နိုဝင်ဘာ-၁၈၊ ၂၀၂၅။ ပုရစ်/People’s Spring
ကရင်အမျိုးသားအစည်းအရုံး(KNU) ဗဟိုရဲ့ ရပ်တည်ချက်နဲ့အညီ စစ်ကောင်စီရဲ့ ရွေးကောက်ပွဲကိုထိန်းချုပ်နယ်မြေအတွင်း ခွင့်ပြုမည်မဟုတ်ဘဲ ဆန့်ကျင်သွားမယ်လို့ KNU ဒူးသထူခရိုင်(သထုံခရိုင်)က ဒီကနေ့ နိုဝင်ဘာ ၁၈ရက်မှာ ကြေညာချက်ထုတ်ပြန်ပါတယ်။
KNUဗဟိုက စစ်အာဏာရှင်သက်ဆိုးရှည်ရေး အတွက် ကြိုးပမ်းနေတဲ့ ရွေးကောက်ပွဲကို လက်မခံကြောင်း အသိပေးထုတ်ပြန်ထားတဲ့အပေါ် ခရိုင်အသီးသီးကလည်း အခုလိုကြေညာချက် တွေ ထုတ်ပြန်ပြီး သဘောထား ဖော်ပြလျက်ရှိရာ ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ(၁)နယ်မြေ KNU သထုံခရိုင်ကလည်း ဒီကနေ့မှာ သဘောထား ဖော်ပြလာတာပါ။
အခု စစ်တပ်ကြိုးပမ်းနေတဲ့ ရွေးကောက်ပွဲဟာ လူထုအား လိမ်လည်လှည့်ဖြားမယ့် အတုအယောင်ရွေးကောက်ပွဲဖြစ်တာကြောင့် ခွင့်ပြုမှာမဟုတ်ဘူးလို့ အသိပေးပါတယ်။
Public Service Announcement
ပြည်သူလူထုတွေအနေနဲ့လည်း စစ်အာဏာရှင် သက်ဆိုးရှည်မယ့် အတုအယောင် ရွေးကောက်ပွဲမှာပူးပေါင်းပါဝင်ခြင်းမပြုဘဲ အကြမ်းမဖက် သောနည်းနဲ့ ဆန့်ကျင်ခြင်းဖြင့် မိမိတို့ရဲ့ဆန္ဒမဲအား အလွဲသုံးစားပြုခွင့်မပေးဖို့ KNU သထုံခရိုင်က တိုက်တွန်းထားပါတယ်။
စစ်တပ်ရဲ့ ရွေးကောက်ပွဲဟာ ပြည်သူလူထု နားလည်ရန် ခက်ခဲတဲ့ ရှုပ်ထွေးတဲ့ ရွေးကောက်ပွဲစနစ်ဖြစ်တယ်လို့ ဖော်ပြပါတယ်။ ဒါ့အပြင် စစ်တပ် လိုအပ်တဲ့ အဖြေထုတ်နိုင်တဲ့ အီလက်ထရောနစ် မဲပေးတဲ့ မဲပေးခြင်း လုပ်ငန်းစဉ်ဟာ တိကျမှန်ကန်မယ့် ရလဒ်မဟုတ်ဘူးလို့ ဆိုပါတယ်။
မဲဆန္ဒရှင်ပြည်သူလူထုရဲ့ ဆန္ဒသဘော ထားကိုအလွဲသုံးစားပြုတာဖြစ်လို့ စစ်တပ်အလိုကျ လုပ်တဲ့ အတုအယောင်ရွေး ကောက်ပွဲသာ ဖြစ်ကြောင်း ပေါ်လွင်နေတယ်လို့လည်း KNU သထုံခရိုင်က ထုတ်ပြန်ပါတယ်။
KNU ခရိုင်အသီးသီးဟာ စစ်တပ်ရွေးကောက်ပွဲကို လက်မခံကြောင်း သဘောထား ထုတ်ပြန်ထားသလို စစ်အုပ်စုရဲ့ ရွေးကောက်ပွဲ ဆန့်ကျင်ရေး ဆွေးနွေးပွဲတွေ ကျင်းပပြီး ပြည်သူလူထု အသိပညာပေလျက်ရှိပါတယ်။
KNU ဒူးပလာယာခရိုင်က ကျင်းပတဲ့ အစိုးရတု၊ ရွေးကောက်ပွဲတုနဲ့ နိုင်ငံရေးလှည့်စားမှု ထောင်ချောက် စကားဝိုင်းဆွေးနွေးပွဲကို KNU ဗဟိုက နိုဝင်ဘာ ၁၆ရက်မှာ ထုတ်ပြန်ခဲ့ရာ အာဏာသိမ်းစစ်ကောင်စီ ကြိုးပမ်းနေတဲ့ ရွေးကောက်ပွဲကတဆင့် စစ်အုပ်စု အသွင်ပြောင်း အစိုးရ ပုံစံဖြစ်ပေါ်လာရင် ပြည်သူလူထုကို လတ်တလော သတ်ဖြတ်နေတာတွေထက် ပိုမိုတဲ့ လုပ်ရပ်တွေ လုပ်ဆောင်ခွင့်ပေးသလို ဖြစ်စေမယ်လို့ ပါဝင်ဆွေးနွေးသူတွေက ပြောကြားပါတယ်။
စစ်အုပ်စုဟာ ပြည်သူလူထုအပေါ် လုပ်ဆောင်နေတဲ့ အကြမ်းဖက်လုပ်ရပ်တွေ သိသာထင်ရှားနေတာကို ရွေးကောက်ပွဲ ကျင်းပပြီး ဖုံးကွယ်ဖို့ လုပ်ဆောင်တာ ဖြစ်တယ်လို့ KNU ဒူးပလာယာခရိုင်ဝင်းရေးမြို့နယ် တွဲဖက်အတွင်းရေးမှူး ပဒိုစောဆော့လော်အဲ့က ဆွေးနွေးပြောကြားခဲ့ပါတယ်။
