အမေရိကန်ရဲ့ F-22 တိုက်လေယာဉ်မှူး တစ်ဦးဟာ လေယာဉ်ကို ပျံသန်းနေချိန် အတွင်းမှာပဲ နောက်ထပ် ဒရုန်းတစ်စီးကိုပါ တပြိုင်တည်း ထိန်းချုပ်နေတဲ့ စမ်းသပ်မှုကို ပြီးမြောက် အောင်မြင်ခဲ့ကြောင်း သိရပါတယ်။
Lockheed Martin ကုမ္ပဏီက ပဉ္စမမျိုးဆက် အဆင့်မြင့် တိုက်လေယာဉ်ရဲ့ လေယာဉ်မှူးဟာ စစ်ဆင်ရေး လုပ်ဆောင်နေရင်း တခြား ဒရုန်းတစ်စီးကိုပါ အလိုက်သင့် တွဲဖက် စေခိုင်းနိုင်တဲ့ စွမ်းဆောင်ကြောင်း သရုပ်ပြနိုင်ခဲ့တယ်လို့ ပြောပါတယ်။
F-22တွေကို ထုတ်လုပ်တဲ့ ကုမ္ပဏီရဲ့ အဆိုအရ နီဗားဒါးပြည်နယ်၊ လက်စ်ဗီးဂက်စ်မြို့မှာရှိတဲ့ နဲလစ္စ လေတပ်စခန်း အခြေစိုက် F-22 တစ်စီးရဲ့ လေယာဉ်မှူးဟာ လေထဲမှာ ပျံဝဲနေတဲ့ MQ-20 ဒရုန်းတစ်စီးကိုရော၊ သူ့ရဲ့ လေယာဉ်ကိုပါ တပြိုင်တည်း ထိန်းချုပ်နိုင်ခဲ့တာ ဖြစ်တယ်လို့ သိရပါတယ်။
Lockheed Martinဟာ တစ်ယောက်စီး တိုက်လေယာဉ်တွေရဲ့ စစ်ဆင်ရေးမစ်ရှင် လိုအပ်ချက်တွေကို ဝန်းရံ ဖြည့်တင်းပေးမယ့် ဒရုန်းတွေကိုပါ လေယာဉ်မှူးတွေက လိုသလို ထိန်းချုပ်နိုင်မယ့် လေ့လာမှုမျိုးကို လုပ်ဆောင်နေပါတယ်။
Public Service Announcement
အဲဒီ ကုမ္ပဏီဟာ နောက်ပိုင်းနှစ်တွေမှာ အမေရိကန်ရဲ့ အဆင့်အမြင့်ဆုံး တိုက်လေယာဉ်တွေ ဖန်တီးထုတ်လုပ်မှုမှာ အဓိကကျကျ တာဝန်ယူနေခဲ့တာဖြစ်ပါတယ်။
လက်ရှိမှာတော့ Lockheed Martinဟာ F-22နဲ့ F-35တွေလို ပဉ္စမမျိုးဆက် အဆင့်မြင့် တိုက်လေယာဉ်တွေမှာ ဉာဏ်ရည်တု (AI)နည်းပညာသုံး ဒရုန်းတွေနဲ့ လူလိုက်ပါတဲ့ တိုက်လေယာဉ်တွေဟာ ဟန်ချက်ညီ ပေါင်းစပ် ပျံသန်းနိုင်မှုကို မဟာဗျူဟာ စီမံကိန်း တစ်ခုအနေနဲ့ အကောင်အထည် ဖော်နေပါတယ်။
တိုက်လေယာဉ်တွေကို ဒရုန်းတွေက ခြံရံ ပျံသန်းပေးတဲ့အခါ ရန်သူ့ လှုပ်ရှားမှုကို ထောက်လှမ်းရာမှာရော၊ စစ်ဆင်ရေး စွမ်းရည်ကိုပါ တိုးတက်မှုတွေ ရစေလိမ့်မယ်လို့ Lockheed Martinက မှတ်ချက်ပေးထားပါတယ်။
Lockheed Martinဟာ AI အထောက်အပံ့ ပေါင်းစပ်စေမယ့် လေကြောင်း စစ်ဆင်ရေး နည်းပညာပိုင်းနဲ့ ပတ်သက်လို့ နှစ်အတော်ကြာ သုတေသနပြု လေ့လာနေခဲ့တာ ဖြစ်ပါတယ်။
F-22တွေဟာ လေကြောင်းစိုးမိုးရေးအတွက် အဓိက ရည်ရွယ် ထုတ်လုပ်ထားပြီး လက်ရှိ ကမ္ဘာပေါ်မှာ ထုတ်လုပ်ခဲ့ဖူးသမျှ စွမ်းဆောင်ရည် အမြင့်ဆုံး တိုက်လေယာဉ်တွေလို့ သတ်မှတ် ခံထားရပါတယ်။ အမေရိကန်ဟာ F-22တွေကို ပြည်ပ တင်ပို့ရောင်းချခွင့်ကိုပါ ပိတ်ပင်ထားပါတယ်။
ကိုးကား: Aerospace Global
