ဒီဇင်ဘာ-၁၅၊ ၂၀၂၅ ဇေအောင်/People’s Spring
စစ်ကိုင်းတိုင်း၊ မုံရွာမြို့ပေါ်မှာ စစ်တပ်ရဲ့ ပေါ်တာဆွဲတဲ့ကားနဲ့တိုးလို့ ပြန်လှည့်ပြေးတဲ့ လူငယ် ပစ်ခတ်ခံခဲ့ရကြောင်း မြို့ခံတွေက ပြောပါတယ်။
မနေ့က ဒီဇင်ဘာ ၁၄ ရက် မနက် ၈နာရီခန့်က မုံရွာမြို့၊ ပညာရေးကောလိပ်အနီးမှာ အလုပ်သွားတဲ့လူငယ်တစ်ဦးဟာ ပေါ်တာဆွဲဖမ်းဆီးမယ့် စစ်ကားနဲ့တိုးလို့ ပြန်လှည့်ရာ စစ်အုပ်စုက သေနတ်နဲ့ ပစ်ခတ်ခဲ့ကြောင်း မြို့ခံတွေက ပြောပါတယ်။
“ ကောင်လေးက တီတီစီကျောင်းနား အလုပ်သွားလုပ်တာ။ ခွေးကားနဲ့တိုးလို့ ပြန်လှည့်ပြေးတော့ အပစ်ခံလိုက်ရတာ” လို့ မုံရွာမြို့ခံ အမျိုးသားတစ်ဦးက ပြောပါတယ်။
Public Service Announcement
အပစ်ခံလိုက်ရတဲ့လူငယ်ဟာ မုံရွာနယ်အတွင်း ကျေးရွာတစ်ရွာကဖြစ်ပြီး ဆေးရုံမှာ အရေးပေါ်ဆေးကုသမှုခံယူနေရကြောင်း မြို့ခံအချို့က ပြောပါတယ်။
စစ်ကောင်စီတပ်ဟာ ဒီကနေ့မနက်ပိုင်းမှာလည်း မုံရွာမြို့ပေါ်မှာ ပေါ်တာဆွဲဖမ်းဆီးနေပြီး နွားခြံကုန်းရွာက လူငယ် ၂ ဦးကို ဖမ်းဆီးသွားကြောင်း ဒေသခံတွေက ပြောပါတယ်။
မုံရွာမြို့ပေါ်မှာ စစ်တပ်က အချိန်မရွေးပေါ်တာဆွဲဖမ်းဆီးနေလို့ သတိပြုသွားလာကြဖို့ တော်လှန်ရေး အင်အားစုတွေက သတိပေးထားပါတယ်။
