ဒီဇင်ဘာ-၂၃၊ ၂၀၂၅။ ရှိန်း/People’s Spring
မန္တလေးတိုင်း၊ မြင်းခြံမြို့ရဲ့မြောက်ဘက်က အိုင်းမရွာကို စစ်တပ် ဝင်ရောက်ခဲ့ပြီး ပြည်သူတွေကိုဖမ်းဆီးကာ နေအိမ်တွေကို မီးရှို့ဖျက်ဆီးခဲ့တယ်လို့ မြို့နယ်ပြည်သူ့ကာကွယ်ရေးအဖွဲ့(ပကဖ)က ပြောပါတယ်။
ဒီဇင်ဘာ ၂၂ ရက် မနေ့က မနက် ၁၁နာရီလောက်မှာ စစ်ကောင်စီ ခမရ(၁၅)တပ်က တပ်သားတွေက အိုင်းမရွာကို ဝင်ရောက်ပြီး ပြည်သူတွေကို ဖမ်းဆီးကာ နေအိမ်တွေကို မီးရှို့ဖျက်ဆီးခဲ့တာလို့ ဆိုရပါတယ်။
“မနေ့က တနေကုန် ရှို့နေတာဆိုတော့ တော်တော်များလောက်တယ်။ အခုထိစစ်သားတွေရွာထဲမှာပဲ ရှိနေသေးတယ်။ ပြည်သူတွေကိုလည်း ဖမ်းထားတုန်းပဲ”လို့ မြို့နယ်ပကဖတာဝန်ရှိသူတစ်ဦးက ပြောပါတယ်။
Public Service Announcement
ပြည်သူ ၁၀ဦးဝန်းကျင် ဖမ်းဆီးခံထားရတယ်လို့ သိရပြီး စစ်ကြောင်းရှိနေသေးတာမို့ အသေးစိတ်အခြေအနေကို မသိရသေးပါဘူး။
ဒါ့အပြင် မနေ့ညပိုင်းက အိုင်းမရွာအနီးကို စစ်တပ်က Paramoter (စက်တပ်လေထီး)နဲ့ လာရောက် ဗုံးကြဲခဲ့သေးတယ်လို့ သိရပါတယ်။
စစ်ကောင်စီရဲ့ ခမရ(၁၅)တပ်တွင်းကနေလည်း မြင်းခြံမြို့အနီးက ကျေးရွာတွေကို လက်နက်ကြီးတွေနဲ့ ဆက်တိုက်ပစ်ခတ်နေတယ်လို့ သိရပါတယ်။
