ရုံးစည်ကြီးတိုက်နယ်ရဲစခန်း တော်လှန်ရေးတပ်တွေ စီးနင်းတိုက်ခိုက်၊ နှစ်ဖက်ထိခိုက်မှုရှိ

ဒီဇင်ဘာ-၂၂၊၂၀၂၅။မိုမို/People’s Spring

မန္တလေးတိုင်း၊ တောင်သာမြို့နယ်က စစ်ကောင်စီရဲ့ ရုံးစည်ကြီးတိုက်နယ်ရဲစခန်း စီးနင်းတိုက်ခိုက်မှုမှာ ဘန်ကာတွေသိမ်းနိုင်ခဲ့ပြီး စစ်အုပ်စုသေဆုံးမှုရှိတယ်လို့ မြင်းခြံခရိုင်တပ်ရင်း(၃)တာဝန်ရှိသူက လူထုနွေဦးကို ပြောပါတယ်။

တောင်သာမြို့ရဲ့ အရှေ့ဘက်ခြမ်းက စစ်ကောင်စီတပ် အင်အား ၆၀ခန့်ရှိတဲ့ ရုံးစည်ကြီးတိုက်နယ်ရဲစခန်းကို မနေ့က(ဒီဇင်ဘာ ၂၁ရက်) မနက် ၅နာရီခွဲက စီးနင်းခဲ့တာလို့ ဆိုပါတယ်။

“စခန်းသိမ်းနိုင်တဲ့ အနေအထားအထိရောက်ခဲ့တယ်။စခန်းအပေါက်ဝက ဘန်ကာတွေဆို ကျွန်တော်တို့ဗုံးသီးတွေထည့်ပြီး ရှင်းခဲ့တယ်။နောက်ဘန်ကာတစ်ခုဆို သေနတ်ပြောင်းထည့်ပြီးတစ်ဘောက်လုံးအပြည့်ဆွဲခဲ့တဲ့အနေအထားရှိခဲ့တာ။အဲဒီမှာ ကိုယ့်ရဲဘော်တစ်ယောက် ထိတယ်။နောက်ရဲဘော်လေးယောက် ဒဏ်ရာရတာရော လေကြောင်းကနေပါ ဂျက်ဖိုက်တာ၊ပါရာမော်တာလေးစီးနဲ့ လာလို့ ကျွန်တော်တို့ ပြန်ဆုတ်ခဲ့ရတာ”လို့ မြင်းခြံခရိုင် အမှတ်(၃)တပ်ရင်း တာဝန်ရှိသူက တိုက်ပွဲ ဖြစ်စဥ်ကို ရှင်းပြပါတယ်။

Public Service Announcement

အဲဒီစခန်းသိမ်းတိုက်ပွဲမှာ စစ်ကောင်စီရဲ့ စစ်အသုံးအဆောင်ပစ္စည်းနဲ့ ခဲယမ်းတချို့ပဲ သိမ်းနိုင်ခဲ့တယ်လို့သူက အသိပေးပါတယ်။

ဒါပေမယ့် တိုက်ပွဲအတွင်း မျက်မြင်တွေ့ရှိမှုတွေအရ စစ်ကောင်စီတပ်သား ၆ ဦးသေဆုံးပြီး လေးဦးထက်မနည်းဒဏ်ရာရတယ်လို့ ဆိုပါတယ်။

တော်လှန်ရေးတပ်ဖွဲ့ဘက်ကလည်း မြင်းခြံခရိုင် အမှတ်(၃)တပ်ရင်းက ရဲဘော်တစ်ဦးကျဆုံးပြီး ရဲဘော်လေးဦး ဒဏ်ရာရရှိခဲ့ပါတယ်။

စစ်ကောင်စီတပ်က တောင်သာမြို့နယ်မှာ မိတ္ထီလာအခြေစိုက်တပ်မ(၉၉) လက်အောက်ခံတပ်ရင်းတွေအပါအဝင် စစ်မှုထမ်းအင်အားတွေအသုံးပြုပြီး စစ်ကြောင်းထိုးနေတာရှိပါတယ်။

“တောင်သာ မြို့နယ်တစ်ခုလုံးအရ ဆိုရင် စကစဘက်က အင်အား ၆၀၀ နဲ့အထက် ရှိနေတယ်”လို့ ဒေသတွင်းစစ်ရေးသတင်းရင်းမြစ်က ပြောပါတယ်။

အခု ဒီဇင်ဘာ ၂ ရက်က တောင်သာမြို့နယ်တောင်ဘက်ခြမ်းမှာ စစ်ကောင်စီတပ်စစ်ကြောင်းနဲ့ တော်လှန်ရေးတပ်ဖွဲ့တွေ တိုက်ပွဲဖြစ်ခဲ့ပြီး နှစ်ဖက်ထိခိုက် သေဆုံးမှုရှိတယ်လို့ သိရပါတယ်။

လက်ရှိ စစ်ကောင်စီတပ်ရဲ့ ထိုးစစ်တွေအတွက် ခုခံဖို့နဲ့ တန်ပြန်ထိုးစစ်ဆင်ဖို့အတွက် ခဲယမ်း၊ကျည် ဖြည့်တင်းနိုင်ရေးကူညီကြဖို့ တော်လှန်ရေးတပ်ဖွဲ့တွေက မေတ္တာရပ်ခံထားပါတယ်။