ဒီဇင်ဘာ-၁၉၊၂၀၂၅၊ရှိန်း၊ ဆိုင်းမင်း / People’s Spring
စစ်ဘေးရှောင်တွေထွက်ခွာရာ လမ်းတွေကို စစ်ကောင်စီလေတပ် က ဗုံးကြဲတိုက်ခိုက်နေရာမှာ ဒီနေ့ (ဒီဇင်ဘာလ ၁၉ ရက်) နေ့ခင်း ပိုင်းမှာ ဝက်လက်မြို့နယ်အရှေ့ခြမ်းကို ထပ်မံလေကြောင်းတိုက်ခိုက်ခဲ့လို့ ပြည်သူ သုံးဦးထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။
ဒီဇင်ဘာ ၁၉ ရက် ဒီနေ့ နေ့ခင်း ၁နာရီခွဲကျော်မှာ ဝက်လက်မြို့နယ်၊ ထုံးဘိုရွာအနီးက သန်းတောတဲတိုက်အနီးကို တံတားဦးလေတပ်က တက်လာတဲ့ ဂျက်တိုက်လေယာဉ်က ပေါင် ၂၅၀ဗုံး နှစ်လုံးကြဲခဲ့တာလို့ သိရပါတယ်။
“အခုကြဲသွားပြီ၊မြင်ရတာကတော့ ရှားကွဲဘက်ပဲ၊မီးခိုးတွေလုံးတက်လာတယ်၊မီးလောင်နေပြီ”လို့ ဒေသခံတဦးက ပြောပါတယ်။
Public Service Announcement
ဗုံးကြဲတိုက်ခိုက်ခံရမှုမှာ ရွှေဘိုမြို့နယ်၊လက်ကောက်ကျရွာကနေ စစ်ဘေးလာရှောင်တဲ့ အသက် ၃၀ အရွယ် ကိုစောထွန်းနဲ့ အသက် ၅၀ ဒေါ်နီတို့ ထိခိုက်ဒဏ်ရာရခဲ့သလို ထုံးဘိုရွာခံ (၃၄ အရွယ်ကို မျိုးအောင်တို့ ထိခိုက်ဒဏ်ရာရခဲ့တယ်လို့ သိရပါတယ်။
အဲဒီကျေးရွာတွေဟာ စဉ့်ကူးမြို့နယ်ရဲ့အနောက်ဖက် မြစ်ကမ်းအနီးမှာရှိပြီး စဉ့်ကူးမြို့နယ်က ပြည်သူ တွေ စစ်ရှောင်တဲ့နေရာကို ကြဲတာဖြစ်နိုင်တယ်လို့လည်း ဒေသခံ တွေက ဆိုပါတယ်။
ဒါ့အပြင် ဒီနေ့မှာ ကျွန်းလှနဲ့ ကောလင်းမြို့နယ်တို့ကိုပါ ဆက်တိုက် လေကြောင်းတိုက်ခိုက် နေတယ်လို့ သိရပါတယ်။
ဒီဇင်ဘာ ၁၉ ရက်ကလည်း ခင်ဦးလမ်းဆုံလို့ လူသိများတဲ့ ခင်ဦး၊ရွှေဘိုမြို့နယ်အစပ်ကို စစ်တပ်က လေကြောင်းတိုက်ခိုက်ခဲ့တာမို့ ပြည်သူ ၁၃ ဦး သေဆုံးခဲ့တယ်လို့ သိရပါတယ်။
