နိုဝင်ဘာ-၂၂၊၂၀၂၅။မိုမို/People’s Spring
ကျားဘီးလူးစစ်ကြောင်းဦးဆောင်ပြီး စစ်တပ်ရဲ့ စက်တပ်လေထီးကိုပစ်ချနိုင်ခဲ့တယ်လို့ ပေါက်မြို့နယ်ပြည်သူ့ကာကွယ်ရေးအဖွဲ့(ပေါက် ပကဖ)က ဒီကနေ့ ညပိုင်း ထုတ်ပြန်ပါတယ်။
မကွေးတိုင်း၊ ပခုက္ကူအခြေစိုက်တပ်မ ၁၀၁ ကနေ ပေါက်နယ်ကို ဗုံးလာကြဲတဲ့ စက်တပ်လေထီး နှစ်စီးကို နိုဝင်ဘာ ၂၂ ရက်ညနေ ၄ နာရီ ခွဲ မှာ ပေါက် ပကဖ တပ်ရင်းမှုး ဦးဆောင်တဲ့ ကျားဘီလူးစစ်ကြောင်းက မြိုင်ပကဖ ၊MGY PDF တို့ပူးပေါင်းပြီး တိုက်ခိုက်ခဲ့တာလို့ အသိပေးပါတယ်။
စက်တပ်လေထီးတစ်စီးကပေါက်မြို့နယ်မြောက်ပိုင်းနေရာတစ်ခုမှာပျက်ကျခဲ့တယ်လို့ပေါက် ပကဖ စစ်ဘက်ရေးရာသတင်းထောက်လှမ်းရေးတာဝန်ခံ ကိုစစ်မုန်းက အသိပေးပါတယ်။
Public Service Announcement
“ ပိုင်းလော့ ဦးထုပ်ကိုတွေ့တယ်။ဒါပေမယ့် စစ်ကောင်စီစစ်ကြောင်း နဲ့အနီးကပ်လွန်တာကြောင့် သေတယ်ရှင်တယ် မသိရသေးဘူး” လို့ သူက လူထုနွေဦးကို ပြောပါတယ်။
ပျက်ကျတဲ့ ပါရာမော်တာ နဲ့ဆက်စပ်တာ တွေကို အလုံးစုံ သိမ်းဆည်းနိုင်ခဲ့တယ်လို့လည်း သိရပါတယ်။
စစ်တပ်ရဲ့တပ်မ( ၁၀၁)ကစက်တပ်လေထီးတွေဟာ ပေါက်မြို့နယ်အတွင်းစစ်ကြောင်းထိုးနေတဲ့ စစ်တပ်စသ်ကြောင်းတွေကိုလေကြောင်းပစ်ကူပေးတာ အပြင် အရပ်သားပြည်သူတွေ နေထိုင်ရာကျေးရွာအတွင်းကို တိုက်ခိုက်မှုတွေလုပ်နေတယ်လို့ ပေါက် ပကဖ က အသိပေးပါတယ်။
ဒါ့အပြင်ပေါက်မြို့နယ်ထဲကို စစ်တပ်က အင်အားရာနဲ့ချီပြီးစစ်ကြောင်းထိုးနေတာကြောင့်လေကြောင်း ၊လက်နက်ကြီးအန္တရာယ် အထူးဂရုစိုက်နေကြဖို့ တိုက်တွန်းထားပါတယ်။
စစ်တပ်က ပေါက် မြို့နယ်နယ်မြေအတွင်း စစ်ကြောင်း သုံးကြောင်းနဲ့ ဖြန့်ခွဲထားတာပါ။ ကာကွယ်ရေးပစ္စည်းစက်ရုံ(ကပစ ၂၄ )ကနေ အင်အား ၁၈၀ ကျော်ပါတဲ့စစ်ကြောင်းက ပေါက်မြို့နယ်အနောက်မြောက်ခြမ်း နဲ့ ကပစ ၂၄ က အင်အား ၂၀၀ ကျော်စစ်ကြောင်းကလည်း ပေါက်မြောက်ပိုင်းမှာရှိနေပါတယ်။
ဒါ့အပြင် မြိုင်မြို့နယ် အနောက် တောင်ဘက်ခြမ်းက တပ်မတော်အကြီးစားစက်ရုံ (စက်မှု ၂ )က အင်အား၂၀၀ ပါတဲ့ စစ်ကြောင်းက ပေါက်မြို့နယ်ရဲ့ အရှေ့မြောက်ဘက်ခြမ်းကို စစ်ကြောင်းထိုး နေတာဖြစ်ပါတယ်။
