နိုဝင်ဘာ-၂၄၊ ၂၀၂၅။ ပုရစ်/People’s Spring
အမျိုးသားညီညွတ်ရေးအစိုးရ(NUG)၊ပြည်ထောင်စုဝန်ကြီးချုပ်ရုံးအမြဲတမ်းအတွင်းဝန်မကြည်ပြာနဲ့ ခင်ပွန်းဖြစ်သူ ကိုညီညီမင်းတို့ဟာ မလျော်ကန်တဲ့အပြုအမူတွေပြုလုပ်ခဲ့တယ်ဆိုပြီး ပြည်ထောင်စုဝန်ကြီးချုပ်ရုံး ဝန်ထမ်းဟောင်းတွေက တိုင်ကြားတာနဲ့ပတ်သက်ပြီးစုံစမ်းစစ်ဆေးသွားမယ်ဖြစ်ကြောင်း NUGက ထုတ်ပြန်ခဲ့ပြီး တိုင်ကြားခံရသူကို နိုဝင်ဘာ ၂၂ရက်က စတင်ပြီးတာဝန်ကနေ ယာယီရပ်နားထားကြောင်း ထုတ်ပြန်ပါတယ်။
အဲဒီဖြစ်စဉ်နဲ့ပတ်သက်ပြီး NUGက ဒီကနေ့ နိုဝင်ဘာ ၂၄ရက်မှာ ဆောင်ရွက်ထားမှု အခြေအနေကို အသိပေးထုတ်ပြန်ခဲ့ရာ နိုဝင်ဘာ ၁၉ ရက်စွဲနဲ့ နိုင်ငံတော်ယာယီသမ္မတ၊ ပြည်ထောင်စုဝန်ကြီးချုပ်နဲ့ ပြည်ထောင်စုလွှတ်တော်ကိုယ်စားပြု ကော်မတီဥက္ကဋ္ဌတို့ထံ လိပ်မူထားတဲ့ တိုင်စာဟာ ပြည်ထောင်စုဝန်ကြီးချုပ်ရုံးရဲ့ မေးလ်ကို ရောက် လာခြင်းမရှိပေမယ့် နိုင်ငံတော်အကြီးအကဲဖြစ်သူ ယာယီသမ္မတထံရောက်ရှိတဲ့အတွက် အဲဒီကိစ္စ ဆောင်ရွက်ဖို့ပြည်ထောင်စုဝန်ကြီးချုပ်က နိုဝင်ဘာ ၂၂ရက်မှာ စုံစမ်းစစ်ဆေးရေးအဖွဲ့ ဖွဲ့စည်းခြင်းအမိန့် ထုတ်ပြန်ဖွဲ့စည်းခဲ့တယ်လို့ ဖော်ပြပါတယ်။
စုံစမ်းစစ်ဆေးရေးအဖွဲ့အနေနဲ့ တိုင်ကြားသူတွေ၊ တိုင်ကြားခံရသူတွေ နှစ်ဖက်သက်သေတင်ပြမှုတွေရှိလာပါက တင်ပြတဲ့သက်သေတွေ တုင်ကြားမှုနဲ့ ပတ်သက်လို့ စစ်ဆေးဖို့လိုအပ်တဲ့ သက်သေတွေကို ခေါ်ယူစစ်ဆေးမှုအမြန်ဆုံးဆောင်ရွက်ပြီး တွေ့ရှိချက်တွေ အကြံပြုချက်တွေကို ဝန်ကြီးချုပ်ထံ ပြန်လည်တင်ပြဖို့ တာဝန်ပေးထားတယ်လို့ ဆိုပါတယ်။
Public Service Announcement
တိုင်ကြားစာအပေါ် လိုအပ်တဲ့ စုံစမ်းစစ်ဆေးမှုပြုလုပ်နေစဉ် တိုင်ကြားခံရသူတွေကို နိုဝင်ဘာ၂၂ရက်မှ စတင်ပြီးတာဝန်မှ ယာယီရပ်နားထားကြောင်း ထုတ်ပြန်ခဲ့ပြီး စုံစမ်းစစ်ဆေးရေးအဖွဲ့အနေနဲ့လည်း ဆောင်ရွက်ရန်ရှိတဲ့ လုပ်ငန်းတွေစတင်ဆောင်ရွက်နေကြောင်း အသိပေးပါတယ်။
စစ်ဆေးတွေ့ရှိချက်များအပေါ်မူတည်ပြီး လိုအပ် သော အရေးယူဆောင်ရွက်မှုတွေ ဆက်လက်လုပ်ဆောင်သွားမယ်လို့လည်း ထုတ်ပြန်ပါတယ်။
