နိုဝင်ဘာ ၁၈၊ ၂၀၂၅။ ပုရစ်/People’s Spring
အာဏာသိမ်းစစ်ကောင်စီက အဓမ္မစစ်သားစုဆောင်းထားတဲ့ တပ်သားသစ် ၃ဦး အလင်းဝင်လာကြောင်း ကရင်အမျိုးသားအစည်းအရုံး(KNU)က နိုဝင်ဘာ ၁၈ရက်မှာ သတင်းထုတ်ပြန်ပါတယ်။
KNU ညောင်လေးပင်ခရိုင်(ခလယ်လွီထူခရိုင်) မုန်းမြို့နယ်(မူးမြို့နယ်)အခြေစိုက် ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၃) တပ်ရင်း(၈)ဆီကို စစ်ကောင်စီရဲ့ ခမရ(၅၈၁)တပ်ရင်းက တပ်သားသစ် ၃ဦး အလင်းဝင်လာတာလို့ ဖော်ပြထားပါတယ်။
တပ်သားသစ်သုံးဦး အလင်းဝင်လာတဲ့ နေ့ရက်ကိုတော့ ဖော်ပြမထားပါဘူး။
Public Service Announcement
အလင်းဝင်လာတဲ့ စစ်ကောင်စီတပ်သားတွေက အသက် ၂၅နှစ်အရွယ် တပ်သားမောင်သန့်ဇင်ထွန်း၊ အသက် ၂၃နှစ်အရွယ် တပ်သားကျော်ဇင်ထွန်းနဲ့ အသက် ၂၄နှစ်အရွယ် တပ်သားပြည့်စုံထွန်းတို့ဖြစ်ပြီး သူတို့ဟာ ဆန္ဒမပါဘဲ စစ်တပ်က အဓမ္မ စစ်မှုထမ်းခိုင်းစေခံခဲ့ရတဲ့ တပ်သားသစ်တွေ ဖြစ်တယ်လို့ ဆိုပါတယ်။
ပြီးခဲ့တဲ့ အောက်တိုဘာ ၁၅ ရက်ကလည်း ခလရ(၇၅)တပ်ရင်းက စစ်ကောင်စီတပ်သား ၇ဦးဟာ KNLA တပ်မဟာ(၃) တပ်ရင်း(၉)ဆီကို အလင်းဝင်ရောက်ခဲ့ပါတယ်။ အဲဒီတပ်သား ၇ဦးအနက် ၅ဦးဟာ စစ်ကောင်စီတပ် အဓမ္မ စစ်သားစုဆောင်းထားတဲ့ ပြည်သူ့ စစ်မှုထမ်း သင်တန်းသားတွေဖြစ်ပြီး ၂ဦးကတော့ ရောင်းစားခံရပြီး ပြည်သူ့စစ်မှုထမ်းဘ၀ ရောက်လာရသူ ဖြစ်တယ်လို့ KNU ညောင်လေးပင်ခရိုင်က ထုတ်ပြန်ထားပါတယ်။
စစ်ကောင်စီရဲ့ အတင်းအဓမ္မ စစ်မှုထမ်းစေခိုင်းခံရတဲ့ တပ်သားတွေအနေနဲ့ KNUနဲ့ နီးစပ်ရာ တော်လှန်ရေးတပ်ဖွဲ့တွေဆီ လက်နက်ချ အလင်းဝင်ဖို့လည်း KNUက ထပ်မံ တိုက်တွန်းထားပါတယ်။
