နိုင်ငံအရှေ့ပိုင်းက တိုက်ပွဲတွေ ပြင်းထန်နေရာ မြို့တစ်မြို့ကနေ ယူကရိန်းတပ်တွေ ဆုတ်ခွာခဲ့ရကြောင်း သိရပါတယ်။
ဆီဗာရက်စ်ခ်မြို့ကို လက်လွှတ်ခဲ့ရကြောင်း ယူကရိန်း စစ်တပ်က ဒီဇင်ဘာ ၂၃ ရက်မှာ အတည်ပြု ကြေညာခဲ့ပါတယ်။ တစ်ဖက်မှာတော့ ရုရှားတပ်တွေဟာ ယူကရိန်း အရှေ့ပိုင်း စစ်မြေပြင်မှာ ဖြည်းဖြည်းနဲ့မှန်မှန် ဆက်ပြီး ရှေ့တိုးလာနေပါတယ်။
တပ်ဖွဲ့ဝင်တွေရဲ့ အသက်တွေ မပြုန်းတီးစေဖို့၊ တိုက်ခိုက်ရေး ယူနစ်တွေ ထပ်ပြီး မဆုံးရှုံးဖို့အတွက် ဆီဗာရက်စ်ခ်ကနေ ဆုတ်ခွာဖို့ ဆုံးဖြတ်ခဲ့ရတယ်လို့ ယူကရိန်း စစ်တပ်က ကြေညာပါတယ်။ ပြီးတော့ မြို့ကို ထိုးစစ်ဆင် တိုက်ခိုက်နေတဲ့ ရုရှားရဲ့ စစ်အင်အားက ခုခံနေတဲ့ ယူကရိန်း ကာကွယ်ရေး တပ်တွေထက် အရမ်းသာလွန် များပြားနေတယ်လို့လည်း ဆိုပါတယ်။
ဆီဗာရက်စ်ခ်ကို သိမ်းယူနိုင်ခဲ့ခြင်းဟာ ဒွန်းညက်စ်ခ်ဒေသမှာ ယူကရိန်းရဲ့ လက်ကျန် ထိန်းချုပ်ထားဆဲ ဧရိယာတွေဖြစ်ပြီး ခံတပ်မြို့တွေအသွင် ပြောင်းလဲထားတဲ့ ဆလိုဗင့်စ်ခ်နဲ့ ခရာမာတော့စ်ခ်တို့နဲ့ ရုရှားတပ်တွေကို ပိုနီးကပ်လာစေခဲ့ပါတယ်။
Public Service Announcement
ရုရှားသမ္မတ ဗလာဒီမာ ပူတင်က ရုရှားဟာ ဒွန်းညက်စ်ခ်နဲ့ လူဟန့်စ်ခ် ပြည်နယ်တွေ ဖွဲ့စည်းပါဝင်တဲ့ ဒွန်းဘက်စ်ခ် ဒေသ တစ်ခုလုံးကို သိမ်းယူဖို့ စိတ်ပိုင်းဖြတ်ထားကြောင်း ပြောကြားထားပါတယ်။ တကယ်လို့ ယူကရိန်းနဲ့ စစ်ရပ်စဲရေးကိစ္စ ညှိနှိုင်း အောင်မြင်ရင်လည်း ဒွန်းဘက်စ်ခ်ကို ရုရှားဆီ လွှဲပေးရမယ်လို့ ပူတင်က အတိအလင်း တောင်းဆိုထားပါတယ်။
၂၀၂၂ ခုနှစ် ဖေဖော်ဝါရီလမှာ အိမ်နီးချင်း ယူကရိန်းနိုင်ငံကို စတင် ကျူးကျော်ခဲ့တဲ့ ရုရှားဟာ လက်ရှိမှာတော့ ယူကရိန်း ပိုင်နက်ရဲ့ ၂၀ ရာခိုင်နှုန်းလောက်ကို ထိန်းချုပ်ထားကြောင်းလည်း သိရပါတယ်။
ကိုးကား: BBC
