ဒီဇင်ဘာ – ၂၅ ၊၂၀၂၅ ၊ ဆိုင်းမင်း/People’s Spring
မန္တလေးတိုင်း ၊မြင်းခြံခရိုင်အတွင်း စစ်ကောင်စီတပ်က ထိုးစစ်ဆင်နေတာကြောင့် အများပြည်သူ ထိခိုက်မှု မရှိစေဖို့အတွက် မြင်းခြံ – နွားထိုးကြီး လမ်းပိုင်းကိုသွားလာတာမပြုလုပ်ဖို့ NUG အစိုးရ လက်အောက်ခံ မြင်းခြံခရိုင် အမှတ်(၄) တပ်ရင်း က ဒီဇင်ဘာလ ၂၃ ရက်မှာထုတ်ပြန်အသိပေးပါတယ်။
မြင်းခြံခရိုင်ထဲမှာ စစ်ကောင်စီတပ်ဟာ ပြီးခဲ့တဲ့ စက်တင်ဘာလ ၂၅ ရက်ကစတင်ပြီး သုံးလနီးပါး ကြာတဲ့အထိ စစ်ကြောင်းထိုးနေပြီး ဒေသခံတော်လှန်ရေးတပ်တွေက ခုခံကာကွယ်နေတယ်လို့ မြင်းခြံခရိုင် အမှတ်(၄) တပ်ရင်းကဆိုပါတယ်။
မြင်းခြံ – နွားထိုးကြီးကားလမ်းပိုင်းမှာဆိုရင် ယခုအပတ်အတွင်း သာယာကုန်း၊ ကံနောင်း၊ ကုန်းသာ၊ ကံရွာစတဲ့ကျေးရွာနဲ့ နွားထိုးကြီးမြို့ပေါ်အထိ ထိတွေ့တိုက်ပွဲဖြစ်ပွားခဲ့တယ်လို့သိရပါတယ်။
Public Service Announcement
ဒါကြောင့် တိုက်ပွဲဖြစ်ပွားနေတဲ့ လမ်းပိုင်းမှာ အရပ်သား ပြည်သူတွေ ထိခိုက်နစ်နာမှုမရှိစေဖို့အတွက် သွားလာတာမလုပ်ဖို့ မြင်းခြံခရိုင်အမှတ် (၄) တပ်ရင်းက အသိပေးလာတာပါ။
“ လုံးဝကိုမသွားသင့်သေးပါဘူး”လို့ နွားထိုးကြီးမြို့နယ်အတွင်းက တော်လှန်ရေးတပ်ဖွဲ့ဝင်တစ်ဦးကပြောပါတယ်။
ဒါအပြင် စစ်ကောင်စီတပ် နဲ့ နီးစပ်ရာနေရာတွေ ပြည်သူတွေ မနေထိုင်ကြဖို့လည်း အသိပေးထားပါတယ်။
စစ်ကောင်စီတပ် စစ်ကြောင်းထိုးချိန်မှာ ကျေးရွာတွေကို မီးရှို့တာ ၊ဒေသခံတွေကိုဖမ်းဆီးတာတွေကြောင့် မြင်းခြံခရိုင်ထဲက မြင်းခြံမြို့နယ်နဲ့ နွားထိုးကြီးမြို့နယ်တွေ ရှိ ထောင်နဲ့ချီတဲ့ပြည်သူတွေ စစ်ရှောင်နေရပါတယ်။
ဧရာဝတီမြစ် အရှေ့ဘက်ကမ်းမှာတည်ရှိပြီး ဖိုခနောင့်သဖွယ် ဖွဲ့စည်းထားတဲ့ မန္တလေးတိုင်းထဲက နွားထိုးကြီး ၊မြင်းခြံနဲ့ တောင်သာမြို့နယ်တွေဟာအာဏာသိမ်းစစ်ကောင်စီတပ်ကိုလက်နက်စွဲကိုင်တော်လှန်မှုအားကောင်းရာဒေသဖြစ်ပါတယ်။
တော်လှန်ရေးအင်အားစုတွေဟာ အခုနှစ် မေလအတွင်း နွားထိုးကြီး ၊ မြင်းခြံ ၊တောင်သာ နဲ့ ငါန်းဇွန်မြို့နယ်တွေထဲက စစ်ကောင်စီတပ်စခန်းတွေကို အထူးစစ်ဆင်ရေးအဖြစ် တပြိုင်တည်းဝင်ရောက်တိုက်ခိုက်ရာမှာ စစ်ကောင်စီတပ် အငိုက်မိပြီးအထိနာခဲ့ဖူးပါတယ်။
