ဒီဇင်ဘာ-၁၇၊၂၀၂၅ ဇေအောင်/People’s Spring
စစ်ကိုင်းတိုင်း၊မုံရွာမြို့နယ်ကစစ်တပ် မီးရှို့ခဲ့တဲ့ကျေးရွာ ၂ရွာက အိမ်ထောင်စု ၅၀ကျော်ဟာ အရေးပေါ် စားနပ်ရိက္ခာနဲ့ အသုံးအဆောင်တွေ လိုအပ်နေကြောင်း အကူအညီပေးနေသူတွေက ပြောပါတယ်။
စစ်တပ်မီးရှို့ဖျက်ဆီးသွားသော နေအိမ်များအား တွေ့ရစဥ်။ ဓာတ်ပုံ-မုံရွာရပ်ကွက်ကင်းထောက်များ၊ Monywa Revolution စစ်တပ်မီးရှို့ဖျက်ဆီးသွားသော နေအိမ်များအား တွေ့ရစဥ်။ ဓာတ်ပုံ-မုံရွာရပ်ကွက်ကင်းထောက်များ၊ Monywa Revolution စစ်တပ်မီးရှို့ဖျက်ဆီးသွားသော နေအိမ်များအား တွေ့ရစဥ်။ ဓာတ်ပုံ-မုံရွာရပ်ကွက်ကင်းထောက်များ၊ Monywa Revolution
ဒီဇင်ဘာ ၁၅ရက် မနက်ပိုင်းက မုံရွာမြို့နယ်တောင်ပိုင်း၊ စွမ်းရည်ထက်ဆီဆိုင်အနီးက စစ်ကောင်စီတပ်ကနေ ထွက်လာတဲ့ အင်အား ၁၅၀ခန့်ပါ စစ်ကောင်စီတပ်စစ်ကြောင်းဟာ နဂါးတွင်းရွာနဲ့ ပေါက်ပင်ကျေးရွာက နေအိမ် ၅၁အိမ်ခန့်ကို မီးရှို့ဖျက်ဆီးခဲ့ပါတယ်။
အဲဒီမီးရှို့ဖျက်ဆီးမှုကြောင့် မီးဘေးသင့် အိမ်ထောင်စုပေါင်း ၅၃ စုက လူဦးရေ ၂၀၀ကျော်ဟာ ဆန်၊ ဆီ၊ စောင်၊ မိုးကာ၊ အိုးခွက်ပန်းကန်၊ အနွေး ထည်တွေ လိုအပ်နေကြောင်း မုံရွာ-အမြင့်လမ်း သတင်းမှန်ပြန်ကြားရေးက တာဝန်ရှိသူက ပြောပါတယ်။
Public Service Announcement
“မီးရှိူ့ခံလိုက်ရတဲ့သူတွေက ဘာမှမရလိုက်ကြဘူး။အခုလက်ရှိကတော့ ဖြစ်သလိုလေးပဲ နေနေရတာ”လို့၎င်းက ပြောပါတယ်။
စစ်ကောင်စီတပ်ဟာ နေအိမ်တွေအပြင် ပြည်သူတွေရဲ့ကားတွေ၊ ဆိုင်ကယ် တွေပါ မီးရှိူ့သွားကြောင်း ဒေသခံတွေက ပြောပါတယ်။
မီးရှို့ပြီးထွက်လာတဲ့ စစ်ကောင်စီကို တော်လှန်ရေးတပ်ဖွဲ့တွေက ကြားဖြတ်တိုက်ခိုက်ခဲ့ရာ စစ်အုပ်စုဝင် ၃ ဦးသေဆုံးပြီး ထိခိုက်ဒဏ်ရာရရှိတဲ့သူတွေ များတယ်လို့ မုံရွာပကဖအဖွဲ့က ထုတ်ပြန်ထားပါတယ်။
၂၀၂၁ မေလ ၁ ရက်ကနေ ၂၀၂၅ မေလ ၃၁ ရက်အထိ စစ်တပ်အာဏာသိမ်း ၄ နှစ်ကျော်ကာလအတွင်း မီးရှို့ဖျက်ဆီးမှုတွေကြောင့် အရပ်သားနေအိမ်ပေါင်း ၁၁၆၈၉၇ လုံး ပျက်စီးဆုံးရှုံးခဲ့ရတယ်လို့ Data for Myanmar အဖွဲ့က နိုဝင်ဘာ ၂၃ ရက်က ထုတ်ပြန်ထားပါတယ်။
မီးရှို့ခံရတဲ့ နေအိမ်တစ်သိန်းကျော်မှာ စစ်ကိုင်းတိုင်းက နေအိမ်ပေါင်း ၇၆၉၉၀ လုံး မီးရှို့ဖျက်ဆီးခံခဲ့ရလို့ တစ်နိုင်ငံလုံး မီးရှို့ဖျက်ဆီးခံရတဲ့ အရပ်သား နေအိမ်စုစုပေါင်းရဲ့ ၆၅ ရာခိုင်နှုန်းကျော်ရှိကြောင်း Data for Myanmar အဖွဲ့က အသိပေးထားပါတယ်။