မကြည်ပြာနဲ့ ခင်ပွန်းဖြစ်သူတို့ဟာ လူ့အခွင့်အရေးချိုးဖောက်တာ ၊ အလွဲသုံးစားလုပ်တာ၊ အဂတိလိုက်စားတာ၊ ဝန်ထမ်းတွေအပေါ် နဲ့ တော်လှန်ရေးအစိုးရ အတွင်း မလျော်ဩဇာသုံး လွှမ်းမိုးခြယ်လှယ် ဆောင်ရွက် နေတာလို့ တိုင်ကြားသူတွေက စွပ်စွဲထားပါတယ်။
တိုင်ကြားသူဝန်ထမ်း ၁၂ဦးရဲ့ တော်လှန်ရေးအမည်တွေနဲ့ တိုင်ကြားထားတာဖြစ်ပြီး ရုံးအဖွဲ့ဝင်တွေ၊ ဦးစီးအရာရှိ၊ညွှန်ကြားရေးမှူး၊ လက်ထောက်ညွှန်မှူး၊တွဲဖက်အတွင်းဝန်၊ ယာဉ်မောင်း စသူတွေ ပါဝင်တာကို စာမှာ တွေ့ရပါတယ်။
တိုင်ကြားစာမှာအမြဲတန်းအတွင်းဝန် မကြည်ပြာရဲ့မောက်မာမှု၊မလျော်ဩဇာသုံးစွဲမှု၊ အလွဲသုံးစားမှု၊ အထက်ဖားအောက်ဖိစရိုက်တွေကြောင့် ၂၀၂၂ကနေ ၂၀၂၅အတွင်း ဝန်ကြီးချုပ်ရုံး ဝန်ထမ်း ၁၉ဦး ရုံးကို စွန့်ခွာခဲ့ကြတယ်လို့ တိုင်စာမှာ စွပ်စွဲထားပြီး မကြည်ပြာဟာပုဂ္ဂိုလ်ရေးအကျိုးစီးပွားအတွက် ဝန်ကြီးချုပ်ကိုပါ ကြိုးကိုင် ချယ်လှယ်တယ်လို့ စာမျက်နှာ၂၅ မျက်နှာရှိပြီးအချက်ပေါင်း ၂၀ပါဝင်တဲ့တိုင်ကြားစာမှာစွပ်စွဲရေးသားထားပါတယ်။
တိုင်စာနဲ့ပတ်သက်ပြီး ကာယကံရှင်မကြည်ပြာက ဒီကနေ့ နိုဝင်ဘာ ၂၀ရက်မှာ သူ့ရဲ့ ဖေ့စ်ဘွတ်ခ်ကနေ ပြန်လည်ရှင်းလင်းထားပါတယ်။
သေးငယ်တဲ့ပုဂ္ဂိုလ်ရေးမကျေနပ်ချက်တခုကိုအရင်းပြုပြီး စနစ်တကျစီစဉ်ထားတဲ့ ပုဂ္ဂိုလ်ရေးတိုက်ခိုက်မှုကို ပထမဦးဆုံးကြုံရခြင်းပဲဖြစ်ကြောင်း မကြည်ပြာက ရေးသားထားပြီး အမြန်ဆုံးစုံခုံဖွဲ့ စစ်ဆေးဖို့ တာဝန်ရှိသူတွေဆီတောင်းဆိုထားသလို အပြည့်အ၀ ပူးပေါင်းဆောင်ရွက်မယ်လို့ အသိပေးပါတယ်။
နိုင်ငံရေးအရ တော်လှန်ရေးအခြေအနေတွေ အကဲဆတ်တဲ့ကာလမှာ NUG ဝန်ကြီးချုပ်ရုံးခေါင်းစဉ်နာမည်တပ်ပြီး လွဲမှားတဲ့စွပ်စွဲချက်တွေနဲ့ နိုင်ငံရေးသိက္ခာချတာကိုလက်ခံမှာမဟုတ်ဘူးလို့လည်း မကြည်ပြာက ရေးသားထားပါတယ်။
သတင်းမှားတွေကို သတင်းမီဒီယာကိုအင်တာဗျူးသူတွေ၊ တိုင်ကြားခြင်းကိုဦးဆောင်ခဲ့သူတွေအနေနဲ့လည်း မိမိလုပ်ရပ်အပေါ်တာဝန်ယူရမှာဖြစ်ကြောင်း မကြည်ပြာကရေးသားထားသလို စွပ်စွဲချက်တွေအတွက် လိုအပ်ရင်လိုအပ်သလို ဆက်လက်ဖြေရှင်းဆောင်ရွက်သွားမယ်လို့ အသိပေးပါတယ်။
