ဒီဇင်ဘာ-၂၆၊ ၂၀၂၅။ ရှိန်း/ People’s Spring
မန္တလေးမြို့၊ ပြည်ကြီးတံခွန်မြို့နယ်မှာ လုံခြုံရေးအရဆိုပြီး ရပ်ကွက်အလိုက်ကင်းစောင့်ခိုင်းကာ မစောင့်နိုင်တဲ့ အိမ်တွေက တလ ၁၅၀၀၀ကျပ် လုံခြုံရေးကြေးပေးရတယ်လို့ မြို့ခံတွေက ပြောပါတယ်။
မန္တလေးမြို့၊ ပြည်ကြီးတံခွန်မြို့နယ်၊ ဆ ရပ်ကွက်မှာ ရပ်ကွက်လုံခြုံရေးဆိုပြီး တညတဖွဲ့ အုပ်ချုပ်ရေးမှူးအမိန့်နဲ့ ကင်းစောင့်ရတာလို့သိရပါတယ်။
တညကို ၇ဦးကနေ ၁၀ဦးအထိ ဖွဲ့ထားတဲ့အဖွဲ့ တွေက ညစဉ် ဆရပ်ကွက်ဈေးမှာ ကင်းစောင့် ပေးရတာလို့ ရပ်ကွက်နေပြည်သူတဦးက ပြောပါတယ်။
Public Service Announcement
“ အုပ်ချုပ်ရေးမှူးနဲ့နီးစပ်သူတွေ စောင့်ကြတာပိုများတယ်။ အလှည့်ကျနဲ့ စောင့်ရတာ။ မစောင့်ချင်တဲ့အိမ် တွေက ပိုက်ဆံ ပေးရတယ်။အဲဒီပိုက်ဆံယူပြီး ဒီလူတွေက ကင်းပြန်စောင့်ပေါ့။အဲ့လိုလုပ်ရတာ” လို့ ရပ်ကွက်နေပြည်သူတဦး ကပြောပါတယ်။
ပြည်ကြီးတံခွန်မြို့နယ်မှာ ပေါက်ကိုယ်တော်ဦး ဆောင်တဲ့ ပျူစောထီးအဖွဲ့၊ ယူနီဖောင်းအပြာဝတ် ရပ်ကွက်လုံခြုံရေးအဖွဲ့တွေ ရှိတဲ့အပြင် ပြည်သူတွေကိုပါ ညစဉ်ကင်း စောင့်ခိုင်းနေတာပါ။
ပြည်ကြီးတံခွန်မြို့နယ်က ဆရပ်ကွက်နဲ့ စလုံး ရပ်ကွက်တို့ဟာ အရင်က မကြာခဏ ဗုံးပေါက်ကွဲမှုတွေနဲ့ အုပ်ချုပ်ရေးမှူးတွေ သတ်ဖြတ်ခံထားရတဲ့မြို့နယ်တွေ ဖြစ်တယ်လို့ သိရပါတယ်။
၂၀၂၃ခုနှစ်ကစပြီး ပျူစောထီး အားကောင်းတဲ့ မြို့နယ်တွေဖြစ်လာပြီး ပေါက်ကိုယ်တော်နဲ့ တပည့်စံရှား ဦးဆောင်တဲ့ ပျူစောထီးတွေစိုးမိုးထားတဲ့ နယ်မြေဖြစ်တယ်လို့ သိရပါတယ်။
