ဒီဇင်ဘာ-၂၆၊ ၂၀၂၅။ ဆန်အောင်/People’s Spring
ကရင်အမျိုးသားအစည်းအရုံး(KNU) မြိတ်ထားဝယ်ခရိုင် ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၄)နယ်မြေက ကရင်လူငယ်တွေ စုပေါင်းပြီး စစ်ကောင်စီကျင်းပမယ့် ရွေးကောက်ပွဲ ဆန့်ကျင်ကြောင်း ဆန္ဒထုတ်ဖော်မှုတွေ ပြုလုပ်ခဲ့တယ်လု့ KNU မြိတ်ထားဝယ်ခရိုင်နဲ့ Karen Youth Organization က ဒီကနေ့ ဒီဇင်ဘာ ၂၆ရက်မှာ သတင်းထုတ်ပြန်ပါတယ်။
KNU မြိတ်ထားဝယ်ခရိုင် ထီးမိုပွာဒေသ၊ ကစယ်ဒိုဒေသက ကရင်လူငယ်တွေနဲ့ လယ်ဒိုစိုးဒေသက ကရင်လူငယ်ခေါင်းဆောင်တွေက ရွေးကောက်ပွဲ ဆန္ဒထုတ်ဖော်မပြု ပြုလုပ်ခဲ့တာလို့ ဆိုပါတယ်။
ဆန္ဒထုတ်ဖော်ရာမှာ အကြမ်းဖက်လူသတ်စစ်ဖိနပ်အောက်မှာ တရားမျှတသောရွေးကောက်ပွဲ လုံး၀မရှိပါ၊ သင့်မဲနဲ့ လူသတ်ခွင့်မပေးနဲ့ သမိုင်းတရားခံ မဖြစ်ဖို့ အတုအယောင်ရွေးကောက်ပွဲကို ဆန့်ကျင်စို့ စတဲ့စာတွေရေးသားဖော်ပြ ဆန္ဒထုတ်ဖော်ခဲ့တာပါ။
Public Service Announcement
ဒါ့အပြင် တရားမဝင်အတုအယောင်ရွေးကောက်ပွဲကို သပိတ်မှောက် ဖက်ဒရယ်လမ်းကို ရဲရဲလျှောက်၊ အကြမ်းဖက်မှုအတွက် မဲမပေးဘူး၊ စစ်တပ်တွေအတွက် နေရာမရှိဘူး၊ တရားမဝင် အတုအယောင်ရွေးကောက်ပွဲကို လူထုအားနဲ့တိုက်ဖျက်ကြ စသည့် စာသားတွေ ရေးသား ဖော်ပြဆန္ဒထုတ်ဖော်ခဲ့ကြောင်း ဓာတ်ပုံမှတ်တမ်းတွေမှာ တွေ့ရပါတယ်။
ဒီမိုကရေစီ ဆိုတာ သေနတ်အောက်မှာ မကြီးထွားနိုင်ဘူးလို့ ကရင်လူငယ်တွေက ဆန္ဒထုတ်ဖော်ခဲ့ကြသလို မင်းအောင်လှိုင်က အနာဂတ်တွေ မဲတွေ အသက်တွေကို ခိုးတယ်ဆိုပြီးလည်း စာရေးသားဖော်ပြ ဆန္ဒထုတ်ဖော်ခဲ့ပါတယ်။
KNU ဗဟိုနဲ့ ခရိုင်အသီးသီးဟာ စစ်ကောင်စီ ရွေးကောက်ပွဲ လက်မခံကြောင်း လှုပ်ရှားမှုတွေကို ပုံစံမျိုးစုံနဲ့ လုပ်ဆောင်ခဲ့သလို လူထုတွေ စစ်တပ်ရွေးကောက်ပွဲ ဆန့်ကျင်ကြဖို့လည်းနှိုးဆော်ထားပါတယ်။
