နိုဝင်ဘာ-၂၀ ၊၂၀၂၅။ဆိုင်းမင်း၊နေ့သစ်/People’s Spring
လာမယ့်ဒီဇင်ဘာလကုန်ပိုင်းမှာပြုလုပ်မယ့် စစ်ကောင်စီ ရဲ့ ရွေးကောက်ပွဲအတွက် တက္ကသိုလ် ကျောင်းသူ၊ကျောင်းသားတွေ ကြိုတင်မဲပေးကြဖို့ မန္တလေးမြို့က ရပ်ကွက်တွေမှာ အုပ်ချုပ်ရေးပိုင်းကဖိအားပေးနေတယ်လို့ ဒေသခံတွေကပြောပါတယ်။
ရပ်ကွက်တွေမှာ ကြိုတင်မဲပေးကြဖို့ ကားနဲ့လိုက်လံသတိပေးကြေညာတာမျိုး၊ အောက်ခြေအဆင့် အုပ်ချုပ်ရေးပိုင်းဖြစ်တဲ့ ဆယ်အိမ်မှုး ၊ရာအိမ်မှုး တွေကနေတဆင့် ပြောဆိုတာတွေ ပြုလုပ်နေတာပါ။
“ ကားနဲ့ ညနေဆိုရင်လိုက်အော်ပြီ၊ ကျောင်းသားရှိတဲ့အိမ်ဆိုရင် အိမ်ထိရောက်လာပြီး ကြိုတင်မဲပေးဖို့လာပြောသွားတာ”လို့ မဟာအောင်မြေမြို့နယ်မှာ နေထိုင်သူတစ်ဦးကပြောပါတယ်။
Public Service Announcement
ကြိုတင်မဲကို ရပ်ကွက်ရုံး၊ဓမ္မာရုံတွေမှာ ပေးရမှာလို့သိရပါတယ်။
ရွေးကောက်ပွဲကျင်းပမယ့် လာမယ့် ဒီဇင်ဘာ ၂၈ ရက်မှာ တက္ကသိုလ်တွေ ဖွင့်နေပြီဖြစ်ပြီး ကျောင်းသူ၊ကျောင်းသားတွေ ကျောင်းတက်နေရမှာဖြစ်သလို ၊မဲဆန္ဒနယ်ပြင်ပကတက္ကသိုလ်တွေမှာသွားတက်နေကြမယ့်အချိန်လည်းဖြစ်နေတယ်လို့ စစ်ကောင်စီရဲ့ ရွေးကောက်ပွဲကော်မရှင်ကဆိုထားပါတယ်။
ဒါကြောင့် မဲပေးခွင့်မဆုံးရှုံးရအောင်ဆိုတဲ့အကြောင်းပြချက်နဲ့ အသက် ၁၈ နှစ်ပြည့်ပြီးတဲ့ တက္ကသိုလ် ကျောင်းသား ၊ကျောင်းသူတွေအနေနဲ့ လက်ရှိနိုဝင်ဘာလ ၁၇ ရက်ကနေ ၂၁ ရက်အတွင်း ကြိုတင်မဲပေးသွားကြဖို့ စစ်ကောင်စီရဲ့ရွေးကောက်ပွဲကော်မရှင်က ဆော်သြထားတာပါ။
ကြိုတင်မဲမပေးရင်တက္ကသိုလ်၊ကောလိပ်ကျောင်းအပ်လက်မခံဘူးလို့ သတင်းတွေလည်းထွက်ပေါ်နေပါတယ်။ ဒီသတင်းတွေကို People’s Spring က အတည်ပြုနိုင်ဖို့ကြိုးစားနေပါတယ်။
ဒါအပြင်ဧရာဝတီတိုင်းကမြို့နယ်တွေမှာလည်း အာဏာသိမ်းစစ်အုပ်စုက အသက် ၁၈ ပြည့်ပြီးမှတ်ပုံတင်မရှိ၊ မဲစာရင်းမှာ နာမည် နဲ့ နံပါတ်မပါရင် စာမေးပွဲ ဖြေခွင့်မရှိဘူးလို့ဖိအားပေးနေတယ်လို့ ကျောင်းသားနဲ့ မိဘ အချို့ကပြောပါတယ်။
ဒါကြောင့် မှတ်ပုံတင်မရှိသေးတဲ့ကျောင်းသားတွဟာ မဲစာရင်းမှာ အမည်ပါဖို့ အသဲအသန်လိုက်လုပ်နေကြရတယ်လို့သူတို့ကပြောပါတယ်။မဲစာရင်းမှာ အမည်မပါရင် အိမ်ထောင်စုစာရင်းနဲ့ မှတ်ပုံတင်မိတ္တူ တွေကို စစ်တပ်ခန့်အုပ်ချုပ်ရေးမှူးတွေထံပေးပို့ပြီးလုပ်ရတယ်လို့သိရပါတယ်။
“ ဧရာဝတီတိုင်းတစ်တိုင်းလုံးက ကျောင်းသားတွေ အခုလို မဖြစ်မနေမဲပေးဖို့ အကြပ်ကိုင်ခံရတယ်လို့ထင်ပါတယ်” လို့ကျောင်းသားတဦးကပြောပါတယ်၊
အာဏာသိမ်းစစ်တပ်က လာမယ့်ဒီဇင်ဘာလ ၂၈ ရက်မှာရွေး ကောက်ပွဲ အပိုင်း (၁) အဖြစ် မြို့နယ် ၁၀၂ ခုမှာ ကျင်းပမယ်လို့ဆိုပါတယ်။
အဲဒီနောက် ၂၀၂၆ ခုနှစ် ဇန်နဝါရီလအတွင်း ကျန်တဲ့ရွေးကောက်ပွဲ အပိုင်း (၂) နဲ့ အပိုင်း (၃) ကိုဆက်တိုက်ကျင်းပမှာဖြစ်ပါတယ်။
