ဒီဇင်ဘာ-၁၂၊ ၂၀၂၅။ဇေအောင်/People’s Spring
စစ်ကိုင်းတိုင်း၊ မုံရွာနဲ ရွှေဘိုမြို့ပေါ်မှာ စစ်တပ်က အိမ်စီးကားတွေနဲ့လှည့်လည်ပြီး ဘီယာဆိုင်တဲ့သူတွေကိုပါ ပေါ်တာဆွဲဖမ်းဆီးနေလို့ လူငယ်တွေ အများအပြား ဖမ်းဆီးခံလိုက်ရကြောင်း ဒေသခံတွေက ပြောပါတယ်။
ဒီကနေ့ ဒီဇင်ဘာ ၁၂ရက် ညနေပိုင်းက ရွှေဘိုမြို့၊ ပြည်တော်သာရပ်ကွက်၊ အောင်ချမ်းသာဘုန်းကြီးကျောင်းအနီးမှာ စစ်တပ်က လမ်းမပေါ် မောင်းနှင်းလာတဲ့ ကားနဲ့ဆိုင်ကယ်တွေပေါ်က လူငယ်တွေကို ပေါ်တာဆွဲဖမ်းဆီးခဲ့ကြောင်း ရွှေဘိုမြို့ခံတွေက ပြောပါတယ်။
“ ယောကျ်ားလေးတွေပါသွားတယ်။ မိန်းကလေးတွေတော့ ပြန်လွှတ်တယ်” လို့ ရွှေဘိုမြို့ခံတစ်ဦးက ပြောပါတယ်။
Public Service Announcement
အလားတူ မုံရွာမြို့ပေါ်မှာလည်း စစ်တပ်က အိမ်စီးကားတွေနဲ့ ပေါ်တာဆွဲဖမ်းဆီးနေပြီး ဒီကနေ့ညနေပိုင်းက ပစ္စည်းပို့တဲ့ဝန်ထမ်းတစ်ဦးနဲ့ နန္ဒဝန်ရပ်ကွက်က ဘီယာဆိုင်ထိုင်နေတဲ့ လူငယ် ၄ ဦး ဖမ်းဆီးခံလိုက်ရကြောင်း မြို့ခံတွေက ပြောပါတယ်။
“ မုံရွာကနေ့တိုင်း ဆွဲနေတာ။ မထူးဆန်းတော့ဘူး” လို့ မြို့ခံတစ်ဦးက ပြောပါတယ်။
မုံရွာနဲ့ ရွှေဘိုမြို့မှာ ပေါ်တာဆွဲဖမ်းဆီးခံလိုက်ရတဲ့ အရေအတွက်ကိုတော့ မသိရသေးပါဘူး။
စစ်ကိုင်းတိုင်းတင်မကဘဲ မန္တလေး၊ မကွေးနဲ့ အခြားဒေသအသီးသီးမှာပါ စစ်တပ်က ပေါ်တာဆွဲဖမ်းဆီးနေပြီး ယခုနောက်ပိုင်းမှာ စစ်မှုထမ်းကန့်သတ် အသက်ကျော်တဲ့ ၃၅ နှစ်အထက်ပိုင်းတွေကိုလည်း ပေါ်တာဆွဲဖမ်းဆီးတာတွေ ပြုလုပ်နေကြောင်း ဒေသခံတွေက ပြောပါတယ်။
