နိုဝင်ဘာ-၂၂၊၂၀၂၅။ဇေအောင်/People’s Spring
စစ်ကိုင်းတိုင်း၊ မုံရွာမြို့မှာစစ်အုပ်စုကစျေးရောင်းပွဲနဲ့ ဖျော်ဖြေပွဲတွေထပ်လုပ်ဖို့ စီစဥ်နေပြီး ပေါ်တာဆွဲနိုင်လို့လူငယ်တွေသတိပြုသွားလာကြဖို့ တော်လှန်ရေးအင်အားစုတွေက သတိပေးထားပါတယ်။
လာမယ့်နိုဝင်ဘာ ၂၈ ရက်ကနေဒီဇင်ဘာ ၂ ရက်အထိ ၅ ရက်တိုင် မုံရွာမြို့က ပြည်သူ့ဥယျာဥ်မှာ စစ်ကောင်စီက စျေးရောင်းပွဲတော်လုပ်ပြီး စတိတ်ရှိုးပါထည့်ဖို့စီစဥ်နေကြောင်းမြို့ခံတွေကပြောပါတယ်။
စတိတ်ရှိုးပွဲမှာတော့ နန်းခင်ဇေယျာ၊ လမင်းကဗျာတို့နဲ့အတူ တခြားနာမည်မရသေးတဲ့ သရုပ်ဆောင် အဆိုတော်သစ်တွေလည်းပါဝင်မယ်လို့ဆိုပါတယ်။
Public Service Announcement
စစ်ကောင်စီဟာ ရွေးကောက်ပွဲနီးလာလို့ တိုင်းပြည်အေးချမ်းသယောင် ပွဲလမ်းသဘင်တွေလုပ်ပြနေတာဖြစ်ပြီး ပေါ်တာဆွဲတာတွေပါ ခံရနိုင်တယ်လို့ တော်လှန်ရေးအင်အားစုတွေက ပြောပါတယ်။
“ အခုချိန် မုံရွာမြို့ပေါ်က ရပ်ကွက်တွေမှာ ပေါ်တာဆွဲမှုတွေက ဆက်လက် ဖြစ်ပေါ်နေပါတယ်။ နိုင်ငံတော် သစ္စာဖောက်ဖျက် ပုန်ကန်မှုကျူးလွန်ထားတဲ့ နေပြည်တော်က စစ်ခေါင်းဆောင် ဖက်ဆစ်ကောင်တွေအတွက် ကျနော်တို့လူငယ်တွေရဲ့အသက်တွေ သေပေးနေရတာမျိုး၊ ဘဝပေးနေရတာမျိုးတွေဟာ ထိုက်တန်မှု မရှိပါဘူး။ အဲဒါကြောင့် ကျနော်တို့ လူငယ်တွေအနေနဲ့ အသိ၊ သတိနဲ့ ယှဉ်ပြီး ပေါ်တာလုံးဝ အဆွဲမခံရအောင်နေထိုင်သွားလာ လှုပ်ရှားကြဖို့နဲ့ တရားမဝင် အတုအယောင် ရွေးကောက်ပွဲအတွက်လည်း သေနတ်ထောက်ပြီး အဓမ္မ အသုံးချ မဲပေးခံရနိုင်တဲ့ဘေးကိုလည်း ဂရုပြု ရှောင်ရှားကြဖို့ ပြောချင်ပါတယ်။” လို့ မုံရွာလူထုသပိတ်တိုက်ပွဲဦးဆောင်ကော်မတီဝင် ကိုခန့်ဝေဖြိုးက ပြောပါတယ်။
ပြီးခဲ့တဲ့ သီတင်းကျွတ်၊ တန်ဆောင်တိုင်ကာလတုန်းကလည်း မုံရွာမြို့ပေါ်မှာ စစ်တပ်ကပွဲလမ်းသဘင်တွေလုပ်ပေးခဲ့ပြီးပွဲတော်ပြန်လူငယ်တွေကို ပေါ်တာဆွဲခဲ့ပါသေးတယ်။
စစ်ကောင်စီဟာမုံရွာမြို့ပေါ်မှာ ပွဲလမ်းသဘင်မရှိချိန်မှာလည်း လူငယ်တွေကို ပေါ်တာဆွဲဖမ်းဆီးနေပြီးနေ့စဥ်ဖမ်းဆီးခံနေရကြောင်းမြို့ခံတွေက ပြောပါတယ်။
