ဒီဇင်ဘာ – ၂၆ ၊၂၀၂၅ ၊ ဆိုင်းမင်း/People’s Spring
စစ်ကောင်စီတပ် စစ်ကြောင်းထိုးနေတဲ့ မန္တလေးတိုင်း မြင်းခြံ နဲ့ နွားထိုးကြီးနယ်ထဲမှာ ရက်သတ္တပတ် တစ်ပတ်တာအတွင်းကျေးရွာ ငါးရွာက အိမ်ခြေ ၁,၈၀၀ နီးပါး မီးရှို့ခံရတယ်လို့ ဒေသခံအချို့ဆီကသိရပါတယ်။
မီးရှို့ခံရတဲ့ ရွာတွေကတော့ မြင်းခြံမြို့နယ်ထဲက တလုပ်ရွာ ၊အိုင့်မရွာ ၊ နွားထိုးကြီးမြို့နယ်ထဲ ခံစပ်ကုန်းအရှေ့ရွာ ၊ ခံစပ်ကုန်းအနောက်ရွာ ၊မင်းရွာတို့ဖြစ်ပြီးဒီဇင်ဘာလ ၁၈ ရက်ကနေ ဒီဇင်ဘာလ ၂၄ အထိ စစ်ကြောင်းထိုး မီးရှို့ခံရတာပါ။
တလုပ်ရွာမှာ အိမ်ခြေ ၁,၀၀၀ ၊ အိုင့်မရွာမှာ အိမ်ခြေ ၃၀၀ ၊ ခံစပ်ကုန်းအရှေ့ရွာနဲ့ ခံစပ်ကုန်းအနောက်ရွာမှာကတော့ အိမ်ခြေ ၄၀၀ခန့်နဲ့ မင်းရွာက အိမ်ခြေ ၈၀ကျော် မီးရှို့ခံရတာလို့ သိရပါတယ်။
Public Service Announcement
“တလုပ်ကတော့ ငါးခါလောက်ရှိပြီ ရှို့ခံရတာ အကုန်ပြောင်သလောက်ဖြစ်သွားတာပေါ့”လို့ ဒေသခံတစ်ဦးကပြောပါတယ်။
မြင်းခြံမြို့နယ်ထဲကကျေးရွာတွေကို ပြီးခဲ့တဲ့စက်တင်ဘာလကတည်းက စတင် စစ်ကြောင်းထိုးလာတဲ့အတွက် ဒေသခံပြည်သူ တစ်သောင်းနီးပါးက လွတ်ရာကို တိမ်းရှောင်နေရဆဲပါ။
ဆုံရွာ၊ရွာကြီး၊ကံနှောင်း၊ ကျောက်ပြုတ်စတဲ့ ရွာတွေဘက်မှာတော်လှန်ရေးတပ်တွေနဲ့ စစ်ကြောင်းထိုးတဲ့ စစ်ကောင်စီတပ်တို့ကြား ဒီဇင်ဘာလ ၂၁ ရက်ကစတင်တိုက်ပွဲဖြစ်ခဲ့ပေမယ့်လတ်တလောမှာတော့ တိုက်ပွဲတွေငြိမ်သက်နေတယ်လို့သိရပါတယ်။
ဧရာဝတီမြစ် အရှေ့ဘက်ကမ်းမှာတည်ရှိပြီး ဖိုခနောင့်သဖွယ် ဖွဲ့စည်းထားတဲ့ မန္တလေးတိုင်းထဲက နွားထိုးကြီး ၊မြင်းခြံနဲ့ တောင်သာမြို့နယ်တွေဟာအာဏာသိမ်းစစ်ကောင်စီတပ်ကိုလက်နက်စွဲကိုင်တော်လှန်မှုအားကောင်းရာဒေသဖြစ်ပါတယ်။
ဓာတ်ပုံ – Google Earth
