နိုဝင်ဘာ-၂၈၊၂၀၂၅။မိုမို/People’s Spring
စစ်ကိုင်းတိုင်း၊တန့်ဆည်မြို့နယ်က စစ်ကောင်စီတပ်စွဲထားတဲ့ မူးတိမ်ကျေးရွာကို တော်လှန်ရေးတပ်ဖွဲ့တွေ ဝင်ရောက်သိမ်းပိုက်ခဲ့တယ်လို့ ကနဦးသတင်းရပါတယ်။
ဒီကနေ့(နိုဝင်ဘာ ၂၈ရက်) မနက် အစောပိုင်းကတည်းက နှစ်ဖက်ထိတွေ့မှု ပြင်းထန်ခဲ့ပြီးတဲ့နောက် ၄နာရီကြာတိုက်ပွဲအပြီး မူးတိမ်ရွာကို သိမ်းပိုက်နိုင်ခဲ့တာလို့ ဒေသတွင်းသတင်းရင်းမြစ်အချို့က ဆိုပါတယ်။
“ လေကြောင်းကလည်း တောက်လျှောက်ဗုံးကြဲ နေတယ်။ရှင်းလင်းရေးလည်းမပြတ်သေးလို့ အသေး စိတ်အချက်အလက်တွေကိုတော့ ခဏနေမှ ပြောလို့ရမယ်” လို့ တန့်ဆည်မြို့နယ်ကာကွယ်ရေးတပ်ဖွဲ့ဝင်တစ်ဦးက ပြောပါတယ်။
Public Service Announcement
မူးတိမ်ရွာသိမ်းပိုက်မှုအတွင်း စစ်ကောင်စီတပ်နဲ့ပျူစောထီးတွေ သေဆုံးမှုရှိပြီး ထွက်ပြေးတဲ့သူများတယ်လို့ တိုက်ခိုက်မှုမှာပါဝင်တဲ့ ဓူဝံပြည်သူ့ကာကွယ်ရေးအဖွဲ့က ကိုပြည်ကျော်စိုးက အတည်ပြုပါတယ်။
“ မူးတိမ်က တန့်ဆည်နဲ့ ကန့်ဘလူအစပ်ပေါ့။စကစ တပ်စွဲထားတာတော့ကြာပြီ။ဒီကနေ့ တိုက်ခိုက်မှုမှာ သေဆုံးတဲ့ စကစနဲ့ပျူတွေများတယ်” လို့ သူက လူထုနွေဦးကို ပြောပါတယ်။
မူးတိမ်တိုက်ပွဲနဲ့ပတ်သက်လို့ “ နမခ နယ်မြေ တန့်ဆည်နယ်ရှိ မိမိတို့ပြည်သူ့စစ်စခန်းအား နံနက်၄နာရီခန့်မှစ၍ အကဖများမှ လာရောက်တိုက်ခိုက်။တိုက်ပွဲဖြစ်ပွားနေပြီး တပ်မတော်လေမှ ဝေဟင်ပစ်ကူပေးလျှက်ရှိ” ဆိုပြီး စစ်ကောင်စီ ဝါဒဖြန့်သူအချို့က တယ်လီဂရမ်ကနေ ဖြန့်ဝေထားတာတွေ့ရပါတယ်။
တန့်ဆည်မြို့နယ် အရှေ့မြောက်ခြမ်းကို ဒီကနေ့မနက်ပိုင်းကတည်းက တံတားဦးလေတပ်က တက်လာတဲ့ ဂျက်ဖိုက်တာနဲ့ ဟုမ္မလင်းဘက်ကနေလည်း Y -12 လေယာဥ်တွေနဲ့ ဗုံးဆယ်နဲ့ချီ ကြဲချခဲ့တယ်လို့ လေကြောင်း သတင်းအချက်တွေကနေ သိရပါတယ်။
ဒါ့အပြင် ဒီကနေ့ မနက် ၁၀နာရီက ကန့်ဘလူမြို့နယ်အမြောက်တပ်ကနေ လက်နက်ကြီးနဲ့ပစ်တာ၊အင်အားအပြည့်ပါတဲ့ စစ်ကားတွေနဲ့ တန့်ဆည်မြို့အရှေ့မြောက်ခြမ်းကို ဦးတည်ထွက်လာနေတယ်လို့ ဒေသတွင်းစစ်ရေးသတင်းတွေက ပြောပါတယ်။
မကြာသေးမီရက်ပိုင်းတွေက တန့်ဆည်မြို့နဲ့ဆက်စပ်နေတဲ့ ကန့်ဘလူ တောင်ဘက်ခြမ်းနဲ့ ခင်ဦး မြို့နယ်တွေမှာ စစ်ကောင်စီတပ်စစ်ကြောင်း ပျက်တဲ့အထိ တိုက်ခိုက်ခံထားရပါသေးတယ်။
