ဒီဇင်ဘာ-၁၃၊၂၀၂၅။ဆန်အောင်/People’s Spring
အပြည်ပြည်ဆိုင်ရာလူ့အခွင့်အရေးနေ့ဖြစ်တဲ့ဒီဇင်ဘာလ (၁၀) ရက်မှာ နိုင်ငံတဝန်း ပြည်သူတွေ ပါဝင်ခဲ့တဲ့ အသံတိတ်သပိတ် ( Nationwide Silent Strike Movement) ဟာ စစ်ကောင်စီတပ်ရဲ့ ရွေးကောက်ပွဲကို ပြည်သူတရပ်လုံးက လက်မခံကြောင်း ကမ္ဘာသိအောင် ပြသတဲ့ သတင်းစကား ဖြစ်ကြောင်း အမျိုးသားညီညွတ်ရေးအတိုင်ပင်ခံကောင်စီ(NUCC)နဲ့ အမျိုးသားညီညွတ်ရေးအစိုးရ(NUG) ပူးပေါင်းဖွဲ့စည်းထားတဲ့ တရားမဝင်အတုအယောင်ရွေးကောက်ပွဲဆန့်ကျင်ရေး ပူးပေါင်းလုပ်ငန်းကော်မတီက ဒီကနေ့ ဒီဇင်ဘာ ၁၄ရက်မှာ ထုတ်ပြန်ပါတယ်။
စစ်တပ်ရဲ့ ဖိနှိပ်ခြိမ်းခြောက်မှုကြားက အသံတိတ်သပိတ်မှာတက်ကြွစွာ ပါဝင်ခဲ့ကြတဲ့ ပြည်သူလူထုတစ်ရပ်လုံးအား လေးစားဂုဏ်ပြုကြောင်းနဲ့ ကျေးဇူးတင်ရှိကြောင်း ထုတ်ပြန်ရာမှာအခုလိုအသိပေးဖော်ပြတာဖြစ်ပါတယ်။
စစ်အုပ်စုခြိမ်းခြောက်ဖိနှိပ်မှုကြားကအသံတိတ်သပိတ်မှာရဲရင့်စွာ ပူးပေါင်းပါဝင်ခဲ့ကြတဲ့ ပြည်သူတွေ ဦးဆောင်စည်းရုံးခဲ့ကြတဲ့ သပိတ်အင်အားစုတွေ၊သမဂ္ဂတွေနဲ့တော်လှန်ရေးအင်အားစုအားလုံးကိုအလေးအနက်ဂုဏ်ပြုကြောင်းလည်းဖော်ပြပါတယ်။
Public Service Announcement
“ပြည်သူတခဲနက် ပူးပေါင်းပါဝင်ခဲ့သည့်ထိုအသံတိတ်သပိတ်ကြီးသည်စစ်အာဏာရှင်စနစ် နှင့် ၎င်းတို့လုပ်ဆောင်မည့် တရားမဝင် အတုအယောင်ရွေးကောက်ပွဲကို (လုံးဝ) လက်မခံကြောင်း ပြတ်သားသော ပြည်သူ့ဆန္ဒကို ကမ္ဘာသို့ သိရှိနိုင်ရန် ပေးပို့ခဲ့သည့် အကျယ်လောင်ဆုံး သတင်းစကားလည်း ဖြစ်ပေသည်”လို့လည်း ထုတ်ပြန်ချက်မှာ ပါရှိပါတယ်။
အသံတိတ်သပိတ်အောင်မြင်စွာဖော်ဆောင်နိုင်ခဲ့တာဟာပြည်သူတို့ရဲ့မယိမ်းယိုင်သောနွေဦးတော်လှန်ရေး စိတ်ဓါတ်ကို ထင်ရှားစွာ ဖေါ်ထုတ်ပြသခဲ့တဲ့သမိုင်း မှတ်တိုင်တစ်ခုလည်း ဖြစ်တယ်လို့ ဆိုပါတယ်။
စစ်အာဏာရှင်တို့ မဖြိုခွဲနိုင်တဲ့ ပြည်သူလူထုရဲ့ စည်းလုံးညီညွတ်မှုကိုလည်းပြသနိုင်ခဲ့သလို၊ဖက်ဒရယ်ဒီမိုကရေစီပန်းတိုင်သို့မရောက်မချင်း ဆက်လက်ချီတက်မယ့် ပြည်သူတို့ မဆုတ်မနစ်သောဇွဲသတ္တိစိတ်ဓါတ်ကိုလည်း ထင်ဟပ် စေတယ်လို့ ယုံကြည်ကြောင်း NUCCနဲ့ NUGက ပူးတွဲထုတ်ပြန်ပါတယ်။
အမျိုးသားညီညွတ်ရေးအစိုးရ(NUG)ယာယီသမ္မတ ဒူဝါလရှီးလကလည်း စစ်အာဏာရှင်တွေရဲ့ ညှင်းပမ်းရက်စက်မှုတွေကို လက်မခံနိုင်ကြောင်း ပြသတဲ့ အသံတိတ်သပိတ် ဆင်နွှဲခဲ့ကြတဲ့ ပြည်သူအပေါင်းကို လေးစားစွာ ဦးညွှတ်ကြောင်း ပြောကြားထားပါတယ်။
