာလ ၁၇ရက်)ညတွင်းချင်းပင် နေရာရွေ့ပြောင်းကြပါတယ်။
ကျားဖြန့် လုပ်ငန်းတွေကို အခုရက်ပိုင်းအတွင်း အပြီးသတ် ဖယ်ရှားရှင်းလင်းမယ်လို့ BGF ရဲ့ ပြောရေးဆိုခွင့်ရှိသူ ဒုတိယဗိုလ်မှုးကြီး နိုင်မောင်ဇော်က မနေ့က ပြုလုပ်တဲ့ သတင်းစာရှင်းလင်းပွဲမှာ ပြောခဲ့တာပါ။
အဲဒီနောက် ညတွင်းချင်းမှာတင် ရွှေကုက္ကိုလ်မြို့သစ်ရှိ ကျားဖြန့် လုပ်ငန်း လုပ်ကိုင်သူတွေ အလုံးအရင်းနဲ့ နေရာရွှေ့ကြတာ လို့ ကရင်သတင်းရင်းမြစ်က ပြောပါတယ်။
Public Service Announcement
ရွှေကုက္ကိုလ်ဝန်းကျင်တဝိုက်မှာ ကျားဖြန့်လုပ်ငန်း လုပ်ကိုင်သူ လူဦးရေနှစ်ထောင်ဝန်းကျင်ရှိတယ်လို့ BGF ရဲ့ ပြောရေးဆိုခွင့်ရှိသူ ဒုတိယဗိုလ်မှုးကြီး နိုင်မောင်ဇော် ရဲ့ပြောကြားချက်အရသိရပါတယ်။
ကျားဖြန့်ကို နှိမ်နင်းမယ်လို့ ပြောပေမယ့် တဖက်မှာတော့ ကျားဖြန့်က တရုတ်နိုင်ငံသားတွေကို BGF အမှတ်(၂)စစ်ဒေသဌာနချုပ် သေ့ကတေစံပြကျေးရွာထဲ ရွှေ့ပြောင်းပေးနေတာရှိတယ်လို့ ကရင်သတင်းရင်းမြစ်က ပြောပါတယ်။
“ KK Park က အရေးကြီးတဲ့ တရုတ်နိုင်ငံသားတွေ သေ့ကတေမှာ ရောက်လာတယ်၊ တရုတ်သူဌေးတွေကို BGF က လုံခြုံရေးယူပေးရတယ်” လို့ အဲဒီ သတင်းရင်းမြစ်က ပြောပါတယ်။
နယ်ခြားသောင်ရင်းမြစ်ဘေးကKK Parkကျားဖြန့် ဝင်း ဖျက်ဆီးခံရပြီးနောက် အဲဒီကတရုတ်နိုင်ငံသားတွေဟာ ရွှေကုက္ကိုလ်မြို့ဘက်ဆီရွှေ့ပြောင်းခဲ့တယ်လို့ သတင်းထွက်ခဲ့ပါတယ်။
သေ့ကတေ စံပြကျေးရွာဟာ ကရင်နယ်ခြားစောင့်တပ်(BGF) အမှတ်(၂) စစ်ဒေသဌာနချုပ်ဖြစ်ပြီး ရွှေကုက္ကိုမြို့သစ်ရဲ့ အနောက်မြောက်ဘက် ဒေါနတောင်ခြေအရှေ့ဘက်ခြမ်းမှာ တည်ရှိတာဖြစ်ပါတယ်။
BGFအမှတ်(၂)စစ်ဒေသထိန်းချုပ်ထားတဲ့ သေ့ကတေစံပြေကျေးရွာဟာနယ်စပ်ကုန်သွယ်ရေးအတွက် အရေးပါတဲ့လမ်းကြောင်းတစ်ခုဖြစ်တဲ့ ဒေါနတောင်ပေါ်က ကြက်ဥတောင်ပေါ်လမ်းမှာ တည်ရှိတာပါ။
BGF အနေနဲ့တော့ ကျားဖြန့်တွေကို ” ဒါကို ရက်ပိုင်းအတွင်းမှာပဲ နောက်ထပ်ဆိုတာမရှိတော့ဘူး ၊ဒီတစ်ခါကိုအပြီးတိုင်ဖယ်ရှားရှင်းလင်းတော့မှာပေါ့ ” လို့ဒုတိယဗိုလ်မှုးကြီး နိုင်မောင်ဇော် ဆိုပါတယ်။
မနေ့ညက ရွှေကုက္ကိုလ်ကနေ နေရာရွေ့ပြောင်းတဲ့သူတွေဟာ ထိုင်းဘက်ခြမ်းကို ဝင်ရောက်သွားတာမရှိသေးသလို ထိုင်းစစ်တပ်ကလည်း နယ်စပ်ကို စောင့်ကြည့်ပြီး လုံခြုံရေးတင်းကျပ်ထားတယ်လို့ ထိုင်းနယ်စပ်သတင်းတွေမှာ ဖော်ပြပါတယ်။
စစ်ကောင်စီတပ် လက်အောက်ခံ BGF ခေါင်းဆောင်တစ်ဦးဖြစ်တဲ့ ဗိုလ်ချုပ် စောချစ်သူ တည်ထောင်ထားတဲ့ မြဝတီမြို့နယ် ထဲက ရွှေကုက္ကိုလ်မြို့သစ်ဟာ ကျားဖြန့် နာမည်ဆိုးနဲ့ ကျော်ကြားပါတယ်။
အမေရိကန်ကိုပစ်မှတ်ထား တဲ့အွန်လိုင်းငွေလိမ်မှုတွေကြောင့် စောချစ်သူကို အမေရိကန်အစိုးရက ဒဏ်ခတ်ပိတ်ဆို့အရေးထားပါတယ်။
ပြီးခဲ့တဲ့ ရက်ပိုင်းမှာတော့ ကျားဖြန့် တွေကို နှိမ်နင်းဖို့အတွက် အထူးတပ်ဖွဲ့ကို အမေရိကန် က ဖွဲ့စည်းလိုက်တာပါ။
အဲဒီနောက်မှာတော့ BGF က ကျားဖြန့် ကို အပြီးပြတ် ရှင်းလင်းမယ်လို့ ကြေညာ လာတာပဲဖြစ်ပါတယ်။
